Read Lampung Api MARKUS 16 Bible Online

MARKUS 16 - Lampung Api bible

MARKUS 16

¹Waktu rani Sabat radu liwat, Maria Magdalena, Maria emak Yakobus, rik Salome mik ngebeli ramuan-ramuan untuk ngeminyaki mayat Isa.

²Pagi-pagi nihan waktu matarani terbit, waktu rani mula-mula minggu ano, tian mik kuboran.

³Di tengah renglaya tian cawa peperda tian, “Sapa sai dapok nulung ram ngegiserko batu penyalok lubang kubor?” Mani batu ano balak nihan. Kidang sesampaini di dudi tian ngeliak batu udi radu teguling.

⁵Raduni tian kuruk mik delom kuboran udi. Di delomni di kebelah kanan, tian ngeliak sai jelma ngura makai jubah handak sedang mejong, rik tian tekejut.

⁶Ulun ngura udi cawa, “Dang rabai! Nyak pandai keti nyepok Isa ulun Nazaret sai radu disalibko. Ia mak ngedok di dija. Ia radu bangkit! Liak gaoh, inji rang tian medomko Ia.

⁷ Tano mikdo, sampaiko kabar inji jama jelma-jelma sai nutuk Ia, termasuk Petrus. Ucakko, ‘Ia mik ngehena keti mik Galilea. Di disan keti haga ngeliak Ia, injuk sai radu diucakko-Ni jama keti.’ ”

⁸Maka tian luah jak kuboran udi raduni tegar mani tekejut rik rabai. Tian mak ngucakko api-api jama sapa pun, mani rabai. [

⁹Radu jak Isa bangkit jak mati, pagi-pagi waktu rani Minggu, Ia mula-mula ngeliakko diri jama Maria Magdalena. (Jak Maria ano pernah Isa ngeluahko pitu ruh jahat.)

¹⁰Maka Maria Magdalena mik ngeni pandai kejadian ano jama kantik-kantik Isa, sai sedang bekabung rik miwang.

¹¹Kidang waktu tian ngedengi bahwa Isa hurik, rik bahwa Maria radu ngeliak Ia tian mak percaya.

¹²Radu jak seno Isa ngeliakko diri jama rua jelma sai nutuk Ia jama cara sai bareh. Ano tejadi waktu kerua ulun udi sedang lapah mik sai pekon.

¹³Jadi tian muloh rik ngeni pandai hal udi jama sai bareh-barehni. Kidang tian mak percaya.

¹⁴Akherni, Isa ngeliakko diri jama kesebelas jelma sai nutuk Ia, waktu tian sedang mengan. Ia negor tian mani tian kurang iman rik terlalu keras ulu sehingga mak percaya jama ulun-ulun sai radu ngeliak tenggalan bahwa Isa hurik.

¹⁵ Raduni Isa cawa jama tian, “Mikdo mik sunyinni dunia rik siarko Kabar Betik jak Allah udi jama sunyinni umat manusia.

¹⁶Ulun sai mak percaya haga dihukum. Kidang ulun sai percaya rik dibaptis, haga selamat.

¹⁷Sebagai bukti bahwa tian percaya, ulun-ulun udi haga nguser ruh jahat atas gelar-Ku; tian haga cawa delom bahasa-bahasa sai mak tian kenal.

¹⁸Kik tian nyating ulai atau nginum racun, tian mak haga dapok celaka. Kik tian ngepikko culuk di atas ulun-ulun sai meruyuh, ulun udi haga munyai.”

¹⁹ Radu jak Tuhan Isa cawa jama tian, Ia diiwak mik surga. Di disan Ia memerintah jejama jama Allah.

²⁰Maka jelma-jelma sai nutuk Ia mik rik nyebarko kabar jak Allah mik dipa-dipa. Rik Tuhan pun turut bekerja jejama jama tian rik ngebuktiko liwat keajaiban-keajaiban bahwa kabar tian benor.] [ AKHER NASKAH KUNO SAI BAREH Bebai-bebai udi mik jama Petrus rik kantik-kantikni, raduni nyeritako singkat sunyin sai radu dikeni pandai jama tian ulih ulun ngura udi. Radu jak seno, Isa tenggalan liwat jelma-jelma sai nutuk Ia ngabarko jak timur mik barat sai suci rik abadi mengenai keselamatan sai kekal.]