Read Lampung Api YOHANES 2 Bible Online

YOHANES 2 - Lampung Api bible

YOHANES 2

¹Rua rani jak seno wat pesta kawin di kota Kana di Galilea, emak-Ni Isa wat di disan.

²Isa jama jelma-jelma sai nutuk Ia diundang juga di pesta udi.

³Waktu anggor radu bela, emak-Ni cawa jama Isa, “Anggorni tian bela.”

⁴Isa ngejawab, “Mak, dang ngayun Nyak. Makkung sampai waktuni Nyak nyatako diri.”

⁵Kidang emak-Ni Isa cawa jama jelma-jelma sai ngelayani, “Guaiko gaoh api sai dicawako-Ni jama niku.”

⁶Di dudi wat enam runcung sai disediako untuk keperluan pembasuhan nurut adat Yahudi. Runcung ano masing-masing isini kira-kira seratus liter.

⁷Isa cawa jama jelma-jelma sai ngelayani udi, “Isido runcung-runcung ano jama way.” Tian ngisi sampai latap.

⁸Raduni Isa cawa jama tian, “Tano akuk cutik way ano rik usung jama jelma sai mimpin pesta.” Tian ngusung way udi jama jelma sai mimpin pesta,

⁹rik ia nyicip way sai radu berubah jadi anggor. (Ia mak pandai jak ipa anggor ano, angkah jelma-jelma sai ngelayani sai nuangko way ano gaoh sai pandai). Kak raduni jelma sai mimpin pesta udi ngeredik kemantin,

¹⁰rik cawa jama ia, “Biasani ulun ngehidangko anggor sai paling bangik lebih mena rik kik kuari radu puas nginum, ampai anggor sai biasa. Kidangni Niku nyegok anggor sai paling bangik sampai tano!”

¹¹Udido keajaiban mula-mula sai disani Isa. Ia ngelakuko seno di Kana di Galilea. Jama tanda seno Ia nunjukko keagungan-Ni. Maka jelma-jelma sai nutuk Ia percaya jama Ia.

¹² Kak radu jak seno Isa mik di Kapernaum jama-jama emak-Ni, puari-puari-Ni rik jelma-jelma sai nutuk Ia. Tian tinggal di dudi pira-pira rani sakani.

¹³ Waktu Rani Buka Paskah Yahudi radu meredik, Isa mik Yerusalem.

¹⁴Di Lamban Ibadah di Yerusalem Ia ngehalu penjual-penjual jawi, biri-biri, rik burung merpati; juga jelma tukang nukor duit mejong di dudi.

¹⁵Isa nyani cambuk jak tali kak raduni nguser sunyinni binatang udi, biri-biri atau jawi, jak delom Lamban Ibadah. Mija-mija tukang tukor duit dibalikko-Ni hingga duit tian besirakan di dipa-dipa.

¹⁶Kak raduni Ia cawa jama penjual burung merpati, “Iwakko unyinni jak ija. Dang dijadiko Lamban Bapa-Ku rang bedagang!”

¹⁷ Maka jelma-jelma sai nutuk Ia ingok jama ayat Alkitab inji, “Cinta-Ku untuk Lamban-Mu, ya Allah, nyuah hati-Ku.”

¹⁸Jelma-jelma sai bekuasa Yahudi nantang Isa, cawa tian, “Cuba sani keajaiban sebagai tanda untuk sekam bahwa Niku berhak betindak injuk inji.”

¹⁹ Isa ngejawab, “Rubuhko Lamban inji, rik delom telu rani Nyak haga ngebangunni luot.”

²⁰Raduni tian cawa, “Epak puluh enam tahun dibutuhko untuk ngebangun Lamban Ibadah inji. Rik Niku ngebangun luot delom telu rani?”

²¹Kidangni Lamban Ibadah sai dimaksud Isa ano badan-Ni tenggalan.

²²Mak mesaka jak seno, seraduni Isa dibangkitko jak mati, ingokdo jelma-jelma sai nutuk Ia bahwa hal seno pernah diucakko-Ni. Maka percayado tian jama api sai tetulis delom Alkitab rik jama api sai diucakko ulih Isa.

²³Sementara Isa wat di Yerusalem waktu Perayaan Paskah, lamon ulun percaya jama Ia ulihni keajaiban-keajaiban sai disani-Ni.

²⁴Kidang Isa tenggalan mak percaya jama tian, mani Ia kenal sunyinni jelma.

²⁵Mak perlu jelma ngeni keterangan jama Ia tentang sapa pun, mani Ia tenggalan pandai api sai wat delom hati manusia.