Read Lampung Api LUKAS 5 Bible Online

LUKAS 5 - Lampung Api bible

LUKAS 5

¹ Suatu rani, Isa cecok dipingger Danau Genesaret. Lamon jelma bedesak-desakan untuk ngedengi kabar jak Allah.

²Isa ngeliak rua jukung di pantai ano; nelayan-nelayanni radu regah jak jukung-jukung udi rik lagi ngebasuh jala tian.

³Isa cakak disalah sai jukung seno, yakdo jukungni Simon, raduni ngayun Simon ngedurong jukungni jaoh cutik jak pantai. Isa mejong delom jukung rik ngajar jelma lamon.

⁴Seraduni Ia ngajar, Ia cawa jama Simon, “Bedayungdo mik rang sai relam, rik tebarko jalamu untuk nyepok iwa.”

⁵ “Bapa Guru,” jawab Simon, “sebingi inji sekam kerja keras, kidang mak mansa api-api! Kidang ulih Bapak sai ngayun, payudo; nyak haga nyebarko jala luot.”

⁶ Seraduni tian ngeguaiko seno, tian mansa lamon iwa sampai jalani cabik.

⁷Makani tian ngilu tulung jama kantik-kantikni di jukung sai bareh. Kantik-kantikni tian ratong raduni, jejama ngisi rua jukung seno latap jama iwa sampai jukung-jukung ano hamper tebenam.

⁸Waktu Simon ngeliak ano, ia sujud di hadap Isa, rik cawa, “Tinggalko nyak, Tuhan! Mani nyak jelma bedusa!”

⁹Simon rik sunyinni jelma sai jejama jama ia hiran ngeliak lamonni iwa sai tian mansa.

¹⁰Reno muneh kantik-kantikni Simon, Yakobus jama Yohanes, anak-anak Zebedeus. Isa cawa jama Simon, “Dang rabai! Mulai jak tano niku haga kujadiko penjala jelma.”

¹¹Simon jama kantik-kantikni narik jukung mik pantai, ditinggalkoni unyinni, kak raduni tian nutuk jama Isa.

¹²Suatu rani, Isa wat di suatu kota. Di dudi wat sai bakas sai badanni latap kusta sai mengeriko. Waktu ia ngeliak Isa, ia sujud dihadapni Isa sambil memohon, “Pak, kik Bapak haga, Bapak dapok ngunyaiko nyak!”

¹³Isa nyating jelma sedi rik cawa, “Nyak haga, munyaido niku!” Waktu seno juga penyakikni munyai.

¹⁴ Isa ngelarang jelma udi nyeritako hal seno jama sapa pun, cawa-Ni, “Mik niku jama imam, kilu jama ia untuk memastiko niku radu munyai. Radu niku ngeniko kurban injuk sai diperintahko Musa, sebagai bukti jama ulun bahwa niku radu munyai.”

¹⁵Kabar tentang Isa makin tesebar mik dipa-dipa, rik lamon jelma sai ratong untuk ngedengi-Ni rik untuk munyaiko penyakikni tian.

¹⁶Seraduni seno Isa mik bedua di rang sai mangi.

¹⁷Suatu rani waktu Isa lagi ngajar, wat pira jelma Farisi rik guru-guru agama mejong di disan. Tian ratong jak Yerusalem, rik jak kota-kota di Galilea rik Yudea. Kuasa Tuhan wat jama Isa untuk ngunyaiko jelma-jelma sai meruyuh.

¹⁸Waktu seno pira-pira jelma ratong ngusung sai jelma lumpuh sai pedom di atas apai. Tian berusaha ngusung jelma seno mik delom lamban in dapok ngepikko ia di hadap Isa.

¹⁹Mani jelma terlalu lamon di disan, tian mak dapok ngusungni kuruk. Makani tian nyakakko ia mik atas hatok lamban seno, radu tian ngebungkar hatok, rik ngeregahko ia jama apaini mik hadapan Isa di tengah-tengah ulun lamon seno.

²⁰Waktu Isa ngeliak hara balakni imanni tian, Ia cawa jama ulun seno, “Puari, dusamu radu diampuni.”

²¹Guru-guru agama rik jelma-jelma Farisi mulai cawa jama tian, “Sapa jelma sinji sai bani ngehina Allah? Sapa sai ngasi ngampuni dusa, selain Allah tenggalan?”

²²Isa pandai cawa seno. Maka Ia cawa, “Mengapi keti betanya-tanya injuk reno delom hati?

²³Dipa sai lebih mudah, ngucakko, ‘Dusamu radu diampuni’, atau ngucakko, ‘Minjak rik lapahdo!’?

²⁴Makani tano Nyak haga ngebuktikoni jama keti bahwa di atas bumi inji Anak Manusia bekuasa untuk ngampuni dusa.” Raduni Isa cawa jama jelma sai lumpuh udi, “Minjakdo, iwakko rang pedommu, rik mulangdo niku!”

²⁵Geluk ia minjak jak hadapan tian unyinni, diiwakkoni rang pedomni, rik mulang sambil memuji Allah.

²⁶Tian unyinni kagum nihan sambil memuji Allah. Rik jama rasa rabai, tian cawa, “Ajaib nihan peristiwa sai neram liak rani inji!”

²⁷Radu jak seno Isa mik luah, Ia ngeliak jelma penagih pajak, gelarni Lewi, lagi mejong di kantorni. Isa cawa jama ia, “Tutuk Nyak.”

²⁸Lewi cecok rik ia ninggalko sunyinni, terus nutuk Isa.

²⁹Radu jak seno Lewi pesta di lambanni untuk nyambut Isa. Lamon tukang tagih pajak rik jelma-jelma nutuk mengan jejama jama tian.

³⁰ Wat pira jelma Farisi rik guru-guru agama mak senang, tian cawa jama jelma-jelma sai nutuk Isa, “Mengapi keti mengan rik nginum jejama penagih pajak ano, tian kan jelma mak benor?”

³¹Isa ngejawab, “Jelma sai sihat mak perlu dokter, angkah jelma sai meruyuh sai perlu.

³²Nyak ratong lain hak untuk ngurau jelma sai nganggap dirini radu benor, melainko jelma-jelma sai bedusa in tian betubat jak dusa-dusa tian.”

³³Jelma-jelma cawa jama Isa, “Jelma sai nutuk Yohanes rik jelma sai nutuk jelma Farisi risok puasa rik bedua. Kidangni jelma sai nutuk Niku mengan rik nginum.”

³⁴Isa ngejawab, “Api keti dapok ngayun kuari bepuasa di pesta kawin, sewaktu kemantin masih jejama tian? Tantu mawat!

³⁵Kidangni wat waktuni kemantin haga diakuk jak tian. Pada waktu senodo tian ampai puasa.”

³⁶Radu seno Isa nyeritako jama tian perumpamaan inji, “Mak ngedok jelma nambal kawai saka jama kain jak kawai ampai. Sebab ia nyabikko kawai sai ampai udi. Lagi muneh kain penambal sai ampai ano mak cucok jama kawai sai tuha.

³⁷Reno muneh mak ngedok jelma sai nuangko anggor sai ampai delom pakai kantong bawak sai saka, mani anggor sai ampai haga nyebabko kantong udi pecoh. Maka anggorni tetok, rik kantongni cadang.

³⁸Anggor sai ampai, haga dituang delom kantong sai ampai muneh.

³⁹Reno muneh mak ngedok jelma sai haga nginum anggor ampai kik radu jak nginum anggor saka. ‘Anggor sai saka lebih bangik,’ cawani.”