Read Lampung Api LUKAS 21 Bible Online

LUKAS 21 - Lampung Api bible

LUKAS 21

¹Di Lamban Ibadah, Isa ngeliak jelma-jelma batin ngurukko duit mik delom kutak persembahan.

²Ia juga ngeliak jelma sai, ia ano randa mejerih nihan, ngurukko rua keping duit tembaga.

³Kak raduni Isa cawa, “Dengiko: randa inji ngurukko lebih lamon jak sunyinni jelma sai bareh.

⁴Mani tian unyinni ngeni jak kelebihan hartani. Kidang randa inji, walaupun mejerih nihan, ngeniko sunyinni sai wat jama ia sai diperlukoni tenggalan in hurik.”

⁵Wat jelma-jelma sai cawa tentang repa helauni kik Lamban Ibadah dihias jama batu sai helau-helau rik jama barang-barang sai dipersembahko jama Allah. Kak raduni Isa cawa jama tian,

⁶“Kanah wat waktuni, sunyinni sai diliak keti inji haga dirubuhko; mak ngedok sai batu pun di dija sai haga tinggal tesusun di rangni!”

⁷Tian nanya jama Isa, “Bapak Guru, kapan kik hal seno haga tejadi? Rik api tandani kik radu sampai saatni hal seno haga tejadi?”

⁸Isa cawa, “Waspadado, dang sampai keti kena tipu. Lamon jelma haga ratong makai gelar-Ku, rik cawa, ‘Nyakdo Ia!’ rik ‘Radu waktuni.’ Kidang dang kik keti nutuk tian.

⁹Dang muneh merabai kik keti ngedengi kabar tentang peperangan rik pemberuntakan. Sunyinni ano haga tejadi pai. Kidang seno mak bereti kik radu waktuni kiamat.”

¹⁰Kak raduni Isa nerusko kicikan-Ni, cawa-Ni, “Bangsa sai haga beperang ngelawan bangsa sai bareh rik negara sai haga nyerang negara sai bareh.

¹¹Di dipa-dipa haga tejadi kukuk sai hibat, bahaya kebetohan rik wabah penyakik. Haga tejadi hal-hal sai mengeriko rik dasyat di langit.

¹²Kidang semakkung sunyinni seno tejadi, keti haga ditangkok rik dianiaya. Keti haga diadili di lamban-lamban ibadah rik dikurukko mik delom bui. Rik keti haga disiret mik hadap raja-raja rik jelma-jelma sai nguasai mani keti jelma sai nutuk Nyak.

¹³Senodo kesempatan bagimu untuk ngabarko Kabar Betik jak Allah.

¹⁴ Betekaddo bahwa keti mawat haga khuater tentang api sai haga keti cawako untuk ngebela diri.

¹⁵Nyakku tenggalan haga ngeniko cawa-cawa rik kebijaksanaan jama niku, in mak sai jelma pun jak musuh-musuhmu dapok ngelawan atau nyangkal api sai dicawako keti.

¹⁶Keti haga dikhianati ulih emak bakmu, ulih puari-puarimu, ulih sanak keluargamu rik ulihni kantik-kantikmu. Separo jak keti haga dibunuh tian.

¹⁷Keti haga dimusuhi ulih sunyinni jelma mani keti jelma sai nutuk Nyak.

¹⁸Kidang sai buok pun jak ulumu mak haga lebon.

¹⁹Kik keti betahan rik sabar, keti haga selamat.”

²⁰“Kik keti ngeliak Yerusalem digepung tentera, keti haga pandai kik kota seno mawat mesaka lagi haga hancor.

²¹Pada waktu seno jelma sai wat di Yudea haga lijung mik gunung. Tian sai wat delom kota haga ninggalko kota, rik tian sai di luah kota dang sampai kuruk mik delom kota.

²² Mani rani seno yakdo ‘Rani-rani Hukuman Dijatuhko’, in injuk reno tejadi api sai radu ditulis delom Alkitab.

²³Hara ngerini rani seno bagi bebai sai ngandung, rik bebai sai lagi nyusui upi! Negeri inji haga ngalami kesusahan balak, rik Tuhan haga ngehukum bangsa inji.

²⁴Wat sai haga dibunuh jama pedang, wat muneh sai haga diusung injuk tawanan mik negeri ulun bareh; rik jelma-jelma sai mawat ngenal Allah haga ngilik-ngilikko Yerusalem sampai bela waktu sai radu ditantuko Tuhan untuk tian.”

²⁵ “Kanah di matarani, bulan, rik bintang-bintang haga keliakan tanda-tanda. Di bumi, bangsa-bangsa haga merabai rik bingung ngehadapi deru rik bunyi gelumbangni lawok.

²⁶Jelma haga merabai setengah mati ngehadapi api sai haga tejadi di seluruh dunia inji, mani jelma-jelma bekuasa di angkasa raya haga jadi kacau balau.

²⁷ Waktu senodo Anak Manusia haga ratong delom awan jama kuasa rik kemuliaan sai balak.

²⁸Kik hal-hal seno radu tejadi, minjak rik iwakko ulumu, mani serebok lagi keti haga diselamatko.”

²⁹Kak raduni Isa cerita jama tian perumpamaan inji, cawa-Ni, “Perhatiko batang ara rik unyinni batang sai bareh.

³⁰Kik pucuk-pucukni mulai keliakan, retini keti pandai radu hamper musim panas.

³¹Reno muneh kik keti ngeliak hal seno tejadi, keti haga pandai bahwa Allah radu haga merintah injuk Raja.

³²In keti pandai! Hal-hal seno haga tejadi semakkung jelma-jelma sai hurik tano inji mati sunyinni.

³³Langit rik bumi haga lebon, kidang cawa-Ku selama-lamani.”

³⁴“Jaga dirimu, dang sampai keti sibuk pesta-pesta rik nginum inuman sai keras, atau mikerko masalah hurik, akherni keti mawat siap kik rani seno tecul tiba-tiba.

³⁵Mani Rani seno haga ratong injuk perangkap jama sunyinni jelma sai di bumi.

³⁶Bejaga-jagado, rik bedua selalu in keti kuat ngatasi sunyinni sai haga tejadi rik keti dapok ngehadap Anak Manusia.”

³⁷ Isa ngajar di Lamban Ibadah kak di rani, rik di bingi Ia mik Bukit Zaitun rik tinggal di dudi.

³⁸Unggal pagi sunyinni jelma ratong mik Lamban Ibadah haga ngedengiko Isa ngajar.