Read Lampung Api LUKAS 10 Bible Online

LUKAS 10 - Lampung Api bible

LUKAS 10

¹Radu jak seno, Tuhan milih pitu puluh jelma sai nutuk luot, Ia ngutus tian rua-rua mik mena jak Ia mik unggal kota rik rang sai haga ditapol-Ni.

² “Hasil sai haga digetas lamon,” cawa-Ni jama tian, “kidangni tenaga untuk nuaini angkah cutik. Makani, ngilu jama sai Kedau kebun in Ia ngirim tenaga untuk nuai tanoman-Ni ajo.

³ Nah, mikdo keti! Nyak ngutus keti injuk biri-biri di tengah-tengah serigala.

⁴ Dang ngusung dumpet, uncang, atau sepatu. Dang taru di tengah-tengah renglaya untuk ngeni salam jama sapa pun.

⁵Kik keti kuruk lamban, semakkungni cawa pai, ‘Moga-moga keti sejahtera delom lamban inji.’

⁶Kik di disan wat jelma sai gering damai, salammu ano diterimani; kik mawat, tarik luot salam damaimu ano.

⁷ Tinggaldo di sai lamban gaoh. Terima gaoh api sai dihidangko tian jama keti, mani jelma sai beguai berhak nerima upahni. Dang malih-malih jak sai lamban mik lamban sai bareh.

⁸Kik keti ratong mik sai kota rik keti disambut betik ulih tian, kanikdo api sai dihidangko tian jama keti.

⁹Munyaiko jelma-jelma sai meruyuh di kota ano, rik sampaiko jama jelma-jelma di disan, ‘Allah geluk haga merintah injuk Raja di tengah-tengah keti.’

¹⁰ Kidangni kik keti ratong mik sai kota, di disan keti mak diterima, luah mik renglaya rik cawako,

¹¹‘Bahkan harbuk kotamu sai ngelekok dicukut sekam, sekam kibasko sebagai peringatan jama keti!’ Kidang perlu keti pandai bahwa radu redik waktuni Allah mulai merintah sebagai Raja di tengah-tengah keti!

¹² Ingok, waktu Rani Kiamat, jelma Sodom lebih mudah diampuni Allah jak jelma kota inji!”

¹³ “Celakado niku, Korazim! Celakado niku, Betsaida! Kik keajaiban-keajaiban sai kusani di tengah-tengah keti ano radu kusani juga di kota Tirus rik Sidon, pasti jelma-jelma sai di dudi radu saka betubat jak dusa-dusani, tian radu makai kawai bekabung rik ngepikko hambua di atas uluni tian.

¹⁴Waktu Rani Kiamat, jelma Tirus rik Sidon lebih mudah diampuni Allah jak niku.

¹⁵ Rik niku, Kapernaum! Sangkomu, niku haga dilanggarko sampai mik surga? Mawat! Malah niku haga ditokko mik neraka!”

¹⁶ Isa cawa jama jelma-jelma sai nutuk Ia, “Jelma sai ngedengiko keti, juga ngedengiko Nyak. Jelma sai nulak keti, juga nulak Nyak. Rik jelma sai nulak Nyak, juga nulak Ia sai ngutus Nyak.”

¹⁷Pitu puluh jelma sai nutuk udi, muloh luot jama riang nihan. “Tuhan,” cawani tian, “ruh-ruh jahat pun taat jama sekam kik sekam memerintah tian atas gelar Tuhan!”

¹⁸Isa ngejawab, “Nyak ngeliak iblis gugor jak langit injuk kilat.

¹⁹ In keti pandai! Keti radu Kukeni kuasa in keti dapok ngilikko ulai rik kala rik matohko unyinni kekuatan musuh, tanpa wat api pun sai dapok ngecelakako keti.

²⁰Walaupun injuk reno dang hak keti riang mani ruh-ruh jahat taat jama keti. Lebih baik keti riang mani gelarmu dicatat di surga.”

²¹Waktu senodo, Isa riang mani dikuasai Ruh Allah. Isa cawa, “Bapak, Tuhan sai nguasai langit rik bumi! Nyak ngucapko terima kasih jama Tuhan mani unyinni Tuhan rahasiako jak ulun-ulun sai pintar rik beilmu, kidang Tuhan tunjukko jama jelma-jelma sai mak sekula. Senodo sai nyenangko hati Bapak.

²² Sunyinni radu diserahko Bapa jama Nyak. Mak ngedok sai jelma pun kenal Anak, selain Bapa. Mak ngedok juga sai kenal Bapa selain Anak; rik jelma-jelma sai ngenal Bapa mani Anak kanah haga memperkenalko jama tian.”

²³Kak raduni Isa ngerilong jama jelma-jelma sai nutuk Ia, cawa jama tian gaoh, “Beruntungdo keti mani radu ngeliak sai keti liak tano.

²⁴Mani ingokdo: Lamon nabi rik raja mirak ngeliak sai keti liak tano inji kidang tian mak ngeliakni. Tian haga ngedengi sai keti dengi tano, kidang tian mak ngedengi.”

²⁵ Kak raduni sai guru agama ratong untuk ngejebak Isa. Ia betanya, “Bapak Guru, nyak haga bebuat api in dapok nerima hurik sejati rik kekal?”

²⁶Isa ngejawab, “Api sai ditulis di Alkitab? Repa pendapatmu tentang hal seno?”

²⁷ Jelma udi ngejawab, “ ‘Cintaido Tuhan Allahmu jama sepenuh hatimu, rik segenap jiwamu, jama sunyinni tenagamu, rik seluruh pikeranmu,’ rik ‘Cintaido peperdamu injuk niku mencintai dirimu tenggalan.’ ”

²⁸ “Jawabanmu ano temon,” ani Isa. “Guaiko seno, in niku hurik.”

²⁹Kidang guru agama udi haga ngebenorko dirini tenggalan. Ia betanya, “Sapa sai peperdaku?”

³⁰Isa ngejawab, “Wat sai jelma bakas regah jak Yerusalem mik Yerikho. Di tengah renglaya ia diserang perampuk, dirampas sunyinni hartani, dipukul sampai setengah mati, kak raduni ditinggalko tegelitak di renglaya badanni katan-katan parah.

³¹Waktu seno wat imam liwat di renglaya seno. Waktu diliakni jelma seno, ia nyingker mik nyeberang nerusko lapahni.

³²Reno muneh jama jelma Lewi sai liwat di disan; waktu diliakni jelma seno, diredikni rik diliakni. Kidang ia pun nyingker mik seberang renglaya, nerusko lapahni.

³³ Kidang kak raduni lom jelma Samaria lagi wat lapahanni kebetulan liwat di disan. Waktu diliakni jelma seno, sedih hatini mani kesian.

³⁴Langsung diredikni jelma seno dikecahkoni katan-katanni jama anggor, diubatni jama minyak, raduni ia ngebungkus katan-katanni jelma seno. Dicakakkoni di atas keledaini tenggalan, diusungni mik penginapan rik dirawatni.

³⁵Jemohni ia ngakuk rua keping duit perak rik ngeniko jama sekedau penginapan ano rik cawa, ‘Rawatdo ia, kik wat biaya-biaya sai bareh, hagaku bayar kanah kik nyak ratong luot mik dija.’ ”

³⁶Kak raduni Isa nutup cerita ano jama pertanyaan inji, “Jak tian telu ajo, sai sapa menurut keti, sai betindak bagi peperda jak ulun sai dirampuk seno?”

³⁷Guru agama sai ditanyai ano ngejawab, “Ulun sai radu nulung jelma seno.” “Nah, mikdo, guaiko injuk reno juga!” ani Isa.

³⁸ Isa rik jelma-jelma sai nutuk Ia nerusko lapahni tian, kak raduni tian sampai di sai pekon. Di dudi wat sai bebai, gelarni Marta. Ia ngundang Isa ratong mik lambanni.

³⁹Marta wat puari bebai gelarni Maria. Maria ajo mejong redik Tuhan Isa ngedengi ajaran-ajaran-Ni.

⁴⁰Sedangko Marta sibuk jama urusan lambanni. Ia ngeratongi Isa rik cawa, “Tuhan, api Tuhan mak peduli Maria naganko nyak beguai tenggalan gaoh? Kayun ia nulung nyak!”

⁴¹“Marta, Marta!” jawab Tuhan. “Niku khuater rik sibuk mikerko inji rik seno;

⁴²padahal sai penting angkah sai. Maria radu milih sai paling betik, sai mak dapok diakuk jak ia.”