Read Lampung Api MARKUS 5 Bible Online

MARKUS 5 - Lampung Api bible

MARKUS 5

¹Kak raduni Isa rik jelma-jelma sai nutuk Ia sampai di seberang Danau Galilea, di daerah Gerasa.

²Reno Isa regah jak jukung, Ia diratongi sai jelma bakas sai luah jak guha-guha kuboran.

³Jelma udi dikuasai ruh jahat rik tinggal di kuboran-kuboran. Ia radu mak dapok diikok lagi; walaupun jama rantai.

⁴Radu risok cukut rik culukni dibelenggu, kidang selalu rantai-rantai udi diputuskoni, rik besi dicukutni dipatahkoni. Ia kuat nihan sehingga mak sai jelma pun dapok nahanni.

⁵Di rani di bingi ia bekeliaran di kuboran rik di bukit-bukit, sambil mekik-mekik rik ngatanko badanni jama batu.

⁶Waktu jak jaoh ia ngeliak Isa ratong, ia tegar-tegar raduni sujud di hadap Isa.

⁷Jama suara sai keras ia mekik, “Isa, Anak Allah Sai Mahatinggi! Haga Niku apiko nyak inji? Demi Allah, nyak ngilu, dang nyiksa nyak!” (

⁸Jelma udi cawa injuk reno mani Isa cawa jama ia, “Ruh jahat, luahdo jak jelma inji!”)

⁹Raduni Isa betanya jama ia, “Sapa gelarmu?” Jelma udi ngejawab, “Gelarku ‘Legiun’ — mani sekam inji lamon nihan!”

¹⁰Berulang kali ia ngilu nihan in Isa dang ngayun ruh-ruh jahat udi luah jak daerah udi.

¹¹Redik rang udi wat lamon nihan babui sai sedang nyepok kanikan di lireng bukit.

¹²Ruh-ruh jahat udi ngilu jama Isa, “Kayundo sekam kuruk mik delom babui-babui udi.”

¹³Rik Isa setuju. Jadi, ruh-ruh jahat udi luah jak ulun udi raduni kuruk mik delom babui-babui udi. Sunyinni rombongan babui udi tegar rik terjun jak pingger rulah mik delom danau raduni tebenam — sunyinni kira-kira rua ribu babui.

¹⁴Penjaga-penjaga babui udi tegar, rik nyiarko kabar udi di kota rik di pekon sekitarni. Raduni ulun-ulun luah untuk ngeliak api sai radu tejadi.

¹⁵Tian ratong jama Isa, raduni ngeliak jelma sai jenoni kekurukan ruh jahat udi, lagi mejong di dudi. Ia radu bekawai, rik pikeranni juga radu waras. Maka tian sunyinni jadi rabai.

¹⁶Ulun-ulun sai radu nyaksiko tenggalan kejadian tentang ulun udi rik babui-babui udi nyeritako api sai radu tejadi.

¹⁷Raduni penduduk daerah udi ngilu in Isa ninggalko daerah ano.

¹⁸Waktu Isa cakak mik delom jukung, jelma sai jenoni dikuasai ruh jahat udi ngilu jama Isa, in ngasi nutuk.

¹⁹Kidang Isa mak setuju, cawa-Ni, “Mulangdo rik keni pandai jama puari-puarimu api sai radu dilakuko Tuhan untuk niku rik hara betikni Ia jama niku!”

²⁰Jelma udi pun mik, rik mulai nyeritako di daerah Puluh Kota api sai radu disani Isa jama ia. Sunyinni ulun hiran ngedengini.

²¹Isa muloh luot mik seberang danau. Di pingger danau udi, lamon ulun ratong bekerumun di sekeliling Isa.

²²Ratongdo sai jelma gelarni Yairus. Ia ano jelma sai mimpin lamban ibadah di kota ano. Waktu ia ngeliak Isa, ia sujud di hadap-Ni,

²³rik ngilu nihan, “Pak, anak bebaiku parah ruyuhni. Tulung pai ratong untuk nyating, in ia munyai rik dang mati!”

²⁴Maka Isa pun mik jama-jama Yairus. Lamon jelma nutuk Ia rik ngedesak-Ni jak sunyin jurusan.

²⁵Di hantarani wat muneh sai bebai sai radu rua belas tahun ngeluahko ruah sai behubungan jama mekamakni.

²⁶Sunyinni hartani radu bela dipakai untuk ngebayar dokter-dokter, kidang mak ngedok sai dapok ngunyaikoni, malahan penyakikni terus tambah parah.

²⁷Bebai udi radu ngedengi lamon tentang Isa. Maka di tengah-tengah ulun lamon udi, ia ngeredik Isa jak kudan,

²⁸mani ia bepiker, “Asal gaoh nyak nilut jubah-Ni, nyak haga munyai!”

²⁹Ia nilut jubah Isa, rik waktu seno juga mekamakni taru. Ia ngerasa bahwa ia radu munyai.

³⁰Pada waktu seno juga Isa ngerasa bahwa wat kekuatan sai luah jak diri-Ni. Maka Ia ngerilong jama ulun lamon udi rik betanya, “Sapa sai nilut jubah-Ku?”

³¹Jelma-jelma sai nutuk Ia cawa, “Bapak liak tenggalan wat reno lamon jelma sai bedesak-desakan. Rik Bapak masih betanya, sapa sai nilut Bapak?”

³²Kidang Isa terus gaoh ngeliak di sekeliling-Ni untuk nyepok jelma sai nilut-Ni.

³³Bebai udi sai pandai api sai radu tejadi jama dirini, jama gegoran rik kerabaian sujud di hadap Isa rik ngakui sunyinni.

³⁴Raduni Isa cawa jama bebai udi, “Anak-Ku, mani niku percaya jama Nyak, niku munyai! Mikdo rik selamat. Niku radu sihat sama sekali.”

³⁵Sementara Isa masih cawa, pira-pira pesuruh ratong jak lambanni Yairus. “Anak bebai Tuan radu mati,” ani tian jama Yairus. “Dang hak Tuan nyusahko Bapak Guru lagi.”

³⁶Tanpa mempeduliko api sai dicawako ulun-ulun udi, Isa cawa jama Yairus, “Dang rabai, percaya gaoh!”

³⁷Raduni Isa lapah terus, kidang Ia mak ngizinko sai jelma pun nutuk Ia, kecuali Petrus rik Yakobus rik Yohanes sang muari.

³⁸Waktu tian sampai di lamban Yairus, Isa ngeliak keadaan hiruk-pikuk, rik ngedengi hiwangan rik bebatui sai keras.

³⁹Raduni Isa kuruk rik cawa jama tian, “Mengapi ribut-ribut rik miwang? Sanak udi mak mati; ia angkah pedom!”

⁴⁰Tian ngelalangko Isa. Maka Ia ngayun tian sunyinni luah. Raduni Ia ngusung emak bak sanak udi rik ketelu jelma sai nutuk Ia kuruk mik delom kamar anak udi.

⁴¹Isa nyating culuk sanak udi, raduni cawa jama ia, “Talita kum,” sai retini, “Anak bebai, Nyak cawa jama niku: minjak!”

⁴²Sanak muli udi geluk minjak, rik lapah. (Umorni radu rua belas tahun.) Sunyinni sai nyaksiko kejadian ano kagum nihan!

⁴³Kidang Isa cawa jama keras ngelarang tian ngeni pandai hal udi jama sapa pun. Raduni cawa-Ni, “Keniko sanak udi mengan.”