Read Lampung Api LUKAS 17 Bible Online

LUKAS 17 - Lampung Api bible

LUKAS 17

¹Isa cawa jama jelma-jelma sai nutuk Ia, “Hal-hal sai nyebabko ulun bebuat dusa pasti wat. Kidang celakado jelma sai nyebabkoni!

²Lebih baik kik batu sai balak diikokko digalahni, kak raduni ia ditokko delom laok jak kik ia nyebabko sai jak jelma-jelma lunik inji bebuat dusa.

³ Ulih seno, waspadado! Kik puarimu bebuat dusa, tegur ia. Kik ia nyesol, ampunko ia.

⁴Kik ia bedusa jama niku pitu kali delom serani rik unggal ia ratong jama niku ia cawa, ‘Nyak ngilu maaf,’ maafko ia.”

⁵Para rasul cawa jama Tuhan Isa, “Tuhan, kuatko iman sekam.”

⁶Tuhan ngejawab, “Kik keti ngedok iman balakni sebiji sawi, keti dapok cawa jama batang murbei inji, ‘Tecabutdo niku rik tetanomdo niku delom laok,’ pasti batang inji nurut perintahmu.”

⁷“Seandaini sai jak keti ngedok jelma sai ngelayani guaini ngebajak di kebun atau ngembalako biri-biri. Kik jelma sai ngelayani ano ratong lagi, api ia cawa jama jelma sai ngelayani ano, ‘Ija geluk mengan’?

⁸Tantu mawat! Sebalikni ia haga cawa jama ia, ‘Sediako kanikanku. Pakaido kawai sai kecah rik tunggu pai nyak sementara nyak mengan rik nginum; ampai niku ngasi mengan.’

⁹Kan jelma sai ngelayani ano mak perlu dipuji mani radu patuh jama perintahni tuanni.

¹⁰Injuk reno juga keti. Kik keti radu ngeguaiko unyinni sai diperintahko jama keti, ucakko, ‘Sekam angkah jelma sai ngelayani biasa; sekam angkah ngeguaiko kewajiban sekam.’ ”

¹¹Delom lapahni mik Yerusalem, Isa liu di daerah perbatasan Samaria rik Galilea.

¹²Waktu kuruk di sai pekon, Ia diratongi puluh jelma sai bepenyakik kusta. Tian cecok jak jaoh

¹³tian mekik, “Isa! Tuan! Kesiando jama sekam!”

¹⁴ Waktu Isa ngeliak tian, Ia cawa, “Mikdo jama imam-imam, kilu tian meriksa badanmu.” Sementara tian lapah, lebondo penyakikni tian.

¹⁵Waktu sai jak hantara tian sadar bahwa ia radu munyai, ia muloh sambil nyanyi-nyanyi memuji Allah.

¹⁶Kak raduni dihadapni Isa, ia sujud rik ngucapko terima kasih jama Ia. Jelma seno jak Samaria.

¹⁷Kak raduni Isa cawa, “Kan wat puluh jelma sai Kumunyaiko? Di dipa sai siwa lagi?

¹⁸Mengapi angkah jelma asing inji sai muloh ngucapko terima kasih jama Allah?”

¹⁹Raduni Isa cawa jama ulun seno, “Minjakdo, rik mikdo. Mani niku percaya jama Nyak, niku munyai.”

²⁰Wat pira jelma Farisi betanya jama Isa kapan Allah ratong untuk memerintah. Isa ngejawab, “Pemerintahanni Allah mak dimulai jama tanda-tanda sai dapok diliak ulun,

²¹hingga ulun dapok cawa, ‘Ija liak, ajo ia!’ atau, ‘Di disan ia!’ Mani Allah radu mulai merintah di tengah-tengah keti.”

²²Radu jak seno Isa cawa jama jelma-jelma sai nutuk Ia, “Haga ratong waktuni keti mirak ngeliak sai rani jak rani-ranini Anak Manusia, kidang keti mak dapok ngeliakni.

²³Kanah jelma haga cawa, ‘Liak, di dudi!’ atau, ‘Liak, di dija!’ Kidangni dang keti luah nyepok ia.

²⁴Injuk kilap memancar di langit, rik becahaya jak uncuk mik uncuk, reno muneh kanah keadaan Anak Manusia pada rani-Ni.

²⁵Kidang mula-mula Ia haga lamon menderita rik mak diterima ulih jelma-jelma zaman inji.

²⁶ Waktu rani Anak Manusia dinyatako kanah, keadaanni injuk zaman Nabi Nuh tumbai.

²⁷ Jelma mengan nginum, rik kawin; injuk reno seterusni sampai Nuh kuruk delom kapal kak radu banjer ratong niwasko jelma-jelma sunyinni.

²⁸ Gegoh jama zaman Nabi Lot. Jelma mengan nginum, ngejual beli, bekebun rik ngebangun lamban.

²⁹Kidang waktu Lot luah jak Sodom, rani seno juga luah apui rik belerang gugur jak langit rik ngebinasako tian unyinni.

³⁰Injuk renodo keadaan kanah waktu Anak Manusia dinyatako.

³¹ Waktu rani seno jelma sai lagi di atas hatok lambanni mak ngasi regah untuk ngakuk barang-barangni sai delom lamban. Reno muneh jelma sai lagi di kebun mak ngasi mulang mik lambanni.

³² Ingok api sai radu tejadi jama kajongni Lot!

³³ Jelma sai berusaha nyelamatko kehurikanni, haga kelebonan hurikni. Kidangni jelma sai kelebonan kehurikanni haga nyelamatko hurikni.

³⁴Percayado: Waktu bingi seno, rua jelma lagi pedom di katil, sai jelma haga diusung sai jelma lagi ditinggalko.

³⁵Rua bebai lagi ngegiling gandum, sai bebai haga diusung sai lagi ditinggalko. [

³⁶Rua jelma lagi beguai di kebun, sai haga diusung rik sai lagi ditinggalko.]”

³⁷Jelma-jelma sai nutuk Isa betanya, “Di dipa kejadian seno haga tejadi, Tuhan?” Isa ngejawab, “Di dipa wat bangkai, di disando wat burung penganik bangkai.”