Read Lampung Api YOHANES 10 Bible Online

YOHANES 10 - Lampung Api bible

YOHANES 10

¹“Temon benor cawa-Ku inji: Jelma sai kuruk delom kandang biri-biri liwat kuta, mak ngeliu rangok, kidang manjek liwat renglaya bareh, ulun udi pemaling rik perampuk.

²Kidang jelma sai kuruk liwat rangok, iado gembala biri-biri.

³Penjaga kandang ngebukak rangok untuk ia, rik biri-biri nutuk suarani waktu ia ngurau tian jama gelarni masing-masing rik nuntun mik luah.

⁴Seraduni biri-biri udi diusung mik luah, gembala udi lapah di hadap, rik biri-biri udi nutuk ia mani tian kenal suarani.

⁵Tian mak haga nutuk ulun bareh, malah haga tegar jak ulun udi, mani mak kenal suarani.”

⁶Isa nyeritako perumpamaan udi, kidang tian mak ngerti api sai dimaksudko-Ni.

⁷Maka Isa cawa sekali lagi, “Temon benor cawa-Ku inji: Nyakdo rangok untuk biri-biri.

⁸Sunyinni sai ratong semakkung Nyak yakdo pemaling rik perampuk, kidang biri-biri mak ngedengiko suara tian.

⁹Nyakdo rangok. Sapa sai kuruk liwat Nyak haga selamat; ia luah kuruk rik dapok kanikan.

¹⁰Pemaling ratong angkah untuk maling, untuk ngebunuh rik untuk nyadang. Kidang Nyak ratong in manusia mansa hurik — hurik belimpah-limpah.

¹¹Nyakdo gembala sai betik. Gembala sai betik ngeniko nyawani untuk biri-birini.

¹²Jelma upahan sai lain hak gembala rik lain muneh sekedau biri-biri udi, haga tegar ninggalko biri-biri kik ia ngeliak serigala ratong. Maka biri-biri udi haga diterkam rik dicerai-beraiko serigala.

¹³Jelma upahan udi tegar, mani ia beguai untuk upah. Ia mak peduliko biri-biri udi.

¹⁴ Nyakdo gembala sai betik. Gegoh injuk Bapa mengenal Nyak rik Nyak mengenal Bapa, injuk reno juga Nyak mengenal biri-biri-Ku rik tian pun kenal Nyak. Nyak nyerahko nyawa-Ku untuk tian.

¹⁶Pagun wat biri-biri bareh juga milik-Ku, kidang mak tegolong delom kumpulan biri-biri inji. Tian juga haga Kuusung rik tian haga ngedengi suara-Ku. Tian sunyinni haga jadi bekantik jama sai gembala.

¹⁷Bapa mengasihi Nyak mani Nyak nyerahko nyawa-Ku, untuk nerimani luot.

¹⁸Mak sai jelma pun dapok ngakukni jak Nyak. Nyak nyerahkoni atas kehaga-Ku tenggalan. Nyak bekuasa untuk nyerahkoni, rik bekuasa ngakukni luot. Renodo tugas sai Kuterima jak Bapa-Ku.”

¹⁹Mani Isa cawa injuk reno, jelma-jelma Yahudi mulai betangkar.

²⁰Lamon sai cawa, “Ia kekurukan sitan! Ia luangan! Untuk api keti ngedengiko Ia?”

²¹Kidang wat juga sai cawa, “Jelma sai kekurukan sitan mak cawa injuk reno! Dapok kedo sitan nyani jelma buta dapok ngeliak?”

²²Di Yerusalem ulun-ulun sedang ngerayako Rani Buka Peresmian Lamban Ibadah. Pada waktu seno musim ngison.

²³Isa sedang lapah di Serambi Salomo di delom Lamban Ibadah,

²⁴waktu ulun-ulun Yahudi ratong bekumpul di sekeliling Isa. Tian cawa, “Sampai kapan Bapa haga naganko sekam ragu-ragu? Ucakko terus terang, kik Bapa temon-temon Raja Penyelamat.”

²⁵Isa ngejawab, “Radu Kuucakko jama niku, kidang keti mak percaya. Guai-guai sai Kulakuko atas gelar Bapa-Ku, ngeni bukti tentang Nyak.

²⁶Keti mak percaya mani keti mak tegolong biri-biri-Ku.

²⁷Biri-biri-Ku ngedengiko suara-Ku. Nyak kenal tian, rik tian nutuk Nyak.

²⁸Nyak ngeni tian hurik sejati rik kekal, rik untuk selamani tian mak haga binasa. Mak sai jelma pun dapok ngerampas tian jak culuk-Ku.

²⁹Bapa-Ku, sai radu ngeniko tian jama Nyak, ngelebihi sunyinni. Rik mak sai jelma pun dapok ngerampas tian jak culuk Bapa.

³⁰Nyak rik Bapa yakdo sai.”

³¹Kak raduni ulun-ulun Yahudi ngakuk lagi batu untuk nayar Isa.

³²Kidang Isa cawa jama tian, “Keti radu ngeliak Nyak ngelakuko lamon guaian sai betik, sai ditugasko Bapa jama Nyak. Jak sunyinni guaian seno, sai sepa sai nyebabko keti haga nayar Nyak?”

³³ Ulun-ulun Yahudi udi ngejawab, “Lain hak ulih guaian-guaian-Mu sai betik udi sekam haga nayar Bapa jama batu, kidang ulihni Bapa ngehujat Allah. Bapa sai jelma manusia haga ngejadiko diri-Mu Allah.”

³⁴ Kak raduni Isa ngejawab, “Kan di delom Buku Hukummu tetulis: Allah cawa, ‘Keti yakdo diwa’?

³⁵Ram pandai bahwa api sai tetulis delom Alkitab belaku untuk selamani. Jadi kik Allah ngeni sebutan ‘diwa’ jama ulun-ulun sai nerima cawa-Ni,

³⁶mengapi keti ngucakko Nyak ngehujat Allah mani cawa Nyak Anak Allah? Padahal Nyak dipilih ulih Bapa rik diutus mik dunia.

³⁷Kik Nyak mak ngelakuko guaian sai ditugasko Bapa, dang percaya jama Nyak.

³⁸Kidang mani Nyak ngeguaikoni, percayado jama api sai Kulakuko udi, meskipun keti mak haga percaya jama Nyak. Injuk reno keti pandai rik ngerti bahwa Bapa tetap besatu jama Nyak, rik Nyak tetap besatu jama Bapa.”

³⁹Tian berusaha luot nangkok Isa, kidang Ia lulos jak tian.

⁴⁰ Isa muloh mik seberang Way Yordan, rang Yohanes tumbai ngebaptis, raduni tinggal di dudi.

⁴¹Lamon jelma ratong jama Ia. Tian cawa, “Yohanes mak ngelakuko keajaiban-keajaiban, kidang sunyinni sai dicawakoni tentang ulun inji temon.”

⁴²Kak raduni lamon jelma di disan percaya jama Isa.