Read Lampung Api LUKAS 1 Bible Online

LUKAS 1 - Lampung Api bible

LUKAS 1

¹Tuan Teofilus sai betik hati, Lamon jelma radu berusaha nulis sai teratur mengenai kejadian-kejadian sai radu tejadi di tengah-tengah ram.

²Tian nulis kejadian seno gegoh jama sai diceritako jama ram ulih jelma-jelma sai ngeliyak tenggalan kejadian-kejadian jak mula-mulani, radu tian nyebarko kabarni.

³Radu jak kuteliti nihan kuselidiki sunyinni jak permulaanni, nyak nganggap penting untuk nulis cerita sai teratur untuk Tuan Teofilus.

⁴Nyak ngeguwaiko seno, in Tuan pandai bahwa api sai radu diajarko jama Tuan sangun temon.

⁵ Waktu Herodes jadi Raja negeri Yudea, wat sai imam gelarni Zakharia. Ia ajo jak golongan imam-imam Abia. Inggomni gelarni Elisabet, juga keturunan imam.

⁶Rumah tanggani tian rua mekajong inji nyenangko hati-Ni Allah. Tian rua taat unyinni perintah rik Hukum Tuhan jama temon-temon.

⁷Tian rua mak ngedok anak mani Elisabet mandul rik tian rua radu metuha.

⁸Suatu rani, waktu golongan Abia dapok gileran, Zakharia ngejalanko tugas sebagai imam di hadap Allah.

⁹Liwat lotre, sai biasani diguaiko ulih imam-imam, Zakharia dipilih untuk kuruk mik Lamban Ibadah rik masang kemiyan.

¹⁰Selagi acara masang kemiyan, jelma-jelma bareh bedua diluar.

¹¹Waktu senodo malaikat Tuhan ratong jama Zakharia. Malaikat ajo cecok di kebelah kanan mija rang masang kemiyan.

¹²Waktu Zakharia ngeliak malaikat ano, ia bingung rik merabai.

¹³Kidangni malaikat ano cawa, “Dang rabai, Zakharia! Allah radu ngedengi duamu. Kajongmu Elisabet haga ngelaherko sai anak bakas. Niku haga ngeni gelarni Yohanes jama anakmu ano.

¹⁴Niku jadi riang nihan rik ulun bareh reno muneh kik sanak seno laher kanah!

¹⁵ Ia haga jadi jelma balak menurut pandangan Tuhan, rik ia mawat nginum anggor atau inuman keras. Jak laher ia radu dikuasai Ruh Allah.

¹⁶Lamon bangsa Israel haga dibimbingni, ratong jama Allah, Tuhan tian.

¹⁷ Ia haga jadi utusan Tuhan sai kuat rik bekuasa injuk nabi Elia. Ia haga ngedamaiko bapak jama anak, rik jelma sai mak taat haga dipimpinni muloh mik jalan pikeran sai benor. Unyinni seno ia haga nyiapko suatu umat sai radu siap untuk Tuhan.”

¹⁸“Repa carani in nyak pandai bahwa hal seno haga tejadi?” ani Zakharia jama malaikat ano. “Nyak radu metuha, rik inggomku juga radu metuha muneh.”

¹⁹ Malaikat ano ngejawab, “Nyak ajo Gibril. Nyak ngelayani Allah rik Ia sai ngayunko nyak nyampaiko kabar betik inji jama niku.

²⁰Api sai kucawako jama niku, haga tejadi tepat pada waktuni. Kidang mani niku mawat percaya jama cawaku, niku kanah mak dapok cawa, niku haga bisu sampai api sai radu kucawako jama niku tejadi.”

²¹Sementara seno, ulun-ulun terus nunggu Zakharia. Tian hiran mengapi ia saka nihan delom Lamban Ibadah.

²²Waktu Zakharia luah, ia mak dapok cawa jama tian. Ia terus gaoh ngeni isyarat makai culukni, rik tetap bisu. Maka jelma-jelma sai bareh pandai kik ia radu ngeliak suatu pengliakan delom Lamban Ibadah.

²³Radu bela tugasni di Lamban Ibadah, Zakharia mulang mik lambanni.

²⁴Mak mesaka jak seno, kajongni Elisabet ngandung, ia mak luah-luah jak lambanni selama lima bulan.

²⁵Cawani, “Akherni Tuhan nulung nyak rik ngehapusko aibku.”

²⁶Waktu Elisabet radu ngandung enam bulan, Allah ngayun malaikat Gibril mik kota Nazaret, di daerah Galilea.

²⁷ Malaikat Gibril diutus mik jama Maria sai masih muli. Muli inji radu betunangan jama meranai gelarni Yusuf, keturunan Raja Daud.

²⁸Malaikat ratong jama Maria rik cawa, “Salam, niku sai diberkati Tuhan secara istimewa! Tuhan selalu jama niku!”

²⁹Ngedengi cawa malaikat seno Maria tekanjat, sehingga betanya-tanya delom hatini api maksud salam seno.

³⁰Malaikat cawa jama ia, “Dang rabai, Maria, mani niku bekenan di hati Allah.

³¹ Niku haga ngandung rik ngelaherko anak, sai musti dikeni gelar Isa.

³² Ia haga jadi agung rik disebut Anak Allah Sai Mahatinggi. Tuhan Allah haga ngejadiko Ia raja, injuk Raja Daud, nenek muyangni.

³³Ia haga memerintah injuk raja atas keturunan Yakub selama-lamani. Kerajaan-Ni mak pernah berakher.”

³⁴“Kidangni, nyak masih muli,” cawa Maria jama malaikat ano, “repa cara hal seno dapok tejadi?”

³⁵Malaikat ano ngejawab, “Ruh Allah haga ratong jama niku, rik kuasa Allah haga nyalok niku. Reno sebabni sanak sai haga laher kanah disebut Kudus, Anak Allah.

³⁶Ingok: Elisabet, puarimu ano radu ngandung enam bulan, walaupun ia radu metuha rik ulun ngucakko ia mandul.

³⁷ Mani untuk Tuhan mak ngedok sai mustahil.”

³⁸Kak raduni Maria cawa, “Nyak inji hamba Tuhan; api sai tejadi jama nyakku injuk sai dicawako.” Kak raduni malaikat ano lijung ninggalko Maria.

³⁹Radu jak seno, Maria mik di sai kota di Yudea di daerah pegunungan.

⁴⁰Ia mik lambanni Zakharia, waktu ia kuruk, ia ngeni salam jama Elisabet.

⁴¹Waktu Elisabet ngedengi salam Maria, anak sai delom kandungan Elisabet begerak. Kak raduni Elisabet dikuasai Ruh Allah,

⁴²cawani, “Nikudo sai paling diberkati jak unyinni bebai! Diberkatido sanak sai haga laher ulihmu!

⁴³Sapa nyak ajo hingga emakni Tuhan haga ratong jama nyak?

⁴⁴Waktu nyak ngedengi salammu, anak sai delom kandunganku begerak keriangan.

⁴⁵Bebahagiado niku, mani percaya bahwa api sai diucakko Tuhan jama niku pasti tejadi!”

⁴⁶ Maria cawa, “Hatiku memuji Tuhan,

⁴⁷rik jiwaku riang nihan mani Allah nyelamatko nyak.

⁴⁸ Ia ingok jama nyak, umat-Ni sai hina! Jak tano unyinni bangsa ngucakko nyak bahagia.

⁴⁹Mani Allah sai Mahakuasa ngeguaiko hal-hal sai balak jama nyakku. Sucido gelar-Ni.

⁵⁰Sunyinni keturunan Tuhan nyurahko rasa kesian jama jelma sai rabai jama Tuhan.

⁵¹Jama culuk-Ni sai perkasa Ia misahko jelma sai mepungah, rik ngacauko rencana tian.

⁵² Raja-raja diregahko jak takhtani rik ulun hina dilanggarko ulihni.

⁵³Jelma sai mebetoh dipuasko-Ni, jama unyinni kebaikan, sai jelma batin diuser jama bangkang gaoh.

⁵⁴Ia nulung bangsa Israel hamba-Ni, nurut janji sai disani-Ni jama nenek muyang neram.

⁵⁵ Tuhan ingok jama janji-Ni, Ia murah hati jama Abraham rik keturunanni selama-lamani.”

⁵⁶Kekira telu bulan sakani Maria tinggal jama Elisabet, ampai ia mulang mik lambanni.

⁵⁷Sampaido waktuni Elisabet ngelaherko. Ia ngelaherko anak bakas.

⁵⁸Tetangga-tetanggani rik puari-puarini ngedengi hara betik-Ni Tuhan jama Elisabet, rik tian pun nutuk riang muneh jama ia.

⁵⁹ Waktu upi ano umor walu rani, tian ratong haga nyunatko ia. Tian haga ngeni gelarni Zakharia gegoh gelarni bakni,

⁶⁰kidang emakni cawa, “Mak ngasi! Ia musti dikeni gelar Yohanes.”

⁶¹“Mak ngedok sai jelma pun jak puari-puarimu gelar injuk reno,” ani tian jama ia.

⁶²Jama bahasa isyarat, tian betanya jama Zakharia sapa gelarni sai haga dikeniko jama anakni.

⁶³Zakharia ngilu batu rang nulis kak raduni ia nulis, “Gelarni Yohanes.” Tian unyinni hiran.

⁶⁴Waktu senodo Zakharia dapok cawa lagi terus ia memuji Allah.

⁶⁵Unyinni tetangga-tetangga merabai, rik kabar seno nyebar mik unyinni daerah pegunungan Yudea.

⁶⁶Sunyinni jelma sai ngedengi hal seno betanya delom hati, “Haga jadi api sanak seno kanah?” Mani Tuhan jejama jama Ia.

⁶⁷Zakharia, bakni sanak seno, dikuasai ulih-Ni Ruh Allah, hingga ia nyampaiko luhot jak Tuhan, cawani,

⁶⁸“Ija ram memuji Tuhan, Allah bangsa Israel! Ia radu ratong nulung umat-Ni rik ngebebasko tian.

⁶⁹Ia ngeni neram penyelamat sai perkasa, keturunan Daud, hamba-Ni.

⁷⁰Tumbai perantaraan nabi-nabi pilihan-Ni, Tuhan radu ngeni janji-Ni

⁷¹untuk nyelamatko neram jak lawan neram rik jak kuasa jelma-jelma sai nyuohko neram.

⁷²Untuk nunjukko kemurahan hati-Ni jama nenek muyang neram, janji-Ni sai suci haga ditepati-Ni.

⁷³Ia besumpah jama Abraham nenek muyang neram, rik bejanji untuk nyelamatko neram jak lawan in neram, mak lagi merabai ngelayani Ia

⁷⁴

⁷⁵terus ngabdi jama Ia rik nyenangko hati-Ni seumor hurik neram.

⁷⁶ Niku, hai anak-Ku, kanah disebut nabi Allah Sai Mahatinggi. Niku diutus mena jak Tuhan ngelurusko jalan bagi-Ni,

⁷⁷untuk ngabarko jama umat-Ni bahwa tian haga diselamatko, kik Allah radu ngampuni dusa-dusa tian.

⁷⁸Tuhan neram murah hati rik penyayang; untuk nyelamatko neram Ia ratong. Injuk matarani timbul di pagi rani,

⁷⁹ injuk renodo Ia ngeniko terang-Ni jama unyinni jelma sai hurik delom kekelaman rik kerabaian. Ia nuntun neram di renglaya nuju kedamaian.”

⁸⁰Anakni Zakharia ano tambah balak rik tambah kuat ruhni. Ia tinggal di padang gurun, sampai ratong waktuni ngeliakko dirini jama bangsa Israel.