Read Lampung Api LUKAS 11 Bible Online

LUKAS 11 - Lampung Api bible

LUKAS 11

¹Suatu rani Isa bedua di sai rang. Waktu radu bedua, salah sai jak jelma-jelma sai nutuk Ia cawa, “Tuhan, cuba ajarko sekam bedua injuk Yohanes ngajarko jelma-jelma sai nutuk ia bedua.”

²Isa cawa jama tian, “Kik keti bedua ucakko injuk reji, ‘Bapa, Nikudo Allah sai Esa. Muga-muga Tuhan disumbah rik dihormati.

³Keniko unggal rani kanikan sai sekam perluko.

⁴Ampunko dusa-dusa sekam, mani sekam juga ngampuni unggal jelma sai besalah jama sekam. Rik dang naganko sekam lebon kepercayaan waktu sekam mansa pencubaan.’ ”

⁵Isa cawa jama jelma-jelma sai nutuk Ia, “Kik salah sai di hantara keti mik lambanni kantikni keti tengah bingi, rik cawa, ‘Kantik, injam pai ruti telu biji,

⁶kantikku sai delom lapahni, singgah di lambanku kebetulan nyak mak ngedok kanikan untuk ia!’

⁷Seandaini kantik sai niku ratongi ano ngejawab jak lambanni, injuk reji, ‘Dang nyusahko nyak! Rangok radu tekunci rik nyak jama anak-anakku radu pedom. Nyak mak dapok minjak rik untuk ngeni api-api jama niku.’ ”

⁸“Jadi injuk repa?” cawa Isa selanjutni, “Kuucakko, yu! Walaupun niku kantikni, ia mak haga minjak, ia mak haga ngeni api-api jama niku. Kidang mani niku mak ngerasa meliom, ngilu terus-menerus, maka ia haga minjak juga ngeni jama niku api sai diperluko.

⁹Jadi, Nyak cawa jama niku: Ngiludo, keti haga dikeni; sepokdo, keti haga dapok; ketukdo, maka rangok haga dibukak untuk keti.

¹⁰Mani jelma sai ngilu haga nerima; jelma sai nyepok haga dapok rik jelma sai ngetuk, haga dibukakko rangok.

¹¹Hantara keti ano api wat bapak ngeni ulai jama anakmu, kik ia ngilu iwa?

¹²Atau ngeniko kala, kik ia ngilu telui?

¹³Walaupun keti jahat, keti pandai juga ngeni sai betik jama anak keti. Apilagi Bapak di surga! Ia haga ngeniko Ruh-Ni jama jelma sai ngilu jama Ia!”

¹⁴Suatu rani Isa nguser ruh jahat luah jak jelma bisu. Waktu ruh jahat ano luah, jelma seno mulai dapok cawa. Lamon jelma hiran,

¹⁵ kidang wat jelma sai cawa, “Ia dapok nguser ruh jahat mani kuasani Beelzebul, jelma sai mimpin ruh jahat udi.”

¹⁶ Wat juga ulun bareh sai haga ngejebak Isa, tian ngilu in Ia ngeguaiko suatu keajaiban sebagai tanda bahwa Ia ratong jak Allah.

¹⁷Kidang Isa pandai maksud tian. Maka Ia cawa jama tian, “Kik suatu negara pecoh delom kelompok-kelompok sai saling bemusuhan, negara ano mak dapok betahan. Rik sai keluarga pecoh bemusuhan peperda tian pasti hancor.

¹⁸Reno juga delom kerajaan iblis; kik sai kelompok rigu jama kelompok bareh, kerajaan ano haga runtuh. Keti cawa bahwa Nyak nguser ruh jahat jama kuasa Beelzebul.

¹⁹Kik injuk reno, jama kuasa sapa jelma-jelma sai nutuk niku nguser ruh jahat? Jelma-jelma sai nutuk niku ano tenggalan sai ngebuktiko bahwa keti salah!

²⁰Kidang Nyak nguser ruh jahat jama kuasa Allah, rik ano retini bahwa Allah radu mulai merintah di tengah-tengah keti.

²¹Kik jelma sai kuat, jama senjata lengkap, ngejaga lambanni tenggalan, unyinni hartani selamat.

²²Kidang kik wat jelma sai lebih kuat lagi nyerang rik ngalahko ia, maka jelma sai lebih kuat ano haga ngerampas unyinni senjata sai diandalko kedau lamban seno, ia ngebagi-bagiko unyinni hartani.

²³ Jelma sai mak memihak jama Nyak, setemonni ngelawan Nyak, rik jelma sai mak nulung Nyak setemonni nyadangko ciptaan-Ku!”

²⁴“Kik ruh jahat ninggalko jelma, ruh ano bekeliling di rang sai tandus nyepok rang untuk istirahat, kidang mak dihaluni. Makani ia cawa, ‘Nyak haga muloh mik lamban sai kutinggalko!’

²⁵Waktu ia sampai di lamban seno, ia ngehalu lamban seno mekecah rik teratur.

²⁶Kak raduni ia mik rik ngusung pitu ruh sai lebih jahat jak ia. Tian kuruk mik delom badan jelma seno rik tinggal di disan. Akherni keadaan jelma seno jadi lebih burak jak mula-mula.”

²⁷Seraduni Isa cawa injuk reno, sai jelma bebai jak hantara ulun lamon udi cawa jama Isa, “Temon bahagia bebai sai ngelaherko rik nyusui Niku!”

²⁸Kidang Isa ngejawab, “Lebih bahagia lagi jelma sai ngedengi cawani Allah rik ngelakukoni!”

²⁹ Waktu jelma-jelma ngerumuni Isa, Ia nerusko cawa-Ni, cawa-Ni, “Hara jahatni hati jelma-jelma zaman tano. Tian ngilu keajaiban in tian dapok percaya jama Nyak, kidang tian mak haga dikeniko sai keajaiban pun, kecuali keajaiban Nabi Yunus.

³⁰ Injuk Nabi Yunus cuntoh keajaiban untuk jelma-jelma Niniwe, injuk reno Anak Manusia haga jadi keajaiban untuk jelma zaman tano.

³¹ Waktu Rani Kiamat, Ratu negeri Selatan haga bangkit jama ulun-ulun zaman inji, rik nuduh tian. Mani, untuk ngedengiko ajaran Salomo sai bijaksana, Ratu ano haga ngelakuko lapahni sai jaoh sekali jak uncuk bumi. Kidang di dija tano wat sai lebih balak jak Salomo!

³² Waktu Rani Kiamat, penduduk Niniwe haga bangkit jama jelma-jelma zaman tano, rik nuduh tian, mani jelma Niniwe betubat jak dusa-dusa tian waktu Yunus bekhotbah jama tian. Kidang di dija tano wat sai lebih balak jak Yunus!”

³³ “Mak ngedok jelma sai masang lampu untuk disegokko atau nyalokni jama runcung lunik. Ia haga ngepikko lampu ano di cukutni lampu, in jelma sai kuruk dapok ngeliak terangni.

³⁴Mata, befungsi injuk lampu untuk badan. Kik matamu jernih, sunyinni badanmu terang. Kidang kik matamu kabor, unyinni badanmu jadi kelam.

³⁵Makani, hati-hatido, dang sampai terang sai wat jama niku jadi kelam.

³⁶Kik sunyinni badanmu terang, rik mak ngedok sebagian sai kelam, maka unyinni badanmu ano terang nihan injuk disiar sinar lampu.”

³⁷Waktu Isa radu selesai cawa, sai jelma Farisi ngundang Ia mengan di lambanni. Isa mik mengan di disan.

³⁸Ulun Farisi ano hiran ngeliak Isa mengan mak ngebasuh culuk-Ni pai menurut atoran agama.

³⁹Makani Tuhan cawa jama ia, “Sangun keti jelma-jelma Farisi, biasani ngecahko cumbung rik piring bagian luahni gaoh, kidang di delom dirimu tenggalan latap jama kekerasan rik kejahatan.

⁴⁰Keti bugu kan! Allah sai nyani bagian luah ano, kak raduni nyani bagian delomni juga?

⁴¹Sai delom cumbung rik piringmu ano, senodo sai haga keti keniko jama jelma-jelma sai mejerih. Jama cara injuk reno, unyinni haga jadi kecah untuk niku.

⁴² Celakado keti, jelma-jelma Farisi! Hasil tanoman keti injuk selasih, inggu rik rempah-rempah, keti ngeni persepuluhanni jama Allah, kidang keadilan rik kasih jama Allah mak dipeduliko keti. Padahal senodo sai keti guaiko tanpa ngelalaiko sai bareh.

⁴³Celaka keti, jelma-jelma Farisi! Keti gering rang-rang sai tehormat delom lamban ibadah, rik mirak dihormati di pasar-pasar.

⁴⁴Celaka keti! Keti injuk kuboran sai mak benisan, sai tanpa disadari diilik-ilikko jelma.”

⁴⁵Sai guru agama cawa jama Isa, “Pak Guru, cawa-Mu ano ngehina sekam juga!”

⁴⁶Isa ngejawab, “Celakado keti, guru-guru agama! Keti nuntut hal-hal sai payah rik ngeni atoran-atoran sai biak, kidang keti tenggalan cutikpun mak haga nulung jelma untuk ngejalankoni.

⁴⁷Celakado keti unyinni! Keti ngebangun kuboran untuk nabi-nabi, sai dibunuh ulihni nenek muyangmu tenggalan.

⁴⁸Keti tenggalan ngakui bahwa keti setuju api sai radu diguaiko ulihni nenek muyangmu; mani sangun tian sai ngebunuh nabi-nabi udi rik ketido sai ngebangun kuboranni.

⁴⁹Seno ulihni Kebijaksanaan Allah cawa, ‘Nyak haga ngirim jama tian nabi-nabi rik utusan-utusan-Ku; sebagian haga dibunuh rik sebagian haga disiksa.’

⁵⁰Allah ngelakuko inji in jelma-jelma zaman inji dihukum mani pembunuhan sai dilakuko jama unyinni nabi sejak dunia dijadiko,

⁵¹ mulai jak pembunuhan Habel sampai pembunuhan Zakharia, sai tejadi hantara mezbah rik Lamban Ibadah. Percayado: Jelma-jelma zaman inji pasti dihukum ulihni unyinni hal inji.

⁵²Celakado keti, guru-guru agama! Kunci untuk ngebukak rangok pengetahuan disegokko keti, kidang keti tenggalan mak haga kuruk mik delom untuk nyepok pengetahuan seno. Sebalikni keti ngehalang-halangi jelma-jelma sai berusaha kuruk mik delomni!”

⁵³Waktu Isa ninggalko rang seno, guru-guru agama rik jelma-jelma Farisi mengecam keras Isa. Tian mulai mancing-mancing Ia in Ia haga cawa tentang lamon hal.

⁵⁴Sementara seno tian memperhatiko Ia betik-betik untuk nangkok sai hal sai salah delom api sai diucakko-Ni.