Read Lampung Api LUKAS 22 Bible Online

LUKAS 22 - Lampung Api bible

LUKAS 22

¹ Perayaan Ruti Mak Beragi sai disebut Paskah radu meredik.

²Imam-imam kepala rik guru-guru agama lagi nyepok ranglaya untuk ngebunuh Isa secara hema-hema, mani tian merabai jama jelma ramik.

³Kak raduni iblis kuruk di diri Yudas sai disebut muneh Iskariot, yakdo salah saini jak rua belas muridni Isa.

⁴Ulihni seno Yudas mik berunding jama imam-imam kepala rik kepala pengawal Lamban Ibadah tentang repa carani ia in dapok nyerahko Isa jama tian.

⁵Tian riang nihan rik bejanji haga ngehadiahko Yudas duit.

⁶Yudas setuju rik mulai nyepok kesempatan untuk nyerahko Isa jama tian, mak dipandai jelma.

⁷Sampai waktuni Perayaan Ruti Mak Beragi bahwa biri-biri untuk kanikan Paskah ditikol.

⁸Isa ngayun Petrus rik Yohanes, “Mikdo sediako kanikan Paskah untuk ram.”

⁹“Di dipa Bapak rang sekam nyiapkoni?” ani tian.

¹⁰Isa ngejawab, “Waktu keti kuruk kota, jelma bakas sai lagi ngusung sai kendi ngisi way haga betungga keti. Tutuk ia mik lamban sai dikurukni,

¹¹cawako jama sai kedau lamban ano: Guru cawa, ‘Dipa rangni jelma-jelma sai nutuk Nyak rik Nyak nganik kanikan Paskah?’

¹²Sai kedau lamban ano haga nunjukkoni jama niku kamar luteng sai balak, lengkap jama pekakasni. Siapko sunyinni di dudi.”

¹³Kak raduni mikdo Petrus rik Yohanes, dihaluni sunyinni injuk sai dicawako Isa. Tian nyediako kanikan Paskah udi.

¹⁴Waktu sampai waktuni nganik kanikan Paskah ano, Isa mejong jama jelma sai nutuk Ia di rang perjamuan.

¹⁵Ia cawa jama tian, “Nyak mirak nihan nganik kanikan Paskah inji jama keti semakkung Nyak sengsara!

¹⁶Mani, percayado: Nyak mak haga nganik inji lagi sampai reti jak perjamuan inji disampaiko di Dunia Ampai Allah.”

¹⁷Kak raduni Isa ngiwakko piala anggor, kak raduni ngucapko dua syukor jama Allah, kak raduni cawa, “Akuk inji, rik bagi-bagiko;

¹⁸mani in keti pandai: mulai tano inji Nyak mak haga lagi nginum anggor inji luot sampai Allah radu bekuasa, jama sepenuhni.”

¹⁹Radu jak seno Isa ngakuk ruti. Raduni Ia ngucapko dua syukor, Ia ngebelah-belah ruti jama culuk-Ni kak raduni ngeniko ano jama tian, rik cawa, “Injido badan-Ku [sai kuserahko jama keti. Guaiko inji in ngingokko Nyak.”

²⁰ Reno muneh seraduni jak mengan, Ia ngeniko piala anggor ano jama tian rik cawa, “Piala inji nunjukko Perjanjian Allah sai ampai, sai disahko jak rah-Ku — rah sai Kucurahko jama keti.”]

²¹ “Kidang liak! Jelma sai ngekhianati Nyak tano wat jama Nyak!

²²Anak Manusia sangun haga mati injuk sai ditantuko Allah; kidang celakado jelma sai ngekhianati Nyak!”

²³Tian mulai nanya peperda tian, sapa sai di hantara tian sai haga ngeguaiko ano.

²⁴ Jelma-jelma sai nutuk Isa betangkar tentang sapa di hantarani tian sai harus dianggap paling balak.

²⁵ Isa cawa jama tian, “Raja-raja bangsa sai mak ngenal Allah nindas rakyatni, rik ulun-ulun sai dikeni kuasa disebut ‘Pelindung Rakyat’.

²⁶ Kidang keti mak dapok injuk reno. Sebalikni, jelma sai paling balak haga jadi sai paling lunik, rik jelma sai mimpin haga jadi injuk jelma sai ngelayani.

²⁷ Sapa sai lebih balak: jelma sai mejong mengan di mija, atau jelma sai ngelayani ia? Tantu jelma sai mejong ano. Kidang Nyak wat di hantara keti sebagai jelma sai ngelayani.

²⁸Delom sunyin kesusahan-Ku, keti selalu jama-jama Nyak.

²⁹Injuk Bapa radu ngeniko hak memerintah jama Nyak, reno juga Nyak haga ngeniko hak ano jama niku.

³⁰ Ulihni seno keti ngasi nutuk besenang-senang jama Nyak waktu Nyak jadi Raja. Rik keti haga mejong di atas rua belas takhta untuk memerintah rua belas suku bangsa Israel.”

³¹“Simon, Simon, dengiko! iblis radu dikeni izin haga nguji niku; injuk gandum dipisahko jak bawakni injuk reno muneh sai betik dipisahko jak sai burak.

³²Kidang Nyak radu bedua untuk niku, Simon, in imanmu dang mesuh. Rik kik niku radu muloh jama Nyak, niku haga nguatko puari-puarimu.”

³³Petrus ngejawab, “Tuhan, nyak besedia kuruk penjara rik mati jama-jama Tuhan!”

³⁴“Percayado, Petrus,” ani Isa, “semakkung manuk ngakut rani inji, niku telu kali ngingkari Nyak.”

³⁵ Raduni Isa cawa jama tian, “Tumbai waktu Nyak ngutus keti tanpa ngizinko keti ngusung dumpet, kantong atau sepatu, api keti kekurangan api-api?” “Mawat!” cawani tian.

³⁶“Kidang tano,” ani Isa, “sapa sai ngedok dumpet atau kantong, haga diusungni; rik sapa sai mak ngedok pedang, haga ngejual jubahni untuk ngebeli pedang.

³⁷ Mani, percayado, ayat Alkitab sai bunyini injuk reji, ‘Ia dianggap penjahat,’ haga tejadi jama Nyak. Mani api sai tetulis delom Alkitab tentang Nyak lagi tejadi tano.”

³⁸“Tuhan,” ani jelma-jelma sai nutuk Isa, “liak, di dija wat rua pedang.” “Radudo!” jawab Isa.

³⁹Isa ninggalko kota rik mik injuk biasani di Bukit Zaitun, rik jelma-jelma sai nutuk Ia mik juga jama Ia.

⁴⁰Waktu sampai di dudi, Ia cawa jama tian, “Beduado in keti mak bedusa kik lagi dicubai.”

⁴¹Kak raduni Ia mik lebih jaoh jak tian, kekira sejaoh tayaran batu, kak raduni belutut rik bedua.

⁴²“Bapa,” cawa-Ni, “kik dapok, jaohko jak Nyak derita sai haga Kualami inji. Kidang dang nurut kehaga-Ku, kidang nurut kehagani Bapa gaoh.” [

⁴³Sai malaikat ratong jama Ia rik nguatko Ia.

⁴⁴Batinni Isa menderita nihan sehingga Ia temon-temon bedua. Hiting-Ni injuk rah netes mik tanoh.]

⁴⁵Radu jak bedua, Isa muloh luot mik jelma-jelma sai nutuk Ia. Ia ngehalu tian lagi pedom di delom kesedihan.

⁴⁶Kak raduni Ia cawa jama tian, “Mengapi keti pedom? Minjakdo rik bedua in keti mak kena cubaan.”

⁴⁷Waktu Isa lagi cawa, ratong serombongan jelma. Sai dipimpin ulihni Yudas, jelma-jelma sai nutuk Isa. Kak raduni Yudas mik Isa kak raduni nyium Ia.

⁴⁸Kidang Isa cawa jama Ia, “Yudas, api jama siuman ano niku haga ngekhianati Anak Manusia?”

⁴⁹Waktu jelma-jelma sai nutuk Isa sai wat di disan ngeliak api sai haga tejadi, tian cawa, “Tuhan, kuserang sekam jama pedang gaoh!”

⁵⁰Kak raduni salah sai jak tian nyerang hamba imam agung netak cuping kananni sampai putus.

⁵¹Kidang Isa cawa, “Adudo!” Kak raduni Ia nyadak cuping jelma seno rik diunyaiko-Ni.

⁵²Kak raduni Isa cawa jama imam-imam kepala rik perwira-perwira pegawai Lamban Ibadah, jama jelma-jelma sai mimpin Yahudi sai ratong mik disan haga nangkok Ia, “Api Nyak inji penjahat sampai keti ratong jama pedang rik pentungan untuk nangkok Nyak?

⁵³ Bidang rani Nyak wat jama keti di Lamban Ibadah, keti mak nangkok Nyak. Kidang inji saatni keti betindak, saat kuasa kekelaman nyancan peranan.”

⁵⁴Tian nangkok Isa rik ngusung Ia mik lamban imam agung. Petrus nutuk jak jaoh.

⁵⁵Di tengah-tengah tengebah ano apui unggun radu dinyalako rik Petrus mik mejong jama jelma-jelma sai mejong di kelilingni.

⁵⁶Wat sai jelma sai ngelayani bebai ngeliak Petrus mejong di pingger apui unggun ano; kak raduni jelma sai ngelayani bebai ano ngeperhatiko Petrus, kak raduni cawa, “Jelma inji juga jeno wat jama-jama Isa!”

⁵⁷Kidang Petrus mak ngaku. Ia cawa, “Nyak sama sekali mak kenal jama jelma udi!”

⁵⁸Kak raduni, jelma bareh ngeliak Petrus rik cawa, “Niku juga salah sai jak tian!” Kidang Petrus ngejawab, “Mawat, lain nyak!”

⁵⁹Kira-kira sejam jak seno, jelma bareh juga cawa sai keras, “Sangun jelma inji jelma sai nutuk Isa, mani ia juga jelma Galilea!”

⁶⁰Kidang Petrus ngejawab, “Api maksudmu, nyak mak pandai!” Waktu seno juga, waktu Petrus lagi cawa, manuk ngakut.

⁶¹Isa ngerilong rik ngeliak Petrus. Kak raduni Petrus ingok Tuhan radu cawa jama Ia, “Semakkung manuk ngakut rani inji, niku telu kali ngingkari Nyak.”

⁶²Kak raduni luahdo Petrus jak disan rik miwang tesedu-sedu.

⁶³Jelma-jelma sai lagi ngejaga Isa, ngemainko rik mukul Ia.

⁶⁴Tian nyalok mata-Ni nanya jama Ia, “Cuba tekok sapa sai mukul Niku?”

⁶⁵Lamon cawa-cawa sai ngehina barehni sai diucakko tian jama Ia.

⁶⁶Pagi ranini, jelma-jelma sai mimpin Yahudi, imam-imam kepala, rik guru-guru agama bekumpul, kak raduni Isa diusung di hadapan Mahkamah Agama tian.

⁶⁷“Cawako jama sekam,” ani tian jama Ia, “api niku inji Raja Penyelamat?” Isa ngejawab, “Kik Nyak ngucakko jama niku, keti mak percaya.

⁶⁸Rik kik Nyak nanya jama keti, keti mak haga ngejawab.

⁶⁹Kidang mulai tano, Anak Manusia haga mejong di kebelah kanan Allah Sai Mahakuasa.”

⁷⁰Tian unyinni cawa, “Kik reno, Niku inji Anak Allah?” Isa ngejawab, “Reno ani keti.”

⁷¹Kak raduni tian cawa, “Mak perlu lagi saksi! Sekam radu ngedengi jak banguk-Ni tenggalan!”