Read Lampung Api MARKUS 12 Bible Online

MARKUS 12 - Lampung Api bible

MARKUS 12

¹ Kak raduni Isa mulai cawa jama perumpamaan jama imam-imam kepala, guru-guru agama rik jelma-jelma sai mimpin Yahudi udi. Isa cawa, “Wat sai jelma nanomi sebidang kebun anggor, raduni masang kuta di sekelilingni. Radu jak seno ia ngegali lubang untuk alat pemeras anggor, raduni ia ngebangun sai menara jaga. Radu jak seno ia nyiwako kebun anggor udi jama penggarap-penggarap raduni berangkat mik negeri bareh.

²Ketika radu waktuni musim mutil uah anggor, ulun udi ngirim sai jelma sai ngelayani ia jama penggarap-penggarap kebun udi, untuk nerima bagianni.

³Kidang penggarap-penggarap udi nangkok jelma sai ngelayani udi. Raduni tian mukulni, raduni ngayun ia mulang jama culuk bangkang.

⁴Raduni sekedau kebun udi ngirim luot sai jelma sai ngelayani ia sai bareh. Kidang penggarap-penggarap udi memukul ulu jelma sai ngelayani udi, raduni nguser ia jama caci maki.

⁵Sekedau kebun udi ngirim lagi sai jelma sai ngelayani ia sai bareh. Kidang tian ngebunuh jelma sai ngelayani udi. Rik renodo seterusni tian memperlakuko lamon jelma sai ngelayani sai bareh muneh: wat sai dipukul rik wat juga sai dibunuh.

⁶Sapa lagi sai dapok dikirim tano ulih sekedau kebun udi? Angkah tinggal sai, yakdo anakni tenggalan sai dikasihini. Jadi akherni ia ngirim anakni ano jama penggarap-penggarap udi. ‘Pasti anakku inji haga dihormati,’ pikerni.

⁷Kidang penggarap-penggarap udi cawa peperda tian, ‘Inji ia ahli warisni. Ija ram bunuh ia, in neram mansa warisanni!’

⁸Maka sanak udi ditangkok, raduni dibunuh. Mayatni tian tokko mik luah kebun udi.”

⁹Radu Isa betanya, “Api sai haga dilakuko ulih sekedau kebun udi? Pasti ia haga ratong rik ngebunuh penggarap-penggarap udi, raduni nyerahko kebun udi jama penggarap-penggarap sai bareh.

¹⁰ Keti tantuni radu ngebaca ayat inji delom Alkitab, ‘Batu sai mak tepakai ulih tukang-tukang bangunan radu jadi batu sai terutama.

¹¹Injido guwai-Ni Tuhan; hara helauni!’ ”

¹²Maka para pemuka bangsa Yahudi sai ngedengi perumpamaan udi, berusaha nangkok Isa, mani tian pandai perumpamaan udi ditujuko Isa jama tian. Kidang tian rabai jama jelma lamon. Jadi, tian mik ninggalko Isa.

¹³Pira-pira ulun Farisi rik pira-pira anggota golongan Herodes dikayun ngejebak Isa jama pertanyaan-pertanyaan.

¹⁴Tian ratong jama Isa rik cawa, “Bapak Guru, sekam pandai Bapak jujor rik mak ngehirauko pendapat sapa pun. Bapak ngajar terus terang mengenai kehaga Allah untuk manusia, mani Bapak mak pandang jelma. Nah, cubado Bapak cawako jama sekam, ‘Nutuk atoran agama neram, ngasi mak ngebayar pajak jama Kaisar atau mawat? Haga kedo ram ngebayar pajak ano, atau mawat?’ ”

¹⁵Isa pandai kemunafikan tian. Ia ngejawab, “Api mani keti haga ngejebak Nyak? Cuba liakdo jama Nyak sekeping duit perak.”

¹⁶Maka tian ngeniko jama Ia sekeping duit perak. Raduni Isa betanya, “Gambar rik gelarni sapa inji?” “Kaisar,” jawab tian.

¹⁷“Nah, kik injuk reno,” ani Isa, “keniko jama Kaisar api sai milik Kaisar, rik jama Allah api sai milik Allah.” Tian hiran ngedengi Ia.

¹⁸ Pira-pira jelma jak golongan Saduki ratong jama Isa. (Tian yakdo golongan sai bependapat bahwa ulun mati mak haga bangkit luot.)

¹⁹ “Bapak Guru,” ani tian jama Isa, “Musa nulis hukum inji untuk ram: ‘Kik sai jelma bakas mati rik ia mak ngedok anak, maka puarini haga kawin jama randani in ngeni keturunan jama ulun sai radu mati udi.’

²⁰Pernah wat pitu jelma kakak adik. Sai tuha kawin, raduni mati tanpa ngedok anak.

²¹Kak raduni sai kerua kawin jama randani, kidang ia pun mati tanpa ngedok anak. Hal sai gegoh tejadi juga jama puari sai ketelu,

²²rik seterusni sampai jama sai kepitu. Akherni bebai udi tenggalan mati juga.

²³Waktu rani ulun mati bangkit luot, inggomni sapa bebai udi? Mani kepitu-pituni radu kawin jama ia!”

²⁴Isa ngejawab, “Keti keliru nihan. Mani keti mak ngerti Alkitab maupun kuasa Allah.

²⁵Mani kik ulun-ulun mati bangkit luot, tian mak haga kawin lagi, melainko tian haga hurik injuk malaikat di surga.

²⁶ Rik tentang ulun mati dibangkitko luot, makkung pernah kedo keti ngebaca di delom kitab Musa mengenai semak belukar sai menyala udi? Di delom ayat-ayat udi tetulis bahwa Allah cawa jama Musa, ‘Nyakdo Allah Abraham, Allah Ishak rik Allah Yakub.’

²⁷Allah udi lain hak Allah ulun mati. Ia Allah ulun hurik. Keti keliru nihan!”

²⁸ Raduni ratongdo sai guru agama ngedengiko kicik-kicikan hantara Isa jama ulun-ulun jak golongan Saduki ano. Guru agama udi ngeliak bahwa Isa radu ngejawab ulun-ulun udi betik-betik. Maka ia betanya jama Isa, “Perintah sai sepa sai paling penting jak sunyinni perintah?”

²⁹ Isa ngejawab, “Perintah sai mula-mula, yakdo: ‘Dengiko, hai bangsa Israel! Tuhan Allah neram, Tuhan udi esa.

³⁰Cintaido Tuhan Allahmu jama sepenuh hatimu, jama segenap jiwamu, jama sunyinni akalmu rik jama sunyin kekuatanmu.’

³¹ Perintah kerua yakdo: ‘Cintaido peperda keti, injuk niku mencintai dirimu tenggalan.’ Mak ngedok lagi perintah bareh sai lebih penting jak kerua perintah udi.”

³² Raduni guru agama udi cawa jama Isa, “Tepat sekali, Bapak Guru! Sangun temon api sai Bapak cawako: Tuhando Allah sai esa, rik mak ngedok lagi Allah sai bareh.

³³ Rik manusia haga mencintai Allah jama sepenuh hatini, rik jama sunyinni akalni rik jama sunyin kekuatanni. Rik ia juga haga mencintai peperda tian injuk dirini tenggalan. Ano lebih betik jak mempersembahko kurban bakaran rik kurban-kurban barehni jama Allah.”

³⁴Isa ngeliak bahwa guru agama ano radu ngejawab betik nihan. Rik Isa cawa jama ia, “Niku radu hamper jadi anggota umat Allah.” Radu jak seno mak sai jelma pun sai bani lagi ngajuko pertanyaan jama Isa.

³⁵Sementara ngajar di Lamban Ibadah, Isa betanya, “Injuk repa guru-guru agama dapok nyawako bahwa Raja Penyelamat udi keturunan Daud?

³⁶ Padahal Daud tenggalan — mani diilhami ulih Ruh Allah — cawa, ‘Tuhan cawa jama Tuhanku: mejongdo di kebelah kanan-Ku sampai Nyak nyani musuh-musuh-Mu takluk jama Niku.’

³⁷Jadi kik Daud nyebut Raja Penyelamat udi ‘Tuhan’, repa mungkin Ia keturunan Daud?” Ulun lamon sai wat di Lamban Ibadah udi senang ngedengi Isa ngajar.

³⁸Ia cawa jama tian, “Hati-hatido tehadap guru-guru agama. Tian gering midor-midor jama jubah sai kejung rik gering dihormati di pasar-pasar.

³⁹Tian gering rang-rang sai tehormat di delom lamban ibadah rik di pesta-pesta.

⁴⁰Tian nipu randa-randa rik ngerampas lambanni. Rik untuk nyalok kejahatan tian udi, tian bedua kejung-kejung. Hukuman tian kanah mebiak!”

⁴¹Waktu mejong betentangan jama kutak persembahan di Lamban Ibadah, Isa memperhatiko ulun-ulun ngurukko duit tian mik delom kutak udi. Lamon jelma batin ngurukko lamon duit;

⁴²raduni sai randa mejerih ratong juga. Ia ngurukko rua duit tembaga, yakdo duit receh sai paling lunik nilaini.

⁴³Maka Isa ngurau jelma-jelma sai nutuk Ia raduni cawa jama tian, “Perhatikodo inji: Randa sai mejerih ano ngurukko mik delom kutak udi lebih lamon jak sai dikurukko ulih sunyinni ulun-ulun barehni.

⁴⁴Mani tian sunyinni ngeni jak kelebihan hartani. Kidang randa udi walaupun mejerih nihan ngeniko sunyinni sai wat jama ia — justru sai ia perluko untuk hurik.”