Read Lampung Api LUKAS 7 Bible Online

LUKAS 7 - Lampung Api bible

LUKAS 7

¹Seraduni ngucakko hal-hal seno jama jelma lamon, Isa mik Kapernaum.

²Di disan wat perwira Roma sai ngedok jelma sai ngelayani sai disayangni. Jelma sai ngelayani ia ano meruyuh hamper mati.

³Waktu perwira seno ngedengi tentang Isa, ia ngayun pira jelma sai mimpin di Yahudi mik jama Isa untuk ngilu in Ia ratong untuk ngunyaiko penyakik jelma sai ngelayani ia ano.

⁴Waktu sampai jama Isa, jelma-jelma udi ngilu nihan in Ia nulung perwira udi. “Perwira inji layak ditulung, ulih Bapak,” ani tian jama Isa,

⁵“mani ia menyayangi bangsa neram rik radu ngebangun lamban ibadah untuk sekam.”

⁶Raduni Isa mik jama-jama tian. Waktu Isa hamper sampai di lambanni perwira udi, perwira udi ngayun kantik-kantikni mik jama Isa ngucakko, “Dang hak bapak besusah-susah mik lambanku. Nyak mak patut nerima Bapak di lambanku.

⁷Reno sebabni nyak tenggalan mak bani ngehadap Bapak. Keni perintah gaoh in jelma sai ngelayani nyak ano munyai.

⁸Mani nyak pun tunduk jama perintah atasan rik di debahku wat juga prajurit-prajurit sai mesti tunduk jama perintahku. Kik nyak ngayun prajuritku, ‘Mik!’ ia pun mik; kik nyak ngucakko jama sai bareh, ‘Mik dija!’ ia pun ratong. Kik nyak merintahko jelma sai ngelayani nyak, ‘Guaiko inji!’ ia pun ngeguaikoni.”

⁹Isa hiran ngedengi seno. Ia ngeliak mik kudan rik cawa jama jelma lamon sai lagi nutuk Ia, “Bukan main jelma inji. Di hantara jelma Israel pun makkung pernah Nyak betungga jama jelma beriman sebalak inji!”

¹⁰Waktu jelma-jelma sai dikayun seno muloh mik lamban perwira udi, jelma sai ngelayani udi radu munyai.

¹¹Mak mesaka jak seno, Isa mik kota Nain. Jelma-jelma sai nutuk Ia rik jelma lamon mik jama Ia.

¹²Waktu Isa sampai di redik gerbang kota, wat ulun lamon lagi ngantakko ulun mati mik luah kota. Sai mati, sanak bakas, anak hehanani bebai randa. Lamon jelma kota mik jejama jama bebai randa seno.

¹³Waktu Tuhan Isa ngeliak bebai seno, Ia kesian jama ia cawa-Ni, “Dang miwang niku!”

¹⁴Kak raduni Isa redik usungan mayat seno, rik ditilutni. Maka jelma-jelma sai ngusung mayat ano taru. Isa cawa, “Hai sanak ngura, Nyak ngayun niku minjak!”

¹⁵Sanak ngura sai radu mati ano, minjak raduni, mejong rik mulai cawa. Isa nyerahkoni jama emakni.

¹⁶Sunyinni jelma rabai rik tian mulai memuji Allah. Tian cawa, “Nabi sai agung radu ratong di tengah-tengah ram! Allah radu ratong untuk nyelamatko umat-Ni!”

¹⁷Kabar tentang Isa inji tesebar di seluruh Yudea rik daerah sekitarni.

¹⁸Jelma-jelma sai nutuk Yohanes ngeni pandai jama ia sunyinni peristiwa inji. Kak raduni Yohanes ngurau rua jelma sai nutuk ia.

¹⁹Rik ngayun tian mik jama Tuhan Isa rik nanya, “Bapak kedo, ulun sai haga ratong nurut janji Allah, atau sekam masih haga nunggu ulun bareh?”

²⁰Kerua jelma sai nutuk Yohanes ano mik jama Isa rik cawa, “Yohanes Pembaptis ngayun sekam betanya jama Bapak, api kedo Bapak jelma sai haga ratong menurut janji Allah, atau sekam masih haga nunggu ulun bareh?”

²¹Waktu seno, Isa munyaiko jelma lamon rik nguser lamon ruh jahat rik lamon ulun buta dapok ngeliak.

²² Isa ngejawab, “Mulohdo keti jama Yohanes, keni pandai ia api sai radu didengi rik diliak keti: ulun buta ngeliak, ulun lumpuh dapok lapah, ulun sai bepenyakik kusta, munyai, jelma metilu ngedengi, jelma mati hurik luot, rik Kabar Betik jak Allah disampaiko jama jelma-jelma mejerih.

²³Bebahagiado jelma sai mak ngedok alasan untuk nulak Nyak.”

²⁴Waktu utusan-utusan Yohanes radu mik, Isa cawa jama ulun tentang Yohanes, cawa-Ni, “Keti mik padang gurun untuk ngeliak api? Ngeliak jukuk sai ditiup angin kedo?

²⁵Keti mik haga ngeliak api? Ngeliak jelma sai bekawai helau kedo? Jelma-jelma sai bekawai helau rik hurik mewah tinggal di istana!

²⁶Kik keti luah haga ngeliak api? Untuk ngeliak nabi kedo? Temondo, malah lebih jak ngeliak nabi.

²⁷ Mani Yohanes anodo sai dimaksud delom ayat Alkitab inji, ‘Injido utusan-Ku,’ ani Allah, ‘Nyak haga ngutus ia lebih mena jak Niku, in ia ngebuka renglaya untuk-Mu!’ ”

²⁸“Ingok,” cawa Isa, “di dunia inji mak pernah wat jelma sai lebih balak jak Yohanes Pembaptis. Kidang jelma sai paling lunik di hantara umat Allah, lebih balak jak Yohanes Pembaptis.”

²⁹ Sunyinni jelma — termasuk penagih-penagih pajak — ngedengi Isa ngucakko hal seno; tiando sai jelma radu mentaati tuntutan-tuntutan Allah rik haga dibaptis ulihni Yohanes.

³⁰Kidangni ulun-ulun Farisi rik guru-guru agama mak haga nerima rencana Allah untuk dirini tenggalan. Tian mak haga dibaptis ulihni Yohanes.

³¹Isa cawa luot, cawa-Ni, “Jama api Nyak haga ngebandingko jelma-jelma zaman tano? Injuk sapa tian?

³²Tian injuk sanak-sanak sai mejong di pasar; sebagian cawa jama sai bareh, ‘Sekam mainko lagu sai riang, kidang keti mak haga nari! Sekam nyanyi lagu kesedihan, keti juga mak miwang!’

³³Yohanes Pembaptis ratong — ia puasa rik mak nginum anggor — diucakko keti, ‘Ia kekurukan sitan!’

³⁴Anak Manusia ratong — Ia mengan rik nginum — keti cawa, ‘Liak jelma seno! Rakus, pemabuk, bekantik jama penagih pajak juga jama jelma bedusa.’

³⁵Walaupun injuk reno, Allah udi bijaksana, tebukti jak sunyinni jelma sai nerima-Ni.”

³⁶Sai jelma Farisi, gelarni Simon, ngundang Isa mengan. Isa ratong di lambanni, mejong besimpuh rik mengan.

³⁷ Di kota seno wat sai bebai sai hurikni lamon dusa. Waktu ia ngedengi Isa lagi mengan di lambanni ulun Farisi ano, ia ratong ngusung gudu lunik jak pualam ngisi minyak rum.

³⁸Ia cecok di kudanni Isa redik cukut-Ni rik miwang sambil ngebasohko cukutni Isa jama way matani. Kak raduni cukutni Isa dilapni jama buokni, disiumni rik dituangkoni jama minyak rum ano.

³⁹Waktu jelma Farisi sai ngundang Ia ngeliak hal seno, ia cawa delom hati, “Kik jelma inji nabi, tantu Ia pandai sapa bebai inji sai nilut Ia, bebai seno lamon dusa!”

⁴⁰Isa cawa jama Simon, “Simon, wat sai haga Kucawako jama niku.” “Api sai haga dicawako Bapak,” jawab Simon, “ucakkodo.”

⁴¹Isa cawa, “Wat rua jelma behutang jama jelma sai nginjamko duit. Sai jelma utangni lima ratus duit perak, rik sai lagi lima puluh duit perak.

⁴²Tian rua ano mak dapok ngebayar utangni, makani utangni tian rua ano dihapusko ulihni jelma sai nginjamko duit. Nah, sapa jak di hantara tian rua ano sai lebih mengasihi jelma sai nginjamko duit ano?”

⁴³“Nyak kira jelma sai paling lamon dihapus utangni!” jawab Simon. “Pendapatmu temon,” jawab Isa.

⁴⁴Isa ngeliak jama bebai seno rik cawa jama Simon, “Niku ngeliak bebai inji? Nyakku ratong di lambanmu, kidang niku mak nyediako way untuk ngebasuh cukut-Ku; kidang bebai inji radu ngebasuh cukut-Ku jama way matani rik ngelapni jama buokni.

⁴⁵Niku mak nyium Nyak waktu Nyak ratong, bebai sinji mak pernah taru nyium cukut-Ku jak Nyak ratong mik dija.

⁴⁶Niku mak nuangko minyak di ulu-Ku, kidang bebai sinji radu nuangko minyak di cukut-Ku.

⁴⁷Temondo: kasihni sai balak ano nunjukko dusani sai lamon ano radu diampuni! Kik jelma diampuni cutik, ia haga mengasihi cutik muneh.”

⁴⁸Isa cawa jama bebai seno, “Dusa-dusamu radu diampuni.”

⁴⁹Jelma-jelma bareh sai jejama mengan jama Isa mulai cawa jejama tian, “Sapa jelma sinji sampai dapok ngampuni dusa?”

⁵⁰Isa cawa jama bebai seno, “Mani niku percaya jama Nyak, niku diselamatko. Mikdo delom damai!”