Read Lampung Api LUKAS 13 Bible Online

LUKAS 13 - Lampung Api bible

LUKAS 13

¹Waktu seno jelma nyeritako jama Isa tentang pira-pira jelma Galilea sai dibunuh Pilatus, waktu tian lagi mempersembahko kurban jama Allah.

²Nanggapi cerita seno, Isa cawa, “Ulihni jelma-jelma Galilea udi dibunuh injuk reno, keti nyangko seno buktini tian lebih lamon bedusa jak sunyinni jelma Galilea sai bareh?

³Sama sekali, mawat! Kidang ingokdo: kik keti mawat haga betubat jak dusa-dusa keti, keti unyinni haga mati juga, injuk tian.

⁴Repa muneh sai walu belas jelma sai tiwas di Siloam, waktu menara nimpa tian? Sangko keti seno nunjukko kik tian lebih lamon dusani jak sunyinni jelma sai tinggal di Yerusalem?

⁵Sama sekali mawat! Sekali lagi Kuucakko: Kik keti mak juga betubat jak dusa-dusa keti, unyinni keti haga mati injuk tian juga.”

⁶Kak raduni Isa nyeritako juga perumpamaan inji, “Wat jelma sai ngedok batang ara di kebun anggorni. Suatu rani ia mik nyepok uahni batang seno, kidang mak ngehalu sebiji pun.

⁷Jadi, ia cawa jama tukang kebunni, ‘Liak, radu telu tahun nyak ratong nyepok uahni batang ara ajo, kidang mak ngehalu sebiji pun. Pelok gaoh batang seno! Percuma ia angkah ngebelako kanikan jak tanoh!’

⁸Kidang tukang kebun ano ngejawab, ‘Tagando ia tuoh setahun lagi Tuan. Nyak haga macul tanoh sekelilingni rik ngeni pupuk.

⁹Halokni ia kanah bebuah tahun hadap. Kidang kik mawat bebuah, Tuan ngasido ngayun pelok.’ ”

¹⁰Waktu rani Sabat, Isa ngajar di sai lamban ibadah.

¹¹Di disan wat bebai sai radu walu belas tahun meruyuh, mani wat ruh jahat delom badanni. Bebai ano bungkuk rik sama sekali mak dapok cecok.

¹²Waktu Isa ngeliakni, cawado Ia, “Ibu, niku munyai jak penyakikmu!”

¹³Raduni Isa ngepikko culuk-Ni di atas ulu bebai seno, waktu senodo ia dapok cecok lurus rik muji Allah.

¹⁴ Kepala lamban ibadah ano butong, mani Isa ngunyaiko jelma waktu rani Sabat, makani ia cawa jama jelma-jelma, “Wat enam rani untuk beguai; ratongdo keti di rani-rani seno untuk ngunyaiko penyakik keti, dang waktu rani Sabat!”

¹⁵Tuhan ngejawab, “Munafik keti inji! Waktu rani Sabat sunyinni jelma ngelepasko jawi atau keledaini jak kandang haga luah dikeni nginum.

¹⁶Nah, di dija tano, wat sai bebai jak keturunan Abraham, sai radu walu belas tahun sakani dikuasai iblis. Api mak ngasi dilepasko ikokanni waktu rani Sabat?”

¹⁷Jawaban Isa ano nyani lawan-lawan-Ni meliom nihan; kidang sunyinni jelma sai bareh gering ngeliak sunyinni keajaiban sai disani Isa.

¹⁸Isa betanya, “Kik Allah merintah, repa keadaanni? Jama api Nyak dapok ngebandingkoni?

¹⁹Keadaanni injuk perumpamaan inji. Sai biji sawi diakuk ulih jelma kak raduni ditanomni di kebunni. Biji ano tuoh kak raduni jadi batang, rik burung-burung nyani sarang di pampang-pampang batang seno.”

²⁰Sekali lagi Isa betanya, “Kik Allah merintah, jama api dapok Kubandingko keadaanni?

²¹Keadaanni injuk ragi sai diakuk ulih sai bebai terus diaduk jama pak puluh liter tepung, sampai adonanni cakak unyinni.”

²²Delom lapahni mik Yerusalem, Isa ngeliu kota-kota rik pekon-pekon sambil ngajar.

²³Kak raduni wat jelma betanya jama Ia, “Pak, api angkah cutik jelma sai haga diselamatko?” Isa ngejawab,

²⁴ “Berusahado untuk kuruk jak rangok sai mepelik. Mani, ingok! Lamon jelma sai berusaha kuruk kidang mak dapok.

²⁵Pada waktu sekedau lamban minjak rik nyalokko rangokni, keti cecok di luah rik keti mulai ngetuk-ngetuk sambil cawa, ‘Tuan, bukakko sekam rangok!’ Tuan ano haga ngejawab, ‘Nyak mak pandai keti jak ipa!’

²⁶ Keti haga ngejawab, ‘Sekam radu mengan rik nginum jejama Tuan, rik Tuan radu ngajar juga di renglaya kota sekam!’

²⁷ Kidang Tuan ano haga cawa luot, ‘Nyak mak pandai keti jak ipa. Kisit, jak ija, keti sai ngeguaiko kejahatan!’

²⁸ Waktu keti ngeliak Abraham, Ishak rik Yakub rik sunyinni nabi keriangan di delom Dunia Ampai Allah, keti haga miwang rik menderita mani keti diuser mik luah!

²⁹Jelma-jelma haga ratong jak timur rik barat, utara rik selatan haga keriangan di delom Dunia Baru Allah.

³⁰ Sebenorni, wat jelma terakher sai haga jadi jelma mula-mula, rik wat jelma mula-mula sai haga jadi ulun terakher.”

³¹Waktu seno juga, wat pira jelma Farisi ratong jama Isa rik cawa, “Dang tinggal di dija! Mikdo di rang sai bareh, mani Herodes haga ngebunuh Tuan.”

³²Isa ngejawab, “Mikdo keni pandai jama jelma sai mak beguna ano, ‘Rani inji rik jemoh Nyak haga nguser ruh jahat rik haga ngunyaiko jelma sai meruyuh, kidang pada rani ketelu, Nyak haga ngeraduko guai-Ku.’

³³Walau injuk reno Nyak haga nerusko lapah-Ku rani inji, jemoh rik sawai, mani mak betik sai nabi dibunuh di luah Yerusalem.

³⁴Yerusalem, Yerusalem! Niku bunuh nabi-nabi! Utusan-utusan Allah ditayar jama batu sampai mati! Radu pira kali Nyak mirak ngerangkul sunyinni penduduk injuk indukni manuk ngelindungi anak-anakni di debah kepini, kidang niku mak haga!

³⁵ Makani Allah mak haga lagi jejama niku. In niku pandai mulai tano niku mak ngeliak Nyak lagi, sampai niku cawa, ‘Diberkatido Ia sai ratong atas gelarni Tuhan.’ ”