Read Lampung Api MARKUS 4 Bible Online

MARKUS 4 - Lampung Api bible

MARKUS 4

¹ Isa ngajar luot di pantai Danau Galilea. Lamon nihan jelma ngerumuni Ia. Ulihni seno Ia mik mejong di delom sai jukung di atas way, rik jelma lamon udi cecok di pingger danau.

²Raduni Isa ngajar lamon hal jama tian jama makai perumpamaan. Injuk rejido Ia ngajar tian.

³“Dengiko! Wat sai petani mik nabor benih.

⁴Waktu ia sedang nabor, wat benih sai gugor di renglaya. Raduni burung ratong rik benih udi dikanik sampai bela.

⁵Wat juga sai gugor di rang bebatu-batu sai tanohni cutik. Benih-benih udi geluk tuoh mani kurang tanoh,

⁶kidang waktu matarani cakak, tunas-tunas udi mulai layu raduni menyangu rik mati mani bakakni mak kuruk merelam.

⁷Wat muneh benih sai gugor di tengah semak keruwi. Semak keruwi udi tuoh rik ngehimpit tunas-tunas udi sehingga mak bebuah.

⁸Kidang wat muneh benih sai gugor di tanoh sai subor. Benih udi tuoh, raduni jadi balak raduni bebuah, wat sai telu puluh, wat sai enam puluh, rik wat sai seratus kali lipat.”

⁹Seraduni nyeritako perumpamaan udi, Isa cawa, “Keti ngedok cuping, dengiko!”

¹⁰Waktu Isa tenggalan, ulun-ulun sai radu ngedengi ajaran-Ni ratong jama Ia jejama jama kerua belas jelma sai nutuk Ia. Tian ngilu Ia nerangko retini perumpamaan ano.

¹¹Maka Isa cawa jama tian, “Keti radu dikeni anugerah untuk nyepok pandai rahasia tentang injuk repa Allah memerintah. Kidang ulun-ulun luah terus diajar jama perumpamaan,

¹² in ‘Tian haga terus memperhatiko kidang mak pandai api sai tejadi, tian haga terus ngedengi, kidang mak ngerti, inji tejadi in tian dang ngeliak rik ngerti rik dang ratong jama Allah rik Allah ngampuni tian.’ ”

¹³Kak raduni Isa cawa jama tian, “Kik keti mak ngerti perumpamaan udi, repa keti dapok ngerti perumpamaan-perumpamaan sai bareh?

¹⁴Penabor udi yakdo jelma sai nyiarko kabar jak Allah.

¹⁵Benih sai gugor di renglaya ibarat jelma-jelma sai ngedengi kabar tentang injuk repa Allah memerintah. Reno ngedengi, iblis ratong rik ngakuk api sai radu ditabor delom hati tian.

¹⁶Benih sai gugor di rang bebatu-batu ibarat jelma-jelma sai ngedengi kabar ano, rik langsung nerimani jama senang hati.

¹⁷Kidang kabar udi mak bebakak delom hati tian, sehingga mak tahan saka. Reno tian menderita kesusahan atau penganiayaan ulihni kabar ano, langsung tian murtad.

¹⁸Benih sai gugor di tengah semak keruwi udi ibarat jelma-jelma sai ngedengi kabar udi,

¹⁹kidang khuater tentang hurik tian rik mirak hurik mewah. Nafsu untuk bebagai hal hurik kuruk delom hati tian. Ulihni seno kabar jak Allah tehimpit di delom hati tian, sehingga mak bebuah.

²⁰Rik benih sai gugor di tanoh sai subor ano, ibarat jelma-jelma sai ngedengi kabar ano rik nerimani, tian bebuah lamon, wat sai telu puluh, wat sai enam puluh, rik wat sai seratus kali lipat hasilni.”

²¹ Radu jak seno Isa cawa muneh, “Pernah kedo ulun nyalako lampu raduni nyalokni jama runcung, atau ngepikko di debah rang pedom? Api ia mak ngepikko lampu udi di cukut lampu?

²² Mak ngedok sai tesegok sai mak haga keliakan; rik mak ngedok sai dirahasiako sai mak haga dibungkar.

²³Ulihni seno, kik ngedok cuping, dengiko!”

²⁴ Raduni Isa cawa luot, “Perhatikodo api sai keti dengi inji! Ukoran sai keti pakai untuk ulun bareh haga dipakai juga ulih Allah untuk keti — rik bahkan lebih lamon lagi.

²⁵ Mani jelma sai radu ngedok, haga dikeni lebih lamon lagi; kidang jelma sai mak ngedok, cutik sai masih wat jama ia haga diakuk juga.”

²⁶Isa nerusko cawa-Ni lagi, “Kik Allah memerintah sebagai Raja, keadaanni dapok diumpamako injuk sai jelma sai nabor benih di kebunni.

²⁷Bingi rani ia pedom; di rani ia minjak. Rik sementara udi benih-benih udi tuoh rik jadi balak. Kidang repa carani benih-benih seno tuoh rik jadi balak, jelma udi mak pandai.

²⁸Tanoh udido kak raduni ngeluahko hasil: mula-mula tangkaini, raduni bulirni, raduni uahni.

²⁹ Rik kik gandum udi radu mesak, ulun udi pun mulai nyabit mani radu waktuni untuk ngegetas.”

³⁰“Kik Allah memerintah, jama api ram dapok ngebandingkoni?” tanya Isa muneh. “Cuntoh api sai dapok ram pakai untuk nerangkoni?

³¹Kik Allah memerintah, keadaanni injuk perumpamaan inji: Sebiji sawi diakuk sai jelma raduni ditanom di tanoh. Biji sawi yakdo benih sai paling lunik di dunia.

³²Kidang kik radu tuoh, ia jadi sai paling balak di hantara tanoman-tanoman. Cabang-cabangni hindam nihan sehingga burung-burung dapok ratong, rik nyani sarang di debah naunganni.”

³³Injuk renodo Isa ngajar jelma jama ngegunako lamon perumpamaan injuk udi, sejaoh tian dapok ngerti.

³⁴Isa selalu makai perumpamaan kik Ia ngajar ulun-ulun udi. Kidang kik Ia tenggalan jama jelma-jelma sai nutuk Ia, Ia ngejelasko sunyinni jama tian.

³⁵Waktu dibi rani seno juga, Isa cawa jama jelma-jelma sai nutuk Ia, “Ijado ram belayar mik seberang danau.”

³⁶Maka Isa cakak mik jukung, rik jelma-jelma sai nutuk Ia ninggalko ulun lamon di pingger danau, raduni cakak mik jukung sai gegoh. Jukung-jukung sai bareh wat juga di dudi. Raduni Isa rik jelma-jelma sai nutuk Ia mulai belayar.

³⁷Mak mesaka jak seno ratong angin ribut. Umbak mulai mukul jukung rik kuruk mik delom sehingga jukung udi hamper latap jama way.

³⁸Di buritan jukung udi, Isa sedang pedom jama ulu-Ni di atas bantal. Jelma-jelma sai nutuk Ia minjakko Ia. Tian cawa, “Bapak Guru, api Bapak mak peduli, ram celaka?”

³⁹Isa minjak, raduni ngebentak angin udi, rik cawa jama danau, “Hema, tenangdo!” Angin pun reda, rik danau jadi tenang nihan.

⁴⁰Raduni Isa cawa jama jelma-jelma sai nutuk Ia, “Mengapi keti rabai? Mengapi keti mak percaya jama Nyak?”

⁴¹Maka tian jadi rabai rik cawa peperda tian, “Sapa sebenorni jelma inji, sampai angin pun taat jama Ia.”