Read Lampung Api LUKAS 3 Bible Online

LUKAS 3 - Lampung Api bible

LUKAS 3

¹Waktu tahun kelima belas jak pemerintahanni Kaisar Tiberius, Pontius Pilatus jadi gubernur di Yudea, rik Herodes memerintah di Galilea. Filipus, puarini Herodes memerintah di wilayah Iturea rik Trakhonitis, sedang Lisanias memerintah di Abilene.

²Sai jadi imam-imam agung yakdo Hanas rik Kayafas. Pada tahun senodo Allah cawa jama Yohanes, anakni Zakharia di gurun heni.

³Kak raduni Yohanes mik dipa-dipa dipelosok Way Yordan sambil nyampaiko kabar jak Allah. Yohanes cawa, “Betubatdo keti jak dusa-dusamu, rik keti haga dibaptis, in Allah ngampuni keti.”

⁴ Unyinni ano wat tetulis di delom buku Nabi Yesaya: “Wat jelma beseru-seru di gurun heni, ‘Siapko renglaya untuk Tuhan, ratako renglaya untuk Ia.

⁵Unyinni lembah musti ditimbun, unggal gunung rik bukit diratako. Renglaya sai biluk-biluk musti dilurusko, rik renglaya sai lekak-lekuk diratako.

⁶Manusia-manusia delom dunia haga ngeliak Allah nyelamatko umat-Ni!’ ”

⁷ Lamon ulun-ulun ratong jama Yohanes untuk dibaptis. Yohanes cawa jama tian, “Keti jelma jahat! Sapa sai ngucakko bahwa keti dapok luput jak hukuman Allah sai haga ratong?

⁸ Tunjukko delom perbuatanmu bahwa niku radu betubat jak dusa-dusamu! Dang cawa bahwa Abraham nenek muyangmu. Ingok: Jak batu-batu inji pun Allah sanggup nyani keturunan untuk Abraham!

⁹ Kapak radu siap untuk melok batang sampai bakak-bakakni. Unggal batang sai mak ngehasilko uah sai betik haga dipelok rik ditokko mik delom apui.”

¹⁰“Jadi, api sai haga sekam lakuko?” tanya ulun-ulun jama Yohanes.

¹¹Yohanes ngejawab, “Jelma sai ngedok rua kawai, mesti ngeniko sai kawai jama jelma sai mak tinggal kawai; rik jelma ngedok sai kanikan, musti ngebagikoni.”

¹² Tukang tagih pajak ratong jama Yohanes untuk dibaptis. Tian betanya, “Bapak Guru, api sai haga sekam guaiko?”

¹³Yohanes ngejawab, “Dang nagih lebih lamon jak sai radu ditantuko.”

¹⁴Wat juga prajurit sai betanya, “Repa juga sekam? Api sai haga sekam guaiko?” Yohanes ngejawab, “Dang memeras jama sapa pun rik dang ngerampas duit jama tuduhan-tuduhan palsu. Puasdo jama gajimu!”

¹⁵Waktu seno, ulun-ulun betanya-tanya, api kedo Yohanes Raja Penyelamat sai lagi ditunggu-tunggu.

¹⁶Reno sebabni Yohanes cawa jama tian unyinni, “Nyak ngebaptis keti jama way, kidang kanah wat haga ratong Jelma sai lebih balak jak nyak. Ngebukak tali sepatu-Ni pun nyak mak layak. Ia haga ngebaptis keti jama Ruh Allah rik apui.

¹⁷Diculuk-Ni wat nyu untuk napi gandum-Ni sampai mekecah. Gandum ano dikumpulko-Ni delom lumbung, kidangni unyinni huokni haga disuah-Ni delom apui sai mak pernah padam!”

¹⁸Injuk renodo Yohanes ngenasihatko jelma-jelma jama macam-macam cara selagi ia nyampaiko Kabar Betik.

¹⁹ Sewaktu Herodes, jelma sai bekuasa di Galilea, dikeni petuah ulih Yohanes tentang perkawinanni jama Herodias, inggomni puarini, rik juga kejahatan lain sai radu dilakukoni.

²⁰Kidangni Herodes tambah jahat, ia ngurukko Yohanes delom bui.

²¹Waktu radu sunyinni jelma dibaptis, Isa juga dibaptis. Rik waktu Ia sedang bedua, langit tebukak,

²² rik Ruh Allah injuk burung merpati hinggap jama Ia. Kak raduni kedengian suara Allah ngucakko, “Nikudo Anak-Ku sai Kusayangi. Niku nyenangko hati-Ku.”

²³Waktu Isa mulai jama tugas-Ni, umor-Ni kira-kira telu puluh tahun. Nurut pikeran ulun bareh, Ia anak Yusuf, anak Eli,

²⁴anak Matat, anak Lewi, anak Malkhi, anak Yanai, anak Yusuf,

²⁵anak Matica, anak Amos, anak Nahum, anak Hesli, anak Nagai,

²⁶anak Maat, anak Matica, anak Simei, anak Yosekh, anak Yoda,

²⁷anak Yohanan, anak Resa, anak Zerubabel, anak Sealtiel, anak Neri,

²⁸anak Malkhi, anak Adi, anak Kosam, anak Elmadam, anak Er,

²⁹anak Yesua, anak Eliezer, anak Yorim, anak Matat, anak Lewi,

³⁰anak Simeon, anak Yehuda, anak Yusuf, anak Yonam, anak Elyakim,

³¹anak Melea, anak Mina, anak Matata, anak Natan, anak Daud,

³²anak Isai, anak Obed, anak Boas, anak Salmon, anak Nahason,

³³anak Aminadab, anak Admin, anak Arni, anak Hezron, anak Peres, anak Yehuda,

³⁴anak Yakub, anak Ishak, anak Abraham, anak Terah, anak Nahor,

³⁵anak Serug, anak Rehu, anak Peleg, anak Eber, anak Salmon,

³⁶anak Kenan, anak Arpakhsad, anak Sem, anak Nuh, anak Lamekh,

³⁷anak Metusalah, anak Henokh, anak Yared, anak Mahalaleel, anak Kenan,

³⁸anak Enos, anak Set, anak Adam, anak Allah.