Read Lampung Api MARKUS 8 Bible Online

MARKUS 8 - Lampung Api bible

MARKUS 8

¹Mak mesaka jak seno, wat lagi sekelompok ulun lamon bekumpul. Mani tian mak ngedok kanikan, Isa ngurau jelma-jelma sai nutuk Ia rik cawa,

²“Nyak kesian jama ulun lamon inji. Radu telu rani sakani tian jama-jama Nyak, rik tano tian mak ngedok kanikan.

³Kik Nyak ngayun tian mulang jama tenai bangkang, tian haga pangsan di tengah renglaya. Apilagi di hantara tian wat sai ratong jak jaoh.”

⁴Jelma-jelma sai nutuk Isa ngejawab, “Di rang sai tepencil inji, di dipa ulun dapok mansa cukup kanikan untuk sunyinni jelma inji?”

⁵“Wat pira ruti jama keti?” tanya Isa. “Pitu,” jawab tian.

⁶Maka Isa ngayun ulun lamon udi mejong di atas tanoh, raduni Ia ngakuk kepitu ruti udi rik ngucap syukor jama Allah. Raduni Ia ngebelah-belah ruti ano jama culuk-Ni rik ngeniko jama jelma-jelma sai nutuk Ia untuk dibagi-bagiko jama ulun-ulun. Maka jelma-jelma sai nutuk Ia ngelakukoni.

⁷Tian ngedok pira-pira iwa lunik juga. Isa ngucap syukor jama Allah atas iwa-iwa udi, raduni ngayun jelma-jelma sai nutuk Ia ngebagi-bagiko iwa-iwa udi juga.

⁸Tian mengan sampai betong — wat kira-kira epak ribu jelma sai mengan. Kak raduni jelma-jelma sai nutuk Isa ngumpulko kelebihan kanikan — pitu bakul latap. Raduni Isa ngayun ulun-ulun udi mulang,

¹⁰rik Ia jama jelma-jelma sai nutuk Ia langsung cakak mik jukung rik mik ke daerah Dalmanuta.

¹¹ Pira-pira ulun Farisi ratong jama Isa, rik mulai bedebat jama Ia untuk ngejebak Ia. Tian ngilu Isa nyani keajaiban sebagai tanda bahwa Ia ratong jak Allah.

¹² Isa ngeluh raduni ngejawab, “Api sebabni ulun-ulun zaman inji ngilu Nyak nyani keajaiban? Mawat! Nyak mak haga ngeniko tanda injuk reno udi jama tian!”

¹³Raduni Isa ninggalko tian, rik kuruk mik delom jukung; raduni berangkat mik seberang danau udi.

¹⁴Jelma-jelma sai nutuk Isa lupa ngusung cukup ruti. Tian angkah ngedok sai ruti di jukung.

¹⁵ “Hati-hatido tehadap ragi ulun-ulun Farisi rik ragi Herodes,” ani Isa jama tian.

¹⁶Maka jelma-jelma sai nutuk Isa udi mulai ngicikko hal ano. Tian cawa, “Ia cawa injuk reno, mani neram mak ngedok ruti.”

¹⁷Isa pandai api sai tian persoalko. Ulihni seno Ia betanya jama tian, “Mengapi keti mempersoalko tentang mak ngedok ruti? Api keti mak pandai rik makkung ngerti juga? Reno kedo kudulni pikeranmu?

¹⁸ Keti ngedok mata — mengapi mak ngeliak? Keti ngedok cuping — mengapi mak ngedengi? Api keti mak ingok

¹⁹tentang lima ruti udi sai Kubelah-belah untuk lima ribu jelma? Pira bakul kelebihan kanikan sai keti kumpulko?” “Rua belas,” jawab tian.

²⁰“Rik waktu Nyak ngebelah-belah pitu ruti untuk epak ribu jelma,” tanya Isa luot, “pira bakul kelebihan kanikan sai keti kumpulko?” “Pitu,” jawab tian.

²¹“Nah, makkung kedo keti ngerti juga?” ani Isa luot.

²²Tian sampai di Betsaida. Di dudi ulun ngusung sai jelma buta jama Isa, rik ngilu in Ia ngejamah ulun buta udi untuk ngunyaikoni.

²³Maka Isa nyating culuk ulun buta udi rik nuntun ia mik luah kota ano. Kak raduni Isa ngelui mata ulun udi. Ia ngepikko culuk-Ni mik mata jelma udi, raduni betanya jama ia, “Dapok kedo niku ngeliak sai hal tano?”

²⁴Ulun udi ngeliak mik hadap, raduni cawa, “Ya. Nyak ngeliak ulun lapah-lapah; kidang tian keliakan injuk batang.”

²⁵Isa ngepikko luot culuk-Ni di mata ulun udi. Sekali inji ulun udi berusaha ngeliak sedapok-dapokni. Matani munyai, rik ia ngeliak sunyinni jama jelas nihan.

²⁶Raduni Isa cawa jama ia, “Mulangdo, rik dang muloh mik kota udi.”

²⁷Isa rik jelma-jelma sai nutuk Ia mik di pekon-pekon di sekitar Kaisarea Filipi. Di tengah renglaya Isa betanya jama tian, “Menurut cawani ulun, sapa Nyak inji?”

²⁸ Tian ngejawab, “Wat sai cawa: Yohanes Pembaptis; wat juga sai cawa Elia, rik sai bareh lagi cawa: salah sai nabi.”

²⁹ “Kidang menurut keti tenggalan, Nyak inji sapa?” tanya Isa. Petrus ngejawab, “Bapak yakdo Raja Penyelamat!”

³⁰Raduni Isa ngeni peringatko jama tian, in mak ngeni pandai jama sapa pun tentang diri-Ni.

³¹Radu jak seno, Isa mulai ngajar jelma-jelma sai nutuk Ia bahwa Anak Manusia musti lamon menderita, rik haga ditentang ulih jelma-jelma sai mimpin, imam-imam kepala, rik guru-guru agama. Ia haga dibunuh, kidang pada rani ketelu Ia haga dibangkitko luot.

³²Jama jelas nihan Isa ngeni pandai hal udi jama jelma-jelma sai nutuk Ia. Maka Petrus narik Isa mik geler, rik negor Ia.

³³Kidang Isa ngerilong rik ngeliak jelma-jelma sai nutuk Ia, raduni negor Petrus, “Mik jak ija, Pengguda! Pikeranmu udi pikeran manusia; lain hak pikeran Allah!”

³⁴ Kak raduni Isa ngurau ulun lamon sai wat di dudi jejama jama jelma-jelma sai nutuk Ia. Raduni Ia cawa jama tian, “Jelma sai haga nutuk Nyak, haga ngelupako kepentinganni tenggalan, kak raduni memikul salibni, rik terus nutuk Nyak.

³⁵ Mani jelma sai haga mempertahanko hurikni, haga kelebonan hurikni. Kidang jelma sai ngurbanko hurikni untuk-Ku rik untuk Kabar Betik jak Allah, haga diselamatko.

³⁶Api untungni bagi sai jelma, kik sunyinni dunia inji jadi milikni, kidang ia kelebonan hurikni?

³⁷Dapok mak hurik udi ditukor jama sai hal?

³⁸Kik sai jelma meliom ngakui Nyak rik ajaran-Ku di zaman durhaka rik jahat inji, Anak Manusia juga haga meliom ngakui ulun udi, pada waktu Ia ratong kanah jama kuasa Bapa-Ni, disertai malaikat-malaikat sai suci.”