Read Lampung Api MARKUS 15 Bible Online

MARKUS 15 - Lampung Api bible

MARKUS 15

¹Pagi-pagi nihan, seluruh Mahkamah Agama termasuk imam-imam kepala, jelma-jelma sai mimpin Yahudi rik guru-guru agama berunding geluk-geluk. Tian ngikok culuk Isa, kak raduni ngusung Ia rik nyerahko-Ni jama Pilatus.

²Pilatus betanya jama Isa, “Temon kedo Niku raja ulun Yahudi?” “Injuk renodo cawamu,” jawab Isa.

³Imam-imam kepala ngemukako lamon tuduhan tehadap Isa.

⁴Raduni Pilatus betanya lagi jama Isa, “Mak haga kedo Niku ngejawab? Cuba liak pira lamon tuduhan sai tian ajuko jama Niku!”

⁵Kidang Isa sama sekali mak ngejawab, sehingga Pilatus hiran.

⁶Unggal Perayaan Paskah, biasani Pilatus ngelepasko sai jelma tahanan nurut pilihan ulun lamon.

⁷Di delom penjara, di hantara pemberuntak-pemberuntak sai ngelakuko pembunuhan pada waktu kerusuhan, wat sai jelma gelarni Barabas.

⁸Ulun lamon bekumpul rik ngilu jama Pilatus in ia ngelepasko sai tahanan injuk biasa.

⁹Pilatus betanya jama tian, “Haga kedo keti, nyak ngelepasko raja ulun Yahudi udi untuk keti?”

¹⁰Mani Pilatus sadar bahwa imam-imam kepala nyerahko Isa jama ia mani sesera.

¹¹Kidang imam-imam kepala ngehasut ulun lamon in ngilu Pilatus ngelepasko Barabas untuk tian.

¹²Maka Pilatus cawa luot jama ulun lamon udi, “Kik injuk reno, nyak haga nyani api jama ulun sai keti sebut raja ulun Yahudi udi?”

¹³Tian mekik, “Salibko Ia!”

¹⁴“Kidang api kejahatan-Ni?” tanya Pilatus. Raduni tian mekik lebih kuat lagi, “Salibko Ia!”

¹⁵Pilatus mirak nyenangko ulun lamon udi, maka ia ngelepasko Barabas untuk tian. Kak raduni ia ngayun ulun ngelecut Isa, raduni nyerahko Ia untuk disalibko.

¹⁶Isa diusung ulih prajurit-prajurit mik balai pengadilan di istana gubernur. Kak raduni sunyinni pasukan diurau bekumpul.

¹⁷Raduni tian makaiko jubah ungu jama Isa, rik nyani mahkota jak ranting-ranting keruwi, raduni dipasang di uluni Isa.

¹⁸Radu jak seno tian ngeni salam jama Ia. “Daulat Raja ulun Yahudi!” ani tian.

¹⁹Tian mukul ulu Isa jama tungkok, raduni tian ngelui Ia rik sumbah sujud di hadap-Ni.

²⁰Radu jak mempermainko Isa, tian ngebukak jubah ungu udi raduni makaiko luot kawai-Ni tenggalan. Kak raduni Ia diusung mik luah untuk disalibko.

²¹ Di tengah renglaya tian maksa sai jelma mikul salib Isa. Ulun inji kebetulan ampai jak pekon haga kuruk mik kota. (Gelarni Simon, — asal jak Kirene — bakni Aleksander rik Rufus.)

²²Isa diusung mik suatu rang sai gelarni Golgota, retini “Rang Tengkorak”.

²³Di dudi tian haga ngeni jama Ia anggor sai dicampor mur, kidang Isa mak haga nginum anggor udi.

²⁴ Kak raduni tian nyalibko Ia, rik ngebagi-bagiko kawai-Ni secara lotre untuk nantuko bagian masing-masing.

²⁵Penyaliban-Ni udi tejadi pukul siwa pagi.

²⁶Di atas salib-Ni dipasang tulisan mengenai tuduhan tehadap-Ni, yakdo: “Raja Ulun Yahudi”.

²⁷Jejama jama Isa tian nyalibko muneh rua penyamun; sai di kebelah kanan rik sai lagi di kebelah kiri-Ni. [

²⁸ Injuk reno tejadido sai tetulis delom Alkitab; yakdo: “Ia dianggap termasuk ulun-ulun jahat.”]

²⁹ Ulun-ulun sai liu di dudi ngegileng-gilengko uluni rik ngehina Isa. Tian cawa, “Hai, Niku sai haga ngerubuhko Lamban Ibadah rik ngebangunni delom telu rani.

³⁰Cuba regah jak salib udi rik selamatko diri-Mu!”

³¹Injuk reno juga imam-imam kepala rik guru-guru agama ngereneh Isa. Tian cawa peperda tian, “Ia nyelamatko ulun bareh, kidang diri-Ni tenggalan mak dapok Ia selamatko!

³²Kik Ia raja Israel, Raja Penyelamat, betikni Ia tano regah jak salib udi, in sekam ngeliak rik percaya jama Ia!” Ulun-ulun sai disalibko jejama Isa udi pun ngehina Isa.

³³Waktu tengah rani, selama telu jam sunyinni negeri ano jadi kelam.

³⁴ Rik waktu pukul telu dibi, Isa mekik jama suara sai keras, “Eloi, Eloi, lama sabakhtani?” sai retini, “Ya Allah-Ku, ya Allah-Ku, mengapi Niku ninggalko Nyak?”

³⁵Pira-pira ulun di dudi ngedengi pekikan udi, rik cawa, “Dengiko Ia ngurau Elia!”

³⁶ Sai jak tian geluk-geluk mik ngakuk bunga karang, raduni nyelupkoni mik delom anggor peros. Kak raduni bunga karang udi dicucukkoni di uncuk sebatang kayu, raduni diulurkoni mik beber Isa, sambil cawa, “Tunggu, ija ram liak, api Elia ratong ngeregahko Ia jak salib udi.”

³⁷Raduni Isa mekik, rik mati.

³⁸ Hordeng sai tegantung di delom Lamban Ibadah cabik jadi rua jak atas sampai debah.

³⁹Perwira sai cecok di hadap salib ano, ngeliak injuk repa Isa mati. Perwira udi cawa, “Sangun temon ulun inji Anak Allah!”

⁴⁰ Di dudi wat juga pira-pira bebai sai sedang ngeliak sunyinni ano jak jaoh. Di hantarani ano wat Salome, Maria Magdalena, rik Maria emak Yakobus sai ngura rik Yoses.

⁴¹Tiando bebai-bebai sai nutuk rik nulung Isa waktu Ia wat di Galilea. Rik wat lamon luot bebai-bebai bareh di dudi sai radu ratong mik Yerusalem jejama jama Isa.

⁴²Rani radu mulai di bingi waktu Yusuf jak Arimatea ratong. Ia anggota Mahkamah Agama sai dihormati. Ia juga sedang nunggu waktuni Allah mulai memerintah sebagai Raja. Rani udi rani Persiapan (yakdo rani semakkung rani Sabat.) Ulihni seno Yusuf bani ngehadap Pilatus rik ngilu mayat Isa.

⁴³

⁴⁴Pilatus hiran ngedengi bahwa Isa radu mati. Jadi ia ngayun ulun ngurau ulu pasukan rik betanya api Isa radu saka mati.

⁴⁵Radu ngedengi laporan perwira udi, Pilatus ngizinko Yusuf ngakuk mayat Isa.

⁴⁶Raduni Yusuf ngebeli kain kafan jak linen halus rik radu jak ngeregahko mayat Isa, ia ngebungkusni jama kain udi. Kak raduni ia ngepikko mayat udi di delom kuboran sai disani di delom bukit batu. Radu jak seno ia ngegulingko sai batu balak nyalok rangok kubor udi.

⁴⁷Sementara udi Maria Magdalena rik Maria mak Yoses ngeperhatiko di dipa Isa dipikko.