Read Lampung Api YOHANES 11 Bible Online

YOHANES 11 - Lampung Api bible

YOHANES 11

¹ Sai jelma gelarni Lazarus tinggal di Betania jejama puarini Maria rik Marta.

² Maria yakdo bebai sai nuangko minyak rum di cukut Tuhan, rik ngelapni jama buokni. Suatu ketika Lazarus meruyuh.

³Kerua puarini ngabarko jama Isa, “Tuhan, puari sekam sai Tuhan kasihi meruyuh.”

⁴Waktu Isa ngedengi kabar seno, Ia cawa, “Penyakik udi mak haga nyebabko kematian. Inji tejadi in Allah diagungko, rik in ulih seno Anak Allah juga diagungko.”

⁵Isa sayang jama Marta, Maria rik Lazarus.

⁶Kidang waktu Isa dapok kabar bahwa Lazarus meruyuh, Ia sengaja tinggal di rang-Ni rua rani lagi.

⁷Kak radu jak seno ampai Ia cawa jama jelma-jelma sai nutuk Ia, “Ija ram muloh mik Yudea.”

⁸Tian ngejawab, “Bapak Guru, ampai gaoh ulun-ulun Yahudi haga nayar Bapak jama batu rik tano Bapak haga muloh luot mik dudi?”

⁹“Kan waktu dawah sakani rua belas jam?” ani Isa. “Jelma sai lapah waktu dawah, mak tehantuk mani ia ngeliak terang dunia inji.

¹⁰Kidang jelma sai lapah di bingi tehantuk, mani mak ngedok terang jama ia.”

¹¹Renodo ani Isa. Kak raduni Ia cawa luot, “Kantik ram Lazarus radu pedom, kidang Nyak haga mik minjakko ia.”

¹²Jelma-jelma sai nutuk Isa cawa, “Tuhan, kik Lazarus pedom, kanah ia haga munyai.”

¹³Maksud Isa yakdo bahwa Lazarus radu mati. Kidang tian nyangko maksud Isa yakdo bahwa Lazarus pedom biasa.

¹⁴Ulihni seno Isa cawa jama tian terus terang, “Lazarus radu mati.

¹⁵Kidang Nyak senang muneh Nyak mak ngedok di dudi, mani lebih betik untuk keti, in keti dapok percaya. Ijado ram mik tano jama Lazarus.”

¹⁶Tomas sai disebut “Si Kembar” cawa jama kantik-kantikni jelma sai nutuk Isa, “Ija ram nutuk, tagando ram mati jejama Ia.”

¹⁷Waktu Isa sampai di rang udi, Lazarus radu epak rani sakani dikubor.

¹⁸Betania redik Yerusalem, kira-kira telu kilometer jaohni.

¹⁹Lamon ulun Yahudi radu ratong jama Marta rik Maria untuk ngehibur tian mani kematian puarini.

²⁰Waktu Marta ngedengi Isa ratong, ia luah untuk nyambut Isa, sedangko Maria tinggal di lamban.

²¹Ani Marta jama Isa, “Tuhan, seandaini Tuhan wat di dija waktu seno, pasti puariku mak mati.

²²Walaupun injuk reno nyak pandai bahwa tano inji muneh Allah haga ngeni api gaoh sai Tuhan ngilu jama Ia.”

²³“Puarimu haga hurik luot,” ani Isa jama Marta.

²⁴Marta ngejawab, “Nyak pandai Lazarus haga hurik luot kik ulun mati dihurikko waktu Rani Kiamat.”

²⁵“Nyakdo sai ngeni hurik rik ngehurikko ulun mati,” ani Isa jama Marta. “Jelma sai percaya jama Nyak haga hurik, walaupun ia radu mati.

²⁶Rik jelma hurik sai percaya jama Nyak, selama-lamani mak haga mati. Percaya kedo niku haga hal seno?”

²⁷“Tuhan,” jawab Marta, “nyak percaya Tuhan Anak Allah, Raja Penyelamat sai haga ratong mik dunia inji.”

²⁸Seraduni Marta cawa injuk reno, ia mik ngurau Maria, puarini rik sesiah jama ia, “Bapak Guru wat di dija; Ia nanyako niku.”

²⁹Ngedengi seno, Maria geluk-geluk minjak, terus mik nungga Isa.

³⁰Waktu seno, Isa makkung kuruk mik pekon. Ia pagun di rangni Marta nungga Ia.

³¹Jelma-jelma Yahudi sai sedang ngehibur Maria di lamban, ngeliak Maria minjak rik geluk-geluk mik luah; jadi tian mik nutuk ia, mani tian nyangko ia mik kubor untuk miwang.

³²Waktu Maria sampai di rangni Isa rik ngeliak Ia, sujuddo Maria di hadapan-Ni rik cawa, “Tuhan, seandaini Tuhan wat di dija waktu seno, pasti puariku mak mati.”

³³Waktu Isa ngeliak Maria miwang, rik jelma-jelma Yahudi sai ratong jejama Maria juga miwang, hati-Ni sedih, rik Ia keliakan teharu nihan.

³⁴Maka betanyado Ia jama tian, “Di dipa keti nguborko ia?” “Ija liak Tuhan,” jawab tian.

³⁵Kak raduni Isa miwang.

³⁶Jelma-jelma Yahudi udi cawa, “Liak, bukan main sayang-Ni jama Lazarus!”

³⁷Kidang wat di hantara tian sai cawa, “Ia nyani jelma buta ngeliak, mengapi Ia mak dapok nyegah in Lazarus dang mati?”

³⁸Isa teharu nihan, kak raduni mik kubor. Kuboran udi yakdo guha sai disalok jama batu balak.

³⁹“Singkerko batu ano,” ani Isa. Marta, puari jelma sai mati ano, ngejawab, “Kidangni, Tuhan, ia radu epak rani dikubor. Tantu radu behimbau busuk!”

⁴⁰Isa cawa jama Marta, “Kan radu Kuucakko jama niku: Kik niku percaya, niku haga ngeliak hara balak kuasa Allah!”

⁴¹Raduni tian nyingkerko batu udi. Radu jak seno Isa cungak mik langit rik cawa, “Nerima juga Bapa, mani Bapa radu ngedengiko Nyak.

⁴²Nyak pandai Bapa selalu ngedengiko Nyak, kidang Nyak ngucakko inji, untuk jelma-jelma sai wat di dija; in tian percaya bahwa Bapado sai ngutus Nyak.”

⁴³Seraduni cawa injuk reno, Isa beseru jama suara keras, “Lazarus, luahdo!”

⁴⁴Maka luahdo jelma sai radu mati ano. Culuk rik cukutni masih tebungkus kain kafan, rik pudakni tesalok jama kain penyalok pudak. “Lepasko kain kafanni in ia bebas lapah,” ani Isa jama ulun-ulun udi.

⁴⁵Lamon jak ulun-ulun Yahudi sai ratong jama Maria, percaya jama Isa waktu tian ngeliak kejadian ano.

⁴⁶Kidang pira-pira jak hantara tian mik jama ulun Farisi rik ngelaporko api sai radu dilakuko ulihni Isa.

⁴⁷Ulihni seno jelma-jelma Farisi rik imam-imam kepala ngadako rapat jama Mahkamah Agama. Tian cawa, “Ram haga bebuat api? Jelma inji nyani lamon keajaiban!

⁴⁸Kik ram naganko Ia terus injuk reji sunyinni jelma haga percaya jama Ia. Rik akherni jelma sai bekuasa di Roma haga ratong rik ngehancorko Lamban Ibadah rik sunyinni bangsa neram!”

⁴⁹Sai jak tian gelarni Kayafas, imam agung jama tahun seno cawa, “Keti mak pandai api-api.

⁵⁰Api keti mak menyadari bahwa demi rakyat, lebih baik sai jelma mati jak sunyinni jelma hancor?”

⁵¹Sebenorni Kayafas ngucakko ano, lain hak jak pikeranni tenggalan. Kidang sebagai imam agung tahun ano ia menubuatko bahwa Isa haga mati untuk bangsa Yahudi.

⁵²Rik lain hak untuk bangsa Yahudi gaoh, kidang juga untuk ngumpulko rik mempersatuko anak-anak Allah sai tecerai-berai.

⁵³Mulai rani seno jelma-jelma sai bekuasa Yahudi besekongkol untuk ngebunuh Isa.

⁵⁴Ulihni seno Isa mak lagi tampil di muka umum di kalangan ulun Yahudi. Ia ninggalko Yudea, kak raduni mik kota sai gelarni Efraim redik padang gurun. Di dudi Ia tinggal jejama jelma-jelma sai nutuk Ia.

⁵⁵Pada waktu seno radu redik Rani Buka Paskah Yahudi. Lamon jelma jak pekon-pekon radu mik Yerusalem untuk nyelenggarako upacara pengecahan diri semakkung perayaan ano.

⁵⁶Tian nyepok Isa, rik waktu bekumpul di Lamban Ibadah, tian cawa peperda tian, “Injuk repa pendapatmu? Halokni Ia mak ratong mik perayaan inji.”

⁵⁷Tian ngucakko ano mani imam-imam kepala rik ulun-ulun Farisi radu ngeluahko perintah bahwa jelma sai pandai di dipa Isa wat, haga ngelaporko in Ia dapok ditangkok.