Read Lampung Api LUKAS 12 Bible Online

LUKAS 12 - Lampung Api bible

LUKAS 12

¹ Beribu-ribu jelma bedesak-desakan sampai wat teilik-ilik cukutni. Waktu jelma-jelma lagi bekerumun, Isa cawa jama jelma-jelma sai nutuk Ia, “Hati-hati jama ragini jelma Farisi, maksud-Ku, kemunafikan tian.

² Mak ngedok sai tesegok, sai mak keliakan, rik mak ngedok sai dirahasiako sai mak haga tebungkar.

³Sai dicawako keti waktu dibingi, haga kedengian waktu di rani; rik sai keti sesiahko dicupingni jelma di delom kamar sai tekunci, haga diumumko seluas-luasni.”

⁴“Ingok, kantik-kantik-Ku! Dang rabai jama jelma sai ngebunuh badan kidang mak dapok bebuat lebih jak seno.

⁵Payudo Kutunjukko jama keti sapa sai keti haga rabaiko. Rabaido jama Allah! Mani radu ngebunuh, Ia juga bekuasa ngurukko delom neraka! Percayado, Iado sai haga dirabaiko keti.

⁶Lima burung pipit dijual regani rua mata duit sai paling lunik. Walaupun injuk reno mak ngedok sai burung pun dilupako Allah.

⁷Buok di ulumu pun radu dihitung unyinni, makani dang rabai; keti jaoh lebih berega jak burung pipit!”

⁸“Ingok betik-betik: Jelma sai ngakui di hadap jelma lamon bahwa ia jelma sai nutuk Nyak, ia haga diakui muneh ulih Anak Manusia di hadap malaikat-malaikat Allah.

⁹Kidangni kik wat jelma sai mak ngaku di hadap jelma lamon bahwa ia jelma sai nutuk Nyak, ia juga haga mak diakui ulihni Anak Manusia di hadap malaikat-malaikat Allah.

¹⁰ Kik ulun ngucakko sai hal sai nantang Anak Manusia, ia masih dapok diampuni; kik ia ngehina Ruh Allah, ia mak dapok diampuni.

¹¹ Kik keti diusung mik lamban-lamban ibadah untuk diadili di hadap pemerintah atau jelma sai bekuasa, dang khuater tentang repa keti ngebela diri atau api sai haga keti cawako.

¹²Mani api sai haga keti cawako haga diajarko ulih-Ni Ruh Allah jama niku tepat pada waktuni.”

¹³Sai jak hantara jelma lamon cawa jama Isa, “Bapak Guru, cuba pai Bapak ngayun puariku ngeniko jama nyak sebagian jak harta peninggalan ulun tuha sekam.”

¹⁴Isa ngejawab, “Puari, sapa sai ngangkat Nyak jadi hakim atau sai ngebagi harta warisan hantara keti rua?”

¹⁵Kak raduni jama unyinni jelma sai wat di disan Isa cawa, “Hati-hati rik waspada, dang sampai keti serakah. Mani hurikni manusia mak tegantung jak kebatinanni, walaupun hartani belimpah-limpah.”

¹⁶Kak raduni Isa nyeritako perumpamaan inji, “Wat sai jelma batin. Ia ngedok tanoh sai lamon hasilni.

¹⁷Jelma batin inji mulai bepiker delom hatini, ‘Radu mak ngedok lagi rang nyegokko hasil jak tanohku. Api akalku tano?’

¹⁸Raduni ia bepiker luot rik cawa jama dirini tenggalan, ‘Nah, nyak wat akal; gudang-gudangku haga kukayun rumbak kak raduni kubangun sai lebih balak. Di dudido haga kusegokko unyinni gandumku rik barang-barangku sai bareh.

¹⁹Kak raduni haga kucawako jama diriku tenggalan: Niku beruntung! Sunyinni sai betik radu jadi milikmu rik mak bela selama betahun-tahun. Istirahatdo! Mengan nginumdo rik nikmatido hurikmu!’

²⁰Kidang Allah cawa jama ia, ‘Niku jelma bugu! Bingi inji juga niku mati, jadi sapa sai sekedau unyinni harta sai radu dikumpulko untuk dirimu ano?’

²¹Renodo jadini jama tiap-tiap jelma sai mebatin untuk dirini tenggalan, kidang mak berusaha mebatin di matani Allah.”

²²Kak raduni Isa cawa jama jelma-jelma sai nutuk Ia, “Renodo sebabni Nyak cawa, ‘Dang muneh niku khuater tentang badanmu, yakdo api sai haga keti kanik, api sai haga keti pakai.’

²³Hurik ano lebih jak kanikan, rik badan lebih penting jak kawai.

²⁴Perhatiko burung-burung gagak! Tian mak nanom, mak nuai, mak ngedok juga gudang atau lumbung. Kidang Allah melihara tian! Keti jaoh lebih berega jak burung-burung!

²⁵Sapa jak hantara keti ulihni khuater dapok nambah kejung umor walaupun cutik?

²⁶Kik hal sai paling lunik gaoh mak dapok diguaiko keti, mengapi khuater tentang hal-hal bareh?

²⁷ Perhatikodo repa kumbang-kumbang bakung tuoh; kumbang-kumbangni mak beguai, mak juga nenun. Kidang Raja Salomo sai reno batinni mak makai kawai sai sehelau kumbang-kumbang ano!

²⁸Jukuk di kebun tuoh rani inji jemoh juga disuah sampai bela. Kidang Allah ngedandani jukuk seno helau nihan. Apilagi keti! Kidang keti kurang percaya!

²⁹Jadi, dang khuater rik bingung tentang api sai haga keti kanik rik inum.

³⁰Hal-hal injuk reno dibedak ulih jelma sai mak ngenal Allah. Padahal Bapamu pandai bahwa keti butuh unyinni inji.

³¹Kidangni keti haga usaha in Allah memerintah di atas hurik keti, in sai bareh juga haga dikeni Allah juga jama niku.”

³²“Keti sai angkah cutik jumlahni, dang rabai! Mani Bapamu senang ngeniko jama keti berkat jak Pemerintahan-Ni.

³³Jualdo hartamu rik bagiko duitmu ano jama jelma mejerih. Saniko untuk dirimu dumpet sai mak dapok cadang, yakdo harta sai disegokko di surga. Harta seno mak dapok lebon mani maling mak dapok ngakukni rik rayap mak dapok nyadangkoni.

³⁴Mani dipa hartamu, di disan juga hatimu!”

³⁵ “Bejaga-jagado ngehadapi unggal hal. Keti selalu siap bekawai rik lampumu tetap dinyalako,

³⁶ gegoh jama jelma-jelma sai ngelayani sai siap nunggu majikanni mulang jak pesta kawin. Kik majikanni mulang rik ngetuk rangok, tian geluk ngebuka rangok.

³⁷Hara untungni jelma-jelma sai ngelayani sai kedapokan lagi nunggu waktu majikanni ratong. Percayado: majikan ano haga besiap-siap rik ngayun jelma-jelma sai ngelayani ia mejong, raduni ia ngelayani tian.

³⁸Hara untungni jelma-jelma sai ngelayani seno kik majikan tian betungga tian sedang siap nunggu, walaupun ia ratong tengah bingi atau telat jak seno!

³⁹ Ingokdo! Kik majikan pandai jam pira maling haga ratong, ia haga ngejaga in maling dang kuruk mik lambanni.

⁴⁰Makani keti juga haga siap-siap, mani Anak Manusia haga ratong waktu sai mak keti disangko-sangko.”

⁴¹“Tuhan, api pelajaran seno Tuhan tujuko jama sekam atau unyinni jelma?” Petrus nanya.

⁴²Tuhan ngejawab, “Sapa jelma sai ngelayani sai setia rik bijaksana hingga dijadiko ulih tuanni jadi kepala jelma-jelma sai ngelayani bareh in ia ngeni tian mengan pada waktuni?

⁴³Hara bahagiani jelma sai ngelayani seno kik tuanni ratong rik betungga jama ia lagi ngeguaiko tugasni!

⁴⁴Percayado: Tuan ano haga ngeniko sunyinni hartani jama jelma sai ngelayani seno mani ia percaya.

⁴⁵Kidang kik jelma sai ngelayani seno cawa delom hatini, ‘Tuanku lagi metangih mulang,’ kak raduni ia mukul unyinni jelma sai ngelayani ia rik ia mengan rik nginum sampai mabuk,

⁴⁶maka tuanni haga ratong di rani rik jam sai mak disangko-sangko. Jelma sai ngelayani seno haga dipukul habis-habisan ulihni tuanni rik dijadiko senasib jama jelma-jelma sai mak taat jama Allah.

⁴⁷Jelma sai ngelayani sai pandai kehagani tuanni, kidang mak siap-siap rik mak ngelakuko kehaga tuanni, haga disebat.

⁴⁸Kidang jelma sai ngelayani sai mak pandai kemauan tuanni, ngeguaiko suatu hal sai salah sehingga haga disebat, disebat cutik gaoh. Mani jelma sai radu dikeni lamon, jak ia dituntut lamon juga. Rik jelma sai radu lamon dikeni percaya jak ia juga dituntut lamon hal muneh.”

⁴⁹“Nyak ratong untuk nimbulko kebakaran di bumi inji. Hara helau kik apuini radu nyala!

⁵⁰ Masih wat penderitaan sai hibat sai haga Kulapahi. Rik hati-Ku gelisah nihan semakkung seno tejadi.

⁵¹Api keti nyangko Nyak ratong ngusung damai di bumi? Mawat, lain hak damai, kidangni perlawanan.

⁵²Mulai jak tano, keluarga sai lamonni lima jelma haga betentangan, telu lawan rua, atau rua lawan telu.

⁵³ Bak haga ngelawan anak bakasni rik anak bakasni haga ngelawan bakni. Emak ngelawan anak bebaini rik anak bebaini ngelawan emakni. Mentuha bebai haga ngelawan mantu bebaini rik mantu bebaini haga ngelawan emak mentuhani.”

⁵⁴Isa cawa jama jelma lamon, “Kik keti ngeliak awan cakak mik kebelah barat, langsung keti cawa, ‘Haga labung.’ Rik temondo labung.

⁵⁵Kik keti ngerasa angin ratong jak selatan, keti cawa, ‘Haga panas.’ Rik temondo panas.

⁵⁶Keti jelma sai gering icak-icak! Keti dapok ngeramalko cuaca waktu ngeliak keadaan langit rik bumi. Mengapi tanda-tanda zaman inji mak dapok diramalko keti?”

⁵⁷“Mengapi keti mak memutusko tenggalan api sai benor?

⁵⁸Kik wat jelma sai ngaduko keti mik pengadilan, gelukdo keti berusaha nyelesaiko perkara-perkara seno jama ia sementara keti masih di tengah renglaya. Kik mawat, ia kanah nyiret keti mik hadap hakim rik hakim seno haga nyerahko keti mik pelisi, rik pelisi ngurukko keti mik delom bui.

⁵⁹Percayado! Keti mak haga luah jak penjara semakkung ngelunasko dendamu.”