Read Lampung Api LUKAS 18 Bible Online

LUKAS 18 - Lampung Api bible

LUKAS 18

¹Radu jak seno Isa nyeritako sai perumpamaan untuk ngajar jelma-jelma sai nutuk Ia in tian selalu bedua rik mak putus asa.

²Isa cawa, “Di sai kota wat hakim sai mak merabai jama Allah, rik mak haga peduli jama sapa pun juga.

³Di kota seno muneh wat sai randa sai risok nihan ngehadap hakim untuk ngilu perkarani dibela. ‘Tulung pai nyak ngehadapi lawanku,’ ani randa seno.

⁴Untuk waktu sai cukup saka hakim ano mak haga nulung randa seno. Kidang akherni hakim ano mulai bepiker, ‘Walaupun nyak mak merabai jama Allah rik mak haga peduli jama sapa pun,

⁵kidang mani randa ano terus ngeganggu nyak, lebih baik nyak ngebela perkarani. Kik mawat, ia haga terus ratong rik nyusahko nyak.’ ”

⁶Radu jak seno Tuhan cawa, “Perhatiko api sai dicawako hakim sai mak adil ano!

⁷Nah, api Allah mak haga ngebela umat-Ni sai beseru jama Ia di rani atau di bingi? Api Ia haga ngulorko waktu untuk nulung tian?

⁸Percayado: Ia haga geluk ngebela perkarani tian! Kidangni kik Anak Manusia ratong, api masih wat jelma sai percaya jama Ia di bumi inji?”

⁹Isa nyeritako juga perumpamaan inji sai ditujuko-Ni jama jelma sai memandang rendah jama jelma bareh, kidangni yakin bahwa dirini tenggalan betik.

¹⁰Cawa Isa, “Wat rua jelma mik Lamban Ibadah untuk bedua. Sai jelma Farisi, sai barehni penagih pajak.

¹¹Jelma Farisi ano cecok tenggalan sambil bedua, ‘Ya Allah, nyak ngucapko terima kasih juga jama Allah, mani nyak mak gegoh injuk ulun bareh, sai serakah, curang, atau bezinah. Nyak besyukor mani nyak mak injuk penagih pajak udi.

¹²Nyak puasa rua kali seminggu, rik nyak ngeni persembahan jama Niku sepersepuluh jak sunyinni penghasilanku.’

¹³Kidangni penagih pajak ano cecok jaoh-jaoh rik malahan mak bani nengadah langit. Sambil ngusap dada ia cawa, ‘Ya Allah, kesiando jama nyak, jelma sai bedusa inji!’ ”

¹⁴ “Percayado,” cawa Isa, “waktu mulang mik lamban, penagih pajak anodo sai diterima Allah lain hak jelma Farisi ano. Mani unggal jelma sai ngelanggarko dirini haga direbahko; rik tiap-tiap jelma sai ngerendahko dirini haga dilanggarkoni.”

¹⁵Wat lamon jelma ngusung sanak lunik mik jama Isa in Ia ngejamah rik ngeberkati tian. Waktu jelma-jelma sai nutuk Isa ngeliak seno, tian butong jama jelma-jelma seno.

¹⁶Kidangni Isa ngurau sanak-sanak seno raduni cawa jama jelma-jelma sai nutuk Ia, “Taganko sanak-sanak ratong jama Nyak! Dang ngelarang tian, mani jelma injuk injido sai jadi anggota umat Allah.

¹⁷Ingokdo! Jelma sai mawat ngehadap Allah injuk sanak sinji, mawat jadi anggota umat Allah.”

¹⁸Wat sai jelma sai mimpin Yahudi betanya jama Isa, “Pak Guru sai betik, nyak haga bebuat api in dapok nerima hurik sejati rik kekal?”

¹⁹“Mengapi niku ngucakko Nyak betik?” Isa betanya jama ia. “Mak ngedok sai betik, selain Allah tenggalan.

²⁰ Niku radu pandai perintah-perintah Allah: ‘Dang bezinah, dang ngebunuh, dang maling, dang ngeni saksi sai buhung, rik hormatido bak rik emakmu.’ ”

²¹“Sunyinni perintah ano radu kututuk jak nyak mengura,” cawa jelma seno.

²²Ngedengi seno, Isa cawa, “Lagi wat sai hal sai haga diguaiko: Jualdo unyinni hartamu, keniko duitni jama jelma mejerih, rik niku haga mansa harta di surga. Kak radu jak seno tutukdo Nyak.”

²³Kidangni waktu jelma udi ngedengi seno, ia sedih mani ia mebatin nihan.

²⁴Isa pandai jelma udi besedih hati, ulih seno Ia cawa, “Payah nihan untuk jelma batin jadi anggota umat Allah!

²⁵Lebih gampang sai unta kuruk lubang serok, jak sai jelma batin kuruk Dunia Ampai Allah.”

²⁶Jelma sai ngedengi Isa nyawako injuk reno, betanya, “Kik injuk reno, sapa sai dapok selamat?”

²⁷Isa ngejawab, “Sai mak mungkin bagi manusia, mungkin bagi Allah!”

²⁸Kak raduni Petrus cawa, “Liakdo! Sekam radu ninggalko keluarga sekam untuk nutuk Bapak.”

²⁹“Percayado!” ani Isa. “Jelma sai radu ninggalko lambanni, atau inggomni, atau puarini, atau bak rik emakni atau anak-anakni ulihni ngelayani Allah,

³⁰jelma udi haga dibalos belipat ganda pada waktu inji, rik waktu zaman sai haga ratong ia haga dikeni hurik sejati rik kekal.”

³¹Isa ngumpulko kerua belas jelma sai nutuk-Ni, kak raduni cawa, “Dengiko! Ram tano nuju Yerusalem. Di dudi, sunyinni sai ditulis nabi-nabi mengenai Anak Manusia, haga tejadi.

³²Ia haga diserahko jama jelma-jelma lain hak bangsa Yahudi, sai haga ngulok-ngulok, ngehina rik ngeluiko Ia.

³³Tian haga nyiksa rik ngebunuh Ia, kidangni waktu rani ketelu, Ia haga bangkit.”

³⁴Sunyinni seno mak dipahami cutik pun ulih jelma-jelma sai nutuk Isa ano. Api retini jak kata-kata-Ni ano dirahasiako jak tian. Tian mak pandai Ia cawa tentang api.

³⁵Waktu Isa hamper sampai di Yerikho, sai jelma buta lagi mejong ngilu-ngilu di pingger renglaya.

³⁶Waktu ia ngedengi jelma lamon ano liu, ia betanya, “Wat api?”

³⁷“Isa, jelma Nazaret udi, liu,” ani tian jama ia.

³⁸Radu jak seno ulun buta ano mekik, “Isa, anak Daud! Kesian pai jama nyak!”

³⁹Jelma-jelma sai di hadap ngebutongi ia rik ngayun ia hema. Kidangni ia mekik lebih nyaring lagi, “Anak Daud! Kesian pai jama nyak!”

⁴⁰Isa taru rik ngayun jelma ngusung ulun buta udi mik jama Ia. Waktu ia sampai, Isa betanya,

⁴¹“Api sai niku mirak in Nyak bebuat jama niku?” “Tuan,” jawab jelma buta ano, “nyak mirak ngeliak.”

⁴²Kak raduni Isa cawa, “Kik injuk reno, liakdo! Mani niku percaya jama Nyak-Ku, niku munyai.”

⁴³Waktu seno juga ia dapok ngeliak, kak raduni ia nutuk Isa sambil ngucapko terima kasih jama Allah. Waktu jelma lamon udi ngeliak hal seno, tian unyinni memuji-muji Allah.