Read Lampung Api LUKAS 4 Bible Online

LUKAS 4 - Lampung Api bible

LUKAS 4

¹Isa dikuasai Ruh Allah waktu Ia ninggalko Way Yordan. Ruh Allah mimpin Ia mik gurun heni.

²Di dudi Ia dicubai ulih iblis selama pak puluh rani, Ia mak nganik api-api. Akherni Ia mebetoh.

³Iblis cawa jama Ia, “Niku kan Anak-Ni Allah? Cuba, ubah batu ano jadi ruti.”

⁴ Isa ngejawab, “Delom Alkitab tetulis, ‘Jelma mak dapok hurik jak ruti gaoh.’ ”

⁵Kak raduni iblis ngusung Isa mik rang sai langgar, delom sekejap mata iblis nunjukko jama Ia sunyinni kerajaan dunia.

⁶“Sunyinni kekuasaan rik harta dunia ajo haga kuserahko jama Niku,” cawa iblis jama Isa, “mani sunyinni ajo nyak sai sekedauni rik nyak dapok ngenini jama sapa gaoh sekehagaku.

⁷Sunyinni ano jadi milik-Mu, asal Niku nyumbah jama nyak.”

⁸ Isa ngejawab, “Di delom Alkitab tetulis, ‘Sumbahdo Tuhan Allahmu rik layani Ia gaoh.’ ”

⁹Kak raduni iblis ngusung Isa mik Yerusalem dipikkoni dibubunganni Lamban Ibadah rik ia cawa jama Isa, “Niku kan Anak Allah? Jadi, lumpatdo niku jak ija.

¹⁰ Mani di delom Alkitab tetulis, ‘Allah haga ngayun malaikat-malaikat-Ni ngejaga Niku betik-betik.’

¹¹ Rik muneh, ‘Malaikat-malaikat haga nyambut Niku jama culuk tian, in cukut-Mu mak kena batu.’ ”

¹² Isa ngejawab, “Delom Alkitab tetulis, ‘Dang nyubai Tuhan, Allahmu.’ ”

¹³Seraduni iblis nyuba Isa jama sunyin macam cara, ia ninggalko Isa, nunggu waktu sai betik untuk nyubai Isa lagi.

¹⁴Kak raduni Isa muloh mik Galilea; Ia dikuasai ulih-Ni Ruh Allah. Kabar tentang diri-Ni ajo tesebar di daerah seno.

¹⁵Ia ngajar di lamban-lamban ibadah, rik sunyinni jelma memuji Ia.

¹⁶Isa mik muneh mik Nazaret, rangni Ia dibalakko. Waktu rani Sabat, nutuk kebiasaan-Ni Ia mik di lamban ibadah. Ia cecok haga ngebaca Alkitab,

¹⁷Ia dikeni buku Nabi Yesaya. Ia ngebukak gulungan buku seno, dihalu-Ni ayat inji,

¹⁸ “Ruh Tuhan wat jama Nyak-Ku, mani Ia radu memilih Nyak-Ku untuk nyampaiko Kabar Betik inji jama jelma mejerih. Ia ngayun Nyak-Ku untuk ngumumko pembebasan jama ulun sai tebelenggu rik ngunyaiko jelma buta; untuk ngebebasko jelma sai tetindas.

¹⁹rik ngabarko ratongni waktu Tuhan, nyelamatko umat-Ni.”

²⁰Isa ngegulung luot buku inji, rik diulohkoni jama petugas, kak raduni mejong. Sunyinni jelma sai di delom lamban ibadah seno ngeliak jama Ia.

²¹Isa mulai cawa jama tian, “Ayat-ayat Alkitab inji cukup terpenuhi waktu keti ngedengi rani inji.”

²²Kalimat sai disampaiko-Ni helau nihan, hingga tian nyukong rik kagum jama Ia. Tian cawa, “Kan Ia ano anakni Yusuf?”

²³Isa cawa jama tian, “Pasti keti haga makai kata kiasan inji jama Nyak-Ku, ‘Dokter, unyaiko pai diri-Mu tenggalan. Keajaiban sai sekam dengi Niku guaiko di Kapernaum, guaiko juga di tiyuh-Mu tenggalan.’ ”

²⁴ Isa cawa, “Ingok, mak ngedok nabi sai dihormati di pekonni tenggalan.

²⁵ Kidang dengiko: Di zamanni Elia, mak ratong labung selama 3 1/2 tahun, tejadi kebetohan sai hibat di dipa-dipa. Waktu seno wat lamon randa-randa di Israel.

²⁶ Walau injuk reno, Allah mak ngayun Elia mik jama salah sai randa-randa seno melainko mik jama angkah sai randa di Sarfat di daerah Sidon.

²⁷ Reno muneh di zamanni Nabi Elisa wat lamon jelma di Israel bepenyakik bawak sai ngeri nihan, kidangni mak ngedok sai jelma pun jak tian sai diunyaiko, kecuali Naaman ulun Siria.”

²⁸Sunyinni jelma di lamban ibadah udi butong nihan waktu ngedengi cawa seno.

²⁹Tian cecok raduni nguser Isa mik luah kota, rik ngusung Ia mik tebing gunung, di dipa kota tian dibangun. Tian bemaksud ngedurong Ia mik delom rulah.

³⁰Kidangni Isa nerubos ulun lamon terus lijung.

³¹Kak raduni Isa mik di kota Kapernaum di Galilea. Di disan Ia ngajar jama jelma-jelma waktu rani Sabat.

³² Tian kagum ngeliak carani Ia ngajar, mani Ia cawa penuh wibawa.

³³Di lamban ibadah ano wat sai jelma sai dikuasai ruh jahat. Jelma udi mekik-mekik,

³⁴“Hai Isa, jelma Nazaret, Niku haga ngapi jama sekam? Niku ratong untuk ngebinasako sekam? Nyak pandai sapa Niku: Niku ano utusan suci jak Allah!”

³⁵“Hema niku!” cawa Isa jama ruh jahat ano. “Luah niku jak jelma ajo!” Kak raduni ruh jahat udi ngebanting jelma seno di hadap tian sunyinni, kak raduni luah jak jelma sai kekurukan ruh jahat ano mak nyakikko jelma seno.

³⁶Sunyinni jelma hiran, rik cawa jama jejama tian, “Bukan main perintah-perintah-Ni. Jama wibawa rik kuasa-Ni, Ia merintahko ruh-ruh jahat luah, rik tian patuh!”

³⁷Cerita tentang Isa tesebar di wilayah seno.

³⁸Isa ninggalko lamban ibadah ano, raduni mik lambanni Simon. Mak mentuhani Simon lagi meruyuh, ulun-ulun bareh ngeni pandai hal seno jama Isa.

³⁹Isa mik rang pedom bebai seno, Ia nguser ruyuh seno. Ruyuh seno munyai, rik mak mentuhani Simon geluk minjak langsung ngelayani tian.

⁴⁰Waktu matarani lagi tebenam, jelma lamon ngusung jama Isa puari-puarini sai lagi kena macam-macam penyakik. Isa ngepikko culuk-Ni mik atas uluni tian masing-masing rik ngunyaiko penyakikni.

⁴¹Ruh jahat pun luah jak jelma lamon, sambil mekik-mekik, “Niku ano Anak-Ni Allah!” Kidang Isa ngebentak tian rik mak ngizinko tian cawa, mani tian pandai bahwa Ia ano Raja Penyelamat.

⁴²Waktu matarani mulai terbit Isa ninggalko kota inji mik suatu rang sai mangi. Ulun-ulun mulai nyepok Ia, waktu tian betungga jama Ia, tian berusaha in Ia dang ninggalko tian.

⁴³Kidang Isa cawa, “Kabar Betik tentang injuk repa Allah merintah Nyak mesti nyampaiko juga di kota-kota bareh, mani untuk senodo Allah ngutus Nyak mik dunia.”

⁴⁴Ulih senodo Isa bekhotbah di lamban-lamban ibadah di seluruh negeri Yudea.