Read Lampung Api YOHANES 20 Bible Online

YOHANES 20 - Lampung Api bible

YOHANES 20

¹Waktu rani Minggu pagi, waktu masih kelam, Maria Magdalena mik kuboran. Ia ngeliak batu penyalokni radu digiser jak lubang kubor udi.

²Maka ia tegar nyepok Simon Petrus rik jelma sai nutuk sai dikasihi Isa, rik cawa jama tian, “Tuhan radu diakuk jak kubor, rik nyak mak pandai di dipa Ia dipikko.”

³Raduni Petrus rik jelma sai nutuk bareh udi mik kuboran.

⁴Tian rua tegar, kidang jelma sai nutuk bareh udi lebih geluk jak Petrus, rik ia sampai lebih geluk di kuboran.

⁵Ia ngeliak mik delom kuboran rik ngeliak kain kafan tegelitak di dudi, kidang ia mak kuruk.

⁶Simon Petrus nyusul jak kudan, raduni langsung kuruk mik delom kuboran udi. Ia ngeliak kain kafan tegelitak di dudi,

⁷kidang kain sai diikok di ulu Isa mak ngedok diredikni melainko tegulung tenggalan.

⁸Kak raduni jelma sai nutuk sai lebih mena sampai di kuboran, kuruk muneh. Ia ngeliak rik percaya. (

⁹Sampai pada waktu ano tian makkung ngerti api sai tetulis delom Alkitab bahwa Ia haga bangkit jak mati.)

¹⁰Radu jak seno jelma-jelma sai nutuk Isa mulang.

¹¹Maria Magdalena cecok di hadap kuboran sambil miwang. Sambil miwang, ia ngeliak mik delom kuboran,

¹²raduni ngeliak rua malaikat bekawai handak. Tian mejong dibekas rang mayat Isa, sai malaikat di bagian ulu, rik sai barehni di bagian cukut.

¹³Malaikat-malaikat udi betanya, “Ibu, mengapi miwang?” Maria ngejawab, “Tuhanku radu diakuk, rik nyak mak pandai Ia dipikko di dipa.”

¹⁴Seraduni cawa injuk reno, ia ngerilong mik kudan rik ngeliak Isa cecok di dudi. Kidang ia mak pandai bahwa udi Isa.

¹⁵Isa betanya jama ia, “Ibu mengapi miwang? Ibu nyepok sapa?” Maria nyangko ano tukang kebun, jadi ia cawa, “Pak, kik Bapak sai ngalihko Ia jak ija, tulung ucakko jama nyak di dipa Bapa ngepikko Ia, in nyak dapok ngakuk-Ni.”

¹⁶Isa cawa jama ia, “Maria!” Maria ngerilong jama Isa raduni cawa delom bahasa Ibrani, “Rabuni!” (Retini “Guru”.)

¹⁷“Dang nyating Nyak,” ani Isa jama ia, “mani Nyak makkung cakak mik Bapa. Kidang mikdo jama puari-puari-Ku, rik keni pandai jama tian bahwa tano Nyak cakak mik Bapa-Ku rik Bapamu, Allah-Ku rik Allahmu.”

¹⁸Maka Maria mik ngeni pandai jama jelma-jelma sai nutuk Isa bahwa ia radu ngeliak Tuhan rik bahwa Tuhan radu ngucakko sunyinni ano jama ia.

¹⁹Waktu rani Minggu seno muneh, waktu radu manom, jelma-jelma sai nutuk Isa bekumpul di sai lamban sai rangokni tekunci, mani tian rabai jama jelma-jelma sai bekuasa Yahudi. Tiba-tiba Isa ratong rik cecok di tengah-tengah tian rik cawa, “Salam sejahtera bagimu.”

²⁰Seraduni cawa injuk reno, Ia nunjukko jama tian culuk rik tenai-Ni. Waktu ngeliak Tuhan, tian riang nihan.

²¹Raduni Isa cawa jama tian sekali lagi, “Salam sejahtera bagimu. Gegoh Bapa ngutus Nyak, injuk reno muneh Nyak ngutus keti.”

²²Raduni Ia nyebuko napas-Ni jama tian rik cawa, “Terimado Ruh Allah.

²³ Kik keti ngampuni dusani jelma, Allah juga ngampuni. Kik keti mak ngampuni dusa jelma, Allah juga mak ngampuni.”

²⁴Tomas (sai disebut si “Kembar”), sai jak rua belas jelma sai nutuk Isa, mak ngedok jejama sai bareh waktu Isa ratong.

²⁵Maka jelma-jelma sai nutuk Isa sai bareh cawa jama Tomas, “Sekam radu ngeliak Tuhan!” Kidang Tomas ngejawab, “Kik nyak makkung ngeliak bekas paku di culuk-Ni, makkung ngepikko jariku di bekas katan paku ano rik makkung ngepikko culuk di tenai-Ni, sekali-kali nyak mak haga percaya.”

²⁶Seminggu kak raduni jelma-jelma sai nutuk Isa wat luot di rang udi, rik Tomas hadir muneh. Sunyinni rangok tekunci. Kidang Isa ratong rik cecok di tengah-tengah tian, kak raduni cawa, “Salam sejahtera bagimu.”

²⁷Kak raduni Isa cawa jama Tomas, “Liakdo culuk-Ku, rik pikko jarimu di dija. Ulorko culukmu rik pikko di tenai-Ku. Dang ragu-ragu lagi, kidang percayado!”

²⁸Tomas cawa jama Isa, “Tuhanku rik Allahku!”

²⁹Maka Isa cawa jama ia, “Niku percaya mani radu ngeliak Nyak, bukan? Bebahagiado jelma sai percaya walaupun mak ngeliak Nyak!”

³⁰Masih lamon lagi keajaiban-keajaiban bareh sai disani Isa di hadap jelma-jelma sai nutuk Ia, kidang mak ditulis di delom buku inji.

³¹Kidang sunyinni inji ditulis, in keti percaya bahwa Isa yakdo Raja Penyelamat, Anak Allah, rik mani percaya jama Ia, keti mansa hurik.