Read Lampung Api YOHANES 3 Bible Online

YOHANES 3 - Lampung Api bible

YOHANES 3

¹Wat sai jelma tokoh agama jak golongan ulun Farisi, gelarni Nikodemus.

²Suatu bingi ia ratong jama Isa rik cawa, “Bapa Guru, sekam pandai Bapak diutus Allah. Mani mak ngedok sai jelma pun dapok nyani keajaiban injuk sai Bapak guaiko, kik Allah mawat nyertai Ia.”

³Isa ngejawab, “Percayado, mak ngedok sai jelma pun dapok jadi anggota umat Allah, kik ia mawat dilaherko luot.”

⁴“Masa ulun dewasa dapok laher luot?” cawa Nikodemus jama Isa. “Mungkin kedo ia kuruk delom kandungan emakni rik dilaherko luot?”

⁵Isa ngejawab, “Temondo cawa-Ku inji: kik jelma mawat dilaherko jak way rik jak Ruh Allah, ulun udi mak dapok jadi anggota umat Allah.

⁶Manusia secara jasmani dilaherko ulih ulun tuhani, kidang secara rohani dilaherko ulih Ruh Allah.

⁷Dang hiran kik Nyak ngucakko: niku sunyinni haga dilaherko luot.

⁸Angin betiup mik dipa ia haga; ram ngedengi bunyini, kidang mak pandai jak ipa ratongni rik mik dipa mikni. Injuk reno juga ulun sai dilaherko ulih Ruh Allah.”

⁹“Injuk repa ano dapok tejadi?” Nikodemus nanya.

¹⁰Isa ngejawab, “Niku guru di Israel; masa niku mak pandai?

¹¹Percayado: Sekam cawa angkah tentang api sai sekam pandai, rik sekam ngeni kesaksian angkah tentang api sai sekam liak; kidang keti mak haga nerima kesaksian sekam.

¹²Keti mak percaya kik Nyak nyeritako jama niku mengenai hal-hal jak dunia inji; repa bang keti dapok percaya, kik Nyak nyeritako jama niku hal-hal mengenai surga?

¹³Mak ngedok sai jelma pun pernah cakak mik surga, selain Ia sai regah mik dunia, yakdo Anak Manusia.

¹⁴ Gegoh injuk Musa nyakakko ulai tembaga di sebatang kayu di padang gurun, injuk reno muneh Anak Manusia haga dicakakko,

¹⁵in sunyinni ulun sai percaya jama Ia mansa hurik sejati rik kekal.”

¹⁶Mani Allah nihan-nihan mengasihi manusia di dunia inji, maka Ia ngeniko Anak-Ni sai tunggal, in unggal jelma sai percaya jama Ia mak binasa, melainko mansa hurik sejati rik kekal.

¹⁷Mani Allah ngirim Anak-Ni lain hak untuk ngehakimi dunia inji, kidang untuk nyelamatkoni.

¹⁸Jelma sai percaya jama Ia mak dihukum. Kidang jelma sai mak percaya radu dihukum ulih Allah, mani ia mak percaya jama Anak Allah sai tunggal.

¹⁹Ia dituntut bedasarko hal inji: Terang udi radu ratong mik dunia, kidang manusia lebih gering kelam jak terang, mani guaini tian jahat.

²⁰Unggal jelma sai beguai jahat, nyuoh jama terang; ia mak haga ratong jama terang, in guaini sai jahat dang keliakan.

²¹Kidang jelma sai ngeguaiko kehaga Allah, ratong jama terang in jadi nyata bahwa api sai diguaikoni udi yakdo nurut kehaga Allah.

²²Kak radu jak seno Isa rik jelma-jelma sai nutuk Ia mik di Yudea. Ia tinggal di disan pira waktu sakani jama tian rik ngebaptis.

²³ Waktu seno Yohanes makkung kuruk bui. Ia ngebaptis di Ainon, mak jaoh jak Salim, mani di disan wat lamon way. Jelma-jelma ratong jama ia, rik ia ngebaptis tian.

²⁵Pira-pira jelma sai nutuk Yohanes mulai betangkar jama ulun Yahudi tentang atoran pengecahan.

²⁶Tian mik jama Yohanes, rik cawa, “Pak Guru, api Bapak masih ingok jelma sai jama-jama Bapak di seberang Way Yordan udi, sai Bapak tunjukko jama sekam tumbai? Ia tano ngebaptis juga, rik sunyinni jelma mik jama Ia.”

²⁷Yohanes ngejawab, “Manusia mak dapok api-api kik mak dikeniko Allah jama ia.

²⁸ Keti tenggalan radu ngedengi cawaku, ‘Nyak lain Raja Penyelamat. Nyak diutus lebih mena jak Ia.’

²⁹Kebayan yakdo milik kemantin. Sahabat kemantin udi angkah cecok ngedampingi rik ngedengiko, rik ia gering kik ngedengiko suara kemantin. Reno muneh nyak. Tano nyak riang nihan.

³⁰Iado sai haga makin penting, rik nyak makin kurang penting.”

³¹Sai ratong jak atas ngelebihi sunyinni. Sai ratong jak dunia tegolong jelma dunia, rik cawa tentang hal-hal dunia. Ia sai ratong jak atas ngelebihi sunyinni.

³²Ia cawa mengenai api sai radu diliak rik didengi-Ni, kidang mak sai jelma pun percaya jama kesaksian-Ni.

³³Jelma sai percaya jama kesaksian-Ni ano, ngakui bahwa Allah benor.

³⁴Mani jelma sai diutus Allah nyampaiko cawa-cawa Allah, mani Ruh Allah radu dikeniko jama Ia sepenuhni.

³⁵ Bapa mengasihi Anak-Ni, rik radu nyerahko sunyinni kuasa jama Ia.

³⁶Jelma sai percaya jama Sanak seno haga mansa hurik sejati rik kekal. Kidang jelma sai mak taat jama Sanak seno mak mansa hurik. Ia dihukum Allah untuk selama-lamani.