Read Lampung Api LUKAS 2 Bible Online

LUKAS 2 - Lampung Api bible

LUKAS 2

¹Waktu seno Kaisar Agustus merintahko in unyinni jelma di Kerajaan Roma mendaptarko diri haga dihitung.

²Penghitungan sai mula-mula diguaiko waktu Kirenius jadi gubernur negeri Siria.

³Unyinni jelma waktu seno mik ngedaptarko diri di kotani tenggalan-tenggalan.

⁴Yusuf pun berangkat jak Nazaret di Galilea, mik Betlehem di Yudea, rang laherni Raja Daud; mani Yusuf keturunan Daud.

⁵Yusuf ngedaptarko dirini jejama Maria tunanganni, sai lagi ngandung.

⁶Waktu tian lagi di Betlehem sampai waktuni Maria haga ngelaherko.

⁷Maria ngelaherko anak bakas, anakni sai tuha. Sanak sinji dibungkusni jama kain, kak raduni dipikko delom kutak rang keledai mengan sai ngisi jerami; mani tian mak mansa rang untuk minok.

⁸Waktu bingi seno wat gembala-gembala sai lagi ngejaga biri-biri di tanoh lapang sai lamon jukukni di daerah seno.

⁹Tiba-tiba malaikat Tuhan ratong jama tian, rik cahaya terang jak Tuhan nyinari tian, tian jadi merabai nihan.

¹⁰Kidangni malaikat udi cawa, “Dang rabai! Mani nyak ratong ngusung kabar betik untuk keti unyinni — kabar sai paling ngeriangko hati unyinni jelma.

¹¹Rani inji di kota Daud radu laher Raja Penyelamatmu yakdo Almasih, Tuhan.

¹²Ajo tandani: Keti haga betungga upi sai dibungkus jama kain, pedom delom kutak rang keledai mengan.”

¹³Tiba-tiba malaikat sai seno jama rikni lamon malaikat bareh memuji Allah. Tian cawa,

¹⁴“Terpujido Allah di langit sai paling langgar! Rik di atas bumi, sejahterado jelma sai nyenangko hatini Tuhan!”

¹⁵Waktu malaikat-malaikat ninggalko tian rik muloh mik surga, gembala-gembala berunding jejama tian, “Ija ram mik Betlehem rik ngeliak peristiwa sai tejadi, sai dikeni pandai Tuhan jama neram.”

¹⁶Tian mik geluk, tian betungga Maria jama Yusuf, rik upi sai lagi pedom delom kutak rang keledai mengan.

¹⁷Waktu gembala ngeliak upi ano, tian cerita api sai dicawako malaikat tentang upi seno.

¹⁸Sunyinni ulun hiran ngedengi cerita gembala ano.

¹⁹Kidang Maria nyegokko unyinni inji delom hatini rik dipikerkoni.

²⁰Gembala-gembala ano muloh luot mik rangni mula-mula ngembalako biri-birini sambil memuji rik ngemuliako Allah, mani api sai radu didengi rik diliak, gegoh jama sai diucakko ulihni malaikat.

²¹ Waktu umor walu rani, sanak sinji disunat. Tian ngeni gelar Isa, gelar sai dikeniko malaikat jama Ia semakkung Ia dikandung ulih emak-Ni.

²² Sampaido waktuni Yusuf rik Maria ngelakuko upacara adat penyucian nutuk hukum Musa. Makani tian ngusung Sanak seno mik Yerusalem untuk dikeniko jama Tuhan.

²³ Mani delom Hukum Tuhan tetulis injuk reji, “Unggal anak bakas sai tuha, haga diserahko jama Tuhan.”

²⁴Tian juga bemaksud ngeniko kurban, sepasang burung terkuku atau rua burung merpati sai lagi ngura, injuk sai ditantuko delom Hukum Tuhan.

²⁵Waktu seno di Yerusalem wat jelma gelarni Simeon. Ia jelma betik, sai merabai jama Allah rik lagi nunggu waktuni Allah nyelamatko bangsa Israel. Ruh Allah wat jama ia,

²⁶Ruh Allah radu ngeni pandai jama ia bahwa ia mak dapok mati semakkung ngeliak Raja Penyelamat sai dijanjiko Tuhan.

²⁷Delom bimbingan Ruh Allah, Simeon kuruk mik Lamban Ibadah. Waktu senodo Yusuf rik Maria ngusung kuruk Isa, sanak sai masih lunik ajo untuk ngeguaiko upacara sai diperintahko hukum agama.

²⁸Simeon ngakuk Sanak seno dibabai-Ni, kak raduni ia memuji Allah,

²⁹“Tano, ya Tuhan, Tuhan radu nepati janji-Mu. Tagando nyakku mati tenang.

³⁰Mani, ulih mataku tenggalan radu ngeliak Penyelamat sai jak Tuhan.

³¹Penyelamat udi radu disiapko Tuhan untuk unyinni bangsa:

³² injuk terang sai nyinari renglaya bagi bangsa-bangsa sai bareh, untuk ratong jama Tuhan; yakdo terang sai ngeratongko kehormatan untuk umat-Mu Israel.”

³³Bak rik emak-Ni Sanak seno hiran ngedengi api sai diucakko Simeon tentang Sanak seno.

³⁴Simeon ngeberkati tian rik cawa jama Maria, emakni Sanak seno, “Sanak sinji radu dipilih ulih-Ni Allah untuk ngebinasako rik untuk nyelamatko lamon ulun Israel. Ia haga jadi tanda jak Allah, sai haga dilawan ulih lamon jelma,

³⁵rik ulihni seno tebukakdo isi hatini tian. Kepedihan haga nusuk hatimu injuk pedang sai tajom.”

³⁶Wat muneh nabi bebai sai radu metuha nihan. Gelarni Hana, anakni Fanuel, jak suku Asyer. Radu jak pitu tahun kawin,

³⁷Hana jadi randa, rik tano umorni walu puluh pak tahun. Ia mak pernah ninggalko Lamban Ibadah. Di rani rik di bingi ia beibadah jama Allah jama bedua rik bepuasa.

³⁸Tepat pada waktu seno juga ia ratong, sambil memuji Allah rik cerita tentang Sanak seno jama unyinni jelma sai nunggu waktuni Allah ngebebasko Yerusalem.

³⁹ Radu jak Yusuf rik Maria ngeguaiko sunyinni sai diwajibko Hukum Tuhan, tian muloh mik Nazaret di Galilea.

⁴⁰Sanak sinji tambah balak rik kuat. Ia calak nihan rik disayangi ulih Allah.

⁴¹ Unggal tahun ulun tuhani Isa Yusuf rik Maria, mik Yerusalem untuk ngerayako Rani Buka Paskah.

⁴²Waktu Isa umor rua belas tahun, tian mik perayaan seno nutuk kebiasaan.

⁴³Radu jak perayaan seno tian mulang, kidangni Isa, Sanak seno, masih tinggal di Yerusalem sedang ulun tuha-Ni mak pandai.

⁴⁴Tian nyangko Isa nutuk delom rombongan. Radu lapah sepanjang rani ampai tian nyepok Isa di hantara puari-puari rik kenalan-kenalan tian.

⁴⁵Kidang tian mak betungga jama Ia, jadi tian muloh mik Yerusalem nyepok Ia.

⁴⁶Radu jak telu rani, tian nyepok tian ngehalu Isa di Lamban rang ibadah. Ia lagi mejong ngedengiko cawani guru agama rik risok betanya.

⁴⁷Sunyinni jelma sai ngedengiko Ia hiran mani kecerdasan-Ni. Ia dapok ngejawab sunyinni pertanyaan-pertanyaan sai tepat.

⁴⁸Ulun tuha-Ni pun hiran ngeliak Ia. Emak-Ni cawa jama Ia, “Nak, mengapi Niku injuk reno jama sekam? Bak-Mu rik emak-Mu cemas nihan nyepok Niku!”

⁴⁹Isa ngejawab, “Mengapi bak jama emak nyepok Nyak? Api bak rik emak mawat pandai bahwa Nyak musti wat delom Lamban Bapa-Ku?”

⁵⁰Kidangni tian mak ngerti cawani Isa.

⁵¹Kak raduni Isa mulang jejama tian mik Nazaret, rik patuh jama tian. Sunyinni peristiwa inji disegokko ulihni emakni Isa delom hatini.

⁵² Isa betambah balak rik tambah calak, rik dikasihi ulih Allah rik disenangi ulih jelma.