Read Lampung Api LUKAS 23 Bible Online

LUKAS 23 - Lampung Api bible

LUKAS 23

¹Sunyinni sai sidang ano cecok, kak raduni ngusung Isa mik hadap Pilatus.

²Di disan tian mulai nuduh Ia. Tian cawa, “Sekam ngehalu Jelma inji nyesekko rakyat. Ia ngehasut jelma in dang ngebayar pajak jama Kaisar, mani cawani Ia ano Almasih, sai juga Raja.”

³Kak raduni Pilatus nanya jama Isa, “Temon kedo Niku raja jelma Yahudi?” Isa ngejawab, “Reno cawamu.”

⁴Kak raduni ani Pilatus jama imam-imam kepala rik jelma ramik ano, “Nyak mak ngedapokko sai kesalahan pun jak Jelma inji untuk ngehukum Ia.”

⁵Kidang tian lebih ngedesak luot, “Jama ajaran-Ni, Ia ngehasut jelma di seluruh Yudea; mula-mula di Galilea, rik tano radu sampai muneh di dija.”

⁶Waktu Pilatus ngedengi ano, ia nanya, “Api Jelma inji jelma Galilea?”

⁷Waktu dikeni pandai kik Isa ratong jak daerah sai wat di debah kekuasaan Herodes, Pilatus ngirimko Isa jama Herodes, sai waktu seno wat juga di Yerusalem.

⁸Herodes riang nihan waktu ngeliak Isa, mani radu saka ia ngedengi tentang Ia rik mirak ngeliak-Ni. Ia ngeharap dapok nyaksiko Isa nyani keajaiban.

⁹Ulihni seno Herodes ngajuko lamon pertanyaan jama Ia, kidang Isa mak ngejawab sama sekali.

¹⁰Imam-imam kepala rik guru-guru agama ngehadap juga di disan rik keras nuduh Isa.

¹¹Herodes rik anggota-anggota tenterani ngemainko rik ngehina Isa, kak raduni makaiko Ia kawai kebesaran, kak raduni ngirim Ia muloh jama Pilatus.

¹²Waktu rani seno juga Herodes rik Pilatus, sai tumbai bemusuhan, bekantik luot.

¹³Pilatus ngumpulko imam-imam kepala, para jelma sai mimpin, rik rakyat,

¹⁴kak raduni cawa jama tian, “Keti ngusung Jelma inji jama nyak rik cawa kik Ia nyesekko jelma-jelma. Tano di hadap keti nyak radu meriksa Ia, kidang nyak sama sekali mak ngedapokko sai kejahatan sai dituduhko keti jama Ia.

¹⁵Reno juga ani Herodes, mani ia juga radu ngirimko Isa ano muloh jama sekam. Jelma inji mak ngelakuko api-api sai patut dihukum jama hukuman mati.

¹⁶Ulihni seno nyak haga nyebat Ia kak raduni kulepasko.” [

¹⁷Unggal perayaan Paskah, Pilatus haga ngelepasko sai jelma tahanan untuk rakyat.]

¹⁸Sunyinni jelma sai di disan ngayung, “Bunuh Ia! Lepasko Barabas untuk sekam!” (

¹⁹Barabas kuruk bui mani pemberuntakan sai tejadi di kota rik mani pembunuhan.)

²⁰Pilatus haga ngelepasko Isa, ulihni seno ia cawa sekali lagi jama jelma ramik ano.

²¹Kidang tian cawa, “Salibko Ia! Salibko Ia!”

²²Kak raduni untuk ketelu kalini Pilatus beseru jama tian, “Kidang api kesalahan-Ni? Nyak mak ngedapokko sai kesalahan pun jama Ia sai patut dihukum jama hukuman mati! Nyak haga nyebat Ia, kak raduni kulepasko.”

²³Kidang tian terus ngayung sekuat tenaga kik Isa haga disalibko. Rik akherni sai dikayungko tian behasil.

²⁴Pilatus ngeni hukuman mati jama Isa nutuk kehagani jelma-jelma ano,

²⁵rik ngelepasko jelma sai dikilu tian, yakdo jelma sai dipenjara mani pemberuntakan rik pembunuhan. Kak raduni Isa diserahko jama tian untuk diperlakuko sesuai kehagani tian.

²⁶Kak raduni Isa diusung ulihni tian. Di tengah ranglaya, tian betungga jelma sai gelarni Simon, sai asalni jak Kirene, sai lagi kuruk mik kota. Tian nahan ia, kak raduni maksa ia mikul kayu salib ano di kudanni Isa.

²⁷Lamon jelma nutuk lapah di kudanni Isa — di hantarani wat juga bebai. Bebai-bebai ano miwang rik ngebatui Isa.

²⁸Kidang Isa ngerilong jama tian rik cawa, “Bebai-bebai Yerusalem! Dang ngehiwangi Nyak. Hiwangi dirimu tenggalan rik anak-anakmu.

²⁹Mani haga ratong waktuni jelma haga cawa, ‘Hara beruntungni bebai-bebai sai mak pernah ngandung, sai mak pernah ngedok anak rik mak pernah nyusui upi!’

³⁰ Waktu seno jelma haga cawa jama gunung-gunung, ‘Timpa sekam!’ Rik jama bukit-bukit, ‘Timpa sekam!’

³¹Mani kik jama kayu sai lagi hurik, jelma radu bebuat injuk reji, api muneh sai haga dilakuko tian jama kayu sai radu menyangu!”

³²Wat muneh jelma rua sai bareh — rua-ruani penjahat — sai diusung tian untuk dihukum mati jama-jama Isa.

³³Waktu sampai di rang sai disebut “Tengkorak”, tian nyalibko Isa rik rua penjahat ano — sai di kebelah kanan rik sai lagi di kebelah kiri Isa.

³⁴ Kak raduni Isa bedua, “Bapa, ampunko tian! Tian mak pandai api sai dilakuko tian.” Kawaini Isa dibagi-bagiko di disan di hantarani tian liwat lotre.

³⁵ Jelma-jelma cecok di disan sambil nunton, sementara jelma-jelma sai mimpin Yahudi ngereneh Isa jama cawa, “Ia radu nyelamatko jelma bareh; cuba tano Ia nyelamatko diri-Ni tenggalan, kik Ia temon-temon Raja Penyelamat sai dipilih Allah!”

³⁶ Prajurit-prajurit juga ngereneh Ia. Tian ratong rik ngeni anggor peros jama Ia

³⁷rik cawa, “Kik Niku raja jelma Yahudi, selamatko diri-Mu!”

³⁸Di kebelah atas kayu salib Isa, tetulis tulisan inji: “Injido Raja Jelma Yahudi.”

³⁹Salah sai jak penjahat sai disalib ano ngehina Isa. Ia cawa, “Niku Raja Penyelamat, kan? Nah, selamatko diri-Mu rik sekam!”

⁴⁰Kidang penjahat sai lagi negor kantikni ano, “Api niku mak merabai jama Allah? Niku gegoh dihukum mati injuk Ia.

⁴¹Angkah hukuman ram rua sangun setimpal jama perbuatan neram. Kidang Ia sama sekali mak besalah!”

⁴²Kak raduni ia cawa, “Isa, ingokko nyak, kik Niku ratong sebagai Raja!”

⁴³“Percayado,” cawani Isa jama ia, “rani inji niku haga jama-jama Nyak di surga.”

⁴⁴Kira-kira pukul rua belas tengah rani, matarani mak besinar, rik seluruh negeri ano jadi mekelam sampai pukul telu dibi.

⁴⁵ Hordeng sai tegantung delom Lamban Ibadah, sarak jadi rua.

⁴⁶ Kak raduni Isa ngayung jama suara sai keras, “Bapa! Delom culuk-Mu Kuserahko diri-Ku!” Radu jak cawa seno, Ia mati.

⁴⁷Waktu perwira pasukan ngeliak api sai radu tejadi, ia memuji Allah. Kak raduni ia cawa, “Temon, Ia mak besalah!”

⁴⁸Jelma ramik sai ratong di disan untuk nunton, ngeliak api sai tejadi. Tian unyinni mulang jama hati sai nyesol nihan.

⁴⁹ Rik sunyinni kenalan Isa, termasuk bebai-bebai sai nutuk Ia jak Galilea, cecok jak jaoh rik ngeliak sunyinni ano.

⁵⁰Wat jelma sai gelarni Yusuf, sai asalni jak kota Arimatea di negeri Yudea. Ia jelma betik sai dihormati jelma, rik ia lagi nunggu waktuni Allah mulai merintah sebagai Raja. Walaupun ia anggota Mahkamah Agama, ia mak setuju jama keputusan rik tindakan mahkamah ano.

⁵¹

⁵²Yusuf ano mik ngehadap Pilatus rik ngilu in mayat Isa dikeniko jama ia.

⁵³Kak raduni ia ngeregahko mayat Isa jak kayu salib, kak raduni ngebungkusni jama kain kafan jak kain linen. Kak raduni ia ngepikkoni delom kuboran sai disani delom bukit batu — kuboran ano mak pernah tepakai.

⁵⁴Rani seno rani Jumat; rik rani Sabat hamper mulai.

⁵⁵Bebai-bebai sai ratong jama Isa jak Galilea nutuk Yusuf rik ngeliak kuboran ano. Tian ngeliak juga repa mayat Isa dipikko delom kubor.

⁵⁶ Kak raduni tian mulang kak raduni nyiapko ramuan-ramuan rik minyak wangi untuk ngeminyaki mayat Isa. Waktu rani Sabat, tian taru beguai untuk naati hukum agama.