Read Lampung Api YOHANES 13 Bible Online

YOHANES 13 - Lampung Api bible

YOHANES 13

¹Serani semakkung Rani Buka Paskah, Isa pandai bahwa radu waktuni Ia ninggalko dunia inji untuk muloh jama Bapa-Ni. Ia mengasihi jelma-jelma sai jadi milik-Ni di dunia, rik Ia tetap mengasihi tian sampai penghabisan.

²Isa rik jelma-jelma sai nutuk Ia sedang mengan di bingi. Iblis radu ngurukko niat di delom hati Yudas anakni Simon Iskariot untuk ngekhianati Isa.

³Isa pandai bahwa Bapa radu nyerahko sunyinni kekuasaan jama Ia. Ia pandai muneh bahwa Ia ratong jak Allah rik haga muloh jama Allah.

⁴Ulihni seno Ia cecok, ngebukak jubah-Ni, rik ngikok anduk di tengah-Ni.

⁵Radu jak seno Ia nuangko way mik delom sai baskom, kak raduni mulai ngebasuh cukut jelma-jelma sai nutuk Ia rik ngelap jama anduk sai diikok di tengah-Ni.

⁶Sampaido Ia jama Simon Petrus, sai cawa, “Tuhan, masa Tuhan sai ngebasuh cukutku?”

⁷Isa ngejawab, “Tano niku mak ngerti api sai Kulakuko inji, kidang kanah niku haga ngerti.”

⁸“Dang, Tuhan,” ani Petrus jama Isa, “Dang sekali-kali Tuhan ngebasuh cukutku!” Kidang Isa ngejawab, “Kik Nyak mak ngebasuhmu, niku mak ngedok hubungan jama Nyak.”

⁹Simon Petrus cawa, “Kik injuk reno, Tuhan, dang angkah cukutku, kidang culuk rik uluku muneh!”

¹⁰“Jelma sai radu mandi, radu mekecah unyinni,” ani Isa jama Petrus. “Ia mak perlu dikecahko lagi; kecuali cukutni. Keti inji radu mekecah, kidang mak unyinni.” (

¹¹Isa radu pandai sapa sai haga ngekhianati-Ni. Renodo sebabni Ia cawa, “Keti inji radu mekecah, kidang mak unyinni.”)

¹² Seraduni Isa ngebasuh cukut tian, Ia makaiko luot jubah-Ni rik mejong luot. Raduni Ia cawa jama tian, “Ngerti mak keti api sai ampai gaoh Kuguaiko jama keti?

¹³Keti ngurau Nyak Guru rik Tuhan. Rik sangun injuk reno.

¹⁴Kik Nyak sebagai Tuhan rik Gurumu ngebasuh cukutmu, keti wajib juga saling ngebasuh cukut.

¹⁵Nyak ngeni teladan inji jama keti, in keti juga ngeguaiko api sai radu Kuguaiko jama keti.

¹⁶ Temon nihan cawa-Ku inji: Sai jelma hamba mak lebih balak jak tuanni, rik sai utusan mak lebih balak jak sai ngutusni.

¹⁷Kik keti radu pandai sunyinni inji, bebahagiado keti kik ngelakukoni.

¹⁸ Api sai Kuucakko inji lain hak mengenai keti unyinni. Nyak pandai sapa-sapa sai radu Kupilih. Kidang api sai tetulis delom Alkitab, haga tejadi, yakdo ‘Jelma sai mengan jama-jama Nyak, haga ngelawan Nyak.’

¹⁹Hal seno Kusampaiko jama niku tano, semakkung tejadi, in kik hal ano tejadi kanah, keti haga percaya bahwa Nyakdo Ia sai disebut NYAK WAT.

²⁰ Temon nihan cawa-Ku inji: Sapa nerima jelma sai Kuutus, nerima Nyak. Rik sapa nerima Nyak, nerima Ia sai ngutus Nyak.”

²¹Seraduni Isa cawa injuk reno, Ia jadi teharu nihan. Raduni Ia ngucakko, “Temon nihan cawa-Ku inji: Salah sai jak hantara keti haga ngekhianati Nyak.”

²²Jelma-jelma sai nutuk Ia ngeliak hiran nihan peperda tian mani mak pandai sapa sai dimaksud.

²³Jelma sai nutuk sai disayang Isa mejong di kebelah Isa.

²⁴Simon Petrus ngeni isyarat jama Ia, in ia betanya jama Isa sapa sai dimaksud.

²⁵Maka jelma sai nutuk udi redik jama Isa, rik betanya, “Sapa ia, Tuhan?”

²⁶Isa ngejawab, “Jelma sai Kukeni ruti sai Kucelupko delom cumbung, iado jelmani.” Maka Isa ngakuk sepotong ruti, dicelupkoni mik delom cumbung; raduni dikenini jama Yudas anak Simon Iskariot.

²⁷Seraduni Yudas nerima ruti udi, iblis kuruk mik delom hatini. Raduni Isa cawa jama ia, “Guaiko geluk api sai haga niku guaiko.”

²⁸Mak sai jelma pun jak tian sai mejong mengan di disan ngerti mengapi Isa cawa injuk reno jama Yudas.

²⁹Wat sai nyangko Isa ngayun Yudas ngebeli sai hal sai diperluko untuk pesta ano, atau ngeni duit cutik jama jelma mejerih — mani Yudas sai nyating duit kas tian.

³⁰Seraduni Yudas nerima ruti ano, ia langsung luah. Rani radu bingi.

³¹Seraduni Yudas mik, Isa cawa, “Tano Anak Manusia diagungko, rik Allah diagungko liwat Ia.

³²Kik Allah diagungko liwat Ia, Ia pun haga diagungko Allah liwat diri-Ni tenggalan. Malah Allah haga ngagungko-Ni geluk.

³³ Anak-anak-Ku, Nyak mak haga tinggal mesaka lagi jama keti. Keti haga nyepok Nyak, kidang injuk sai radu Kuucakko jama jelma-jelma sai bekuasa Yahudi, reno muneh Kuucakko jama keti; di rang Nyak mik, keti mak dapok ratong.

³⁴ Perintah ampai Kuucakko jama niku: Kasihido peperda keti. Gegoh injuk Nyak ngasihi keti, injuk reno juga keti haga saling mengasihi.

³⁵Kik keti saling mengasihi, sunyinni jelma haga pandai bahwa keti jelma-jelma sai nutuk Nyak.”

³⁶“Tuhan, Tuhan haga mik dipa?” Simon Petrus nanya jama Isa. Jawab Isa, “Mik dipa Nyak mik, niku mak dapok nutuk tano. Niku haga nutuk Nyak kanah.”

³⁷“Tuhan, mengapi nyak mak dapok nutuk Tuhan tano?” tanya Petrus luot. “Nyak rila mati untuk Tuhan!”

³⁸Isa ngejawab, “Temon kedo niku rila mati untuk Nyak? Pandai mak, semakkung manuk ngakut kanah, niku radu telu kali cawa bahwa niku mak ngenal Nyak!”