Read Lampung Api LUKAS 20 Bible Online

LUKAS 20 - Lampung Api bible

LUKAS 20

¹Suatu rani, Isa lagi ngajar rik ngabarko Kabar Betik jak Allah jama jelma-jelma delom Lamban Ibadah. Imam-imam kepala, guru-guru agama, jama tetuha-tetuhani Yahudi, ratong,

²rik cawa jama Isa, “Cuba keni sekam pandai api dasarni Niku ngelakuko sunyinni sinji? Sapa sai ngeni hak seno jama Niku?”

³Isa ngejawab, “Nyak haga nanya. Cuba keni pandai pai Nyak,

⁴Yohanes ngebaptis makai hakni sapa? Allah api manusia?”

⁵Kak raduni mulaido tian berunding, “Kik ram nyawako, ‘Makai hak Allah,’ Ia haga cawa, ‘Kik reno, mengapi keti mawat percaya jama ia?’

⁶Kidang kik ram nyawako, ‘Makai hak manusia,’ unyinni jelma haga nayar ram jama batu, mani tian percaya kik Yohanes sai nabi.”

⁷Maka tian ngejawab, “Sekam mawat pandai.”

⁸Kak raduni Isa cawa jama tian, “Kik reno Nyak juga mawat haga nyawako jama keti makai hakni sapa Nyak ngeguaiko sunyinni inji.”

⁹ Isa nyeritako jama jelma-jelma udi, perumpamaan injuk reji, “Wat sai jelma nanom sebidang kebun anggor. Ia nyiwako kebun seno jama penggarap-penggarap kak raduni berangkat mik negeri sai bareh rik tinggal mesaka di negeri seno.

¹⁰Waktu radu sampai waktuni mutil uahni anggor, sai kedauni kebun seno ngirimko jelma sai ngelayani ia mik penggarap haga ngilu bagianni. Kidang penggarap-penggarap seno mukul jelma sai ngelayani ano rik ngayun jelma sai ngelayani ano mulang jama culuk bangkang.

¹¹Kak raduni sai kedau kebun seno ngirimko jelma sai ngelayani sai bareh; kidang jelma sai ngelayani seno dipukul juga rik dihina ulih penggarap-penggarap ano, kak raduni dikayunni mulang jama culuk bangkang.

¹²Kak raduni sai kedau kebun ano ngirimko jelma sai ngelayani sai ketelu. Kidang jelma sai ngelayani seno juga dipukul ulihni penggarap-penggarap seno rik ditokkoni mik luah kebun.

¹³Akherni sai kedau kebunni cawa, ‘Nyak haga ngerjako apilagi? Nyak haga ngirim anakku tenggalan sai kukasihi. Pasti ia dihormati tian!’

¹⁴Kidang waktu penggarap-penggarap kebun seno ngeliak anakni sai kedau kebun ano, tian cawa sai jama sai bareh, ‘Inji sai ahli warisni. Ija ram bunuh ia, in ram ngena warisanni.’

¹⁵Tian nyiret in mik luah kebun kak raduni dibunuh.” Kak raduni Isa nanya, “Nah, kik sai kedau kebun ano mulang, api sai haga dilakukoni jama penggarap-penggarap seno?

¹⁶Pasti ia haga ratong rik ngebunuh penggarap-penggarap ano, kak raduni nyerahko kebun ano jama penggarap-penggarap sai bareh.” Ngedengi seno, cawado jelma-jelma ano jama Isa, “Sekali-kali mawat!”

¹⁷ Isa ngeliak tian kak raduni cawa, “Kik reno, api retini ayat Alkitab sinji? ‘Batu sai mawat dipakai ulihni tukang bangunan, radu jadi batu sai paling utama.’

¹⁸Sunyinni jelma sai tumbak mik batu seno haga hancor; rik sapa sai kena batu ano haga tegilas jadi harbuk.”

¹⁹Guru-guru agama rik imam-imam kepala pandai kik perumpamaan seno ditujuko Isa jama tian. Mani ulihni seno tian haga nangkok Ia saat seno juga, kidang tian rabai jama jelma ramik.

²⁰Jadi tian nyepok kesempatan sai helau. Tian nyuap jelma in belaku sebagai jelma sai jujor, rik ngayun jelma-jelma seno ngejebak Isa jama pertanyaan-pertanyaan, in tian dapok nyerahko Ia jama wewenang rik kekuasaan gubernur.

²¹Kak raduni jelma-jelma sai radu disuap seno cawa jama Isa, “Pak Guru, sekam pandai kik unyinni sai Bapak cawako rik ajarko seno benor. Sekam pandai juga kik Bapak ngajar jama terus terang tentang kehaga Allah untuk manusia, mani Bapak mawat mandang jelma.

²²Ulihni seno cuba Bapak cawako jama sekam, nurut atoran agama neram, dapok kedo ngebayar pajak jama Kaisar api mawat?”

²³Kidang Isa pandai muslihatni tian. Mani ulihni seno Ia cawa,

²⁴“Cuba tunjukko jama Nyak sekeping duit perak. Gambar rik gelarni sapa inji?” “Kaisar!” jawabni tian.

²⁵“Kik reno,” cawani Isa jama tian, “keniko jama Kaisar, api sai jadi milikni Kaisar rik jama Allah api sai jadi milikni Allah.”

²⁶Ternyata di hadap jelma ramik tian mawat ngedapokko sai kesalahan pun jama Isa. Tian angkah ngehema gaoh rik kagum jama jawaban-Ni seno.

²⁷ Pira-pira jelma jak golongan Saduki ratong jama Isa. (Tian jak golongan sai bependapat bahwa jelma mati mawat dapok hurik luot.) Tian nanya jama Isa,

²⁸ “Bapak Guru, Musa nulis hukum inji untuk neram: Kik bakas mati rik ia mawat ngedok anak, kak raduni puarini haga kawin jama randani in ngeni keturunan jama jelma sai radu mati ano.

²⁹Pernah wat pitu jelma muari. Sai tuha kawin, kak raduni mati mak ngedok anak.

³⁰Kak raduni sai numor rua kawin jama randani sai mula-mula, kidang ia juga mati mak ngedok anak.

³¹Hal sai gegoh juga tejadi jama puarini sai ketelu rik seterusni sampai sai kepitu.

³²Akherni bebai randa ano mati juga.

³³Waktu ranini jelma mati dihurikko lagi, inggomni sapa udi? Sapa bebai seno? Mani kepitu-pituni radu kawin jama ia.”

³⁴Isa ngejawab, “Jelma-jelma sai hurik tano inji kawin,

³⁵kidang jelma-jelma sai layak dihurikko jak mati, rik hurik di zaman sai haga ratong, tian mak kawin.

³⁶Keadaanni tian injuk malaikat, rik mak dapok mati. Tian yakdo anak-anak-Ni Allah, mani tian radu dihurikko luot jak kematian.

³⁷ Musa tenggalan nyatako sai jelas kik jelma mati haga dihurikko luot. Delom tulisanni tentang belukar sai nyala ano ia nyebut Tuhan sebagai ‘Allah Abraham, Allah Ishak rik Allah Yakub’.

³⁸Nah, Allah udi lain hak Allahni ulun mati! Ia Allahni jelma sai hurik! Mani untuk Allah, sunyinni jelma hurik.”

³⁹Pira-pira guru agama cawa, “Jawaban Bapak Guru betik nihan.”

⁴⁰Ulihni seno tian mak bani lagi nanyako sai hal jama Isa.

⁴¹Isa nanya jama tian, “Repa bang dapok dicawako bahwa Raja Penyelamat keturunanni Daud?

⁴² Padahal Daud tenggalan sai cawa delom buku Mazmur, ‘Tuhan cawa jama Tuhanku: Mejong pai di kebelah kanan-Ku,

⁴³sampai Nyak nyani musuh-musuh-Mu tunduk jama Niku.’

⁴⁴Jadi kik Daud nyebut Raja Penyelamat ano ‘Tuhan’, repa bang Ia keturunan Daud?”

⁴⁵Waktu jelma-jelma ngedengi Isa cawa, Ia cawa jama jelma-jelma sai nutuk Ia,

⁴⁶ “Hati-hatido jama guru-guru agama. Tian gering lapah-lapah jama jubah sai kejung, rik gering dihormati di pasar-pasar. Tian gering rang-rang sai tehormat delom lamban ibadah rik di pesta-pesta.

⁴⁷Tian nipu randa-randa rik ngerampas lambanni. Rik untuk nyalok kejahatanni tian ano, tian bedua kejung-kejung! Hukumanni tian ano kanah mebiak!”