Read Lampung Api YOHANES 8 Bible Online

YOHANES 8 - Lampung Api bible

YOHANES 8

²Jemoh ranini pagi-pagi Ia mik luot di Lamban Ibadah, rik lamon jelma ratong jama Ia. Isa mejong, raduni mulai ngajar tian.

³Sementara seno, guru-guru agama rik jelma-jelma Farisi ngusung jama Ia sai bebai sai kedapokan bezinah. Tian ngayun bebai udi cecok di tengah-tengah,

⁴kak raduni cawa jama Isa, “Bapak Guru, bebai inji kedapokan sedang bebuat zinah.

⁵ Di delom Hukum Musa wat atoran bahwa bebai injuk reno inji haga ditayar jama batu sampai mati. Tano repa pendapat Bapak?”

⁶Tian betanya injuk reno untuk ngejebak Ia, in tian dapok nyalahko Ia. Kidang Isa sungguk gaoh, rik nulis jama jari-jari-Ni di tanoh.

⁷Waktu tian terus ngedesak, Ia ngiwakko ulu-Ni rik cawa jama tian, “Jelma sai mak ngedok dusa jak hantara keti, tagando ia sai mula-mula nayarko batu jama bebai ano.”

⁸Radu jak seno Isa sungguk luot rik nulis lagi di tanoh.

⁹Seraduni ngedengi Isa cawa injuk reno, mikdo tian ninggalko rang seno, sai-sai mulai jak sai tuha. Akherni Isa tinggal tenggalan di dudi jama bebai sai masih cecok di rangni.

¹⁰Raduni Isa ngiwakko ulu-Ni rik cawa jama bebai udi, “Di dipa tian sunyinni? Api mak ngedok sai ngehukum niku?”

¹¹“Mawat, Pak,” jawabni. “Baikdo,” ani Isa, “Nyak juga mak ngehukum niku. Tano mikdo, dang bedusa luot.”]

¹² Isa cawa luot jama ulun lamon, cawa-Ni, “Nyakdo terang dunia. Jelma sai nutuk Nyak mak haga lapah delom kekelaman, kidang ngedok terang kehurikan.”

¹³ “Tano Niku ngeni kesaksian tentang diri tenggalan,” ani ulun Farisi udi jama Ia, “kesaksian-Mu mak benor.”

¹⁴Isa ngejawab, “Meskipun Nyak ngeni kesaksian tentang diri-Ku tenggalan, kesaksian-Ku benor; mani Nyak pandai jak ipa Nyak ratong rik mik dipa Nyak mik. Keti mak pandai jak ipa Nyak ratong rik mik dipa Nyak mik.

¹⁵Keti ngehakimi jelma jama cara manusia; Nyak mak ngehakimi sai jelma pun.

¹⁶Kidang seandaini Nyak ngehakimi ulun, keputusan-Ku ano adil, mani Nyak mak tenggalan; Bapa sai ngutus Nyak wat jejama Nyak.

¹⁷Di delom Hukum Musa tetulis injuk reji: Kesaksian sai benor yakdo kesaksian jak rua jelma.

¹⁸Sai ngeni kesaksian tentang diri-Ku wat rua — Nyak rik Bapa sai ngutus Nyak.”

¹⁹“Bapa-Mu udi di dipa?” cawa tian. Isa ngejawab, “Keti mak kenal Nyak maupun Bapa-Ku. Andaikata keti kenal Nyak, pasti keti kenal Bapa-Ku juga.”

²⁰Sunyinni udi diucakko Isa waktu Ia sedang ngajar di Lamban Ibadah redik kutak-kutak duit persembahan. Kidang mak sai jelma pun sai nangkok Ia, mani makkung sampai waktuni.

²¹Isa cawa luot jama tian, “Nyak haga mik, rik keti haga nyepok Nyak, kidang keti haga mati di delom dusamu. Rang Nyak mik, keti mak dapok ratong.”

²²Maka jelma-jelma sai bekuasa Yahudi cawa, “Halokni Ia haga bunuh diri, mani Ia cawa, ‘Rang Nyak mik, keti mak dapok ratong.’ ”

²³Raduni Isa cawa jama tian, “Keti ratong jak bah; kidang Nyak ratong jak atas. Keti jak dunia; Nyak lain hak jak dunia.

²⁴Senodo sebabni Nyak cawa jama niku, bahwa keti haga mati di delom dusa-dusamu. Rik sangun keti haga mati delom dusa-dusamu, kik mak percaya bahwa ‘Nyakdo Ia sai disebut NYAK WAT’.”

²⁵“Sapa Niku sebenorni?” tanya tian. Isa ngejawab, “Untuk api cawa luot jama keti!

²⁶Masih lamon hal tentang keti sai haga Kucawako rik hakimi. Kidang Ia sai ngutus Nyak dapok dipercaya. Rik Nyak ngeni pandai jama dunia api sai Kudengi jak Ia.”

²⁷Tian mak ngerti bahwa Ia sedang cawa jama tian tentang Bapa.

²⁸Ulihni seno Isa cawa jama tian, “Kanah kik keti radu langgarko Anak Manusia, keti haga pandai bahwa, ‘Nyakdo Ia sai disebut NYAK WAT’, rik keti haga pandai bahwa mak ngedok sai pun sai Kulakuko jak diri-Ku tenggalan. Nyak angkah ngucakko api sai diajarko Bapa jama Nyak.

²⁹Rik Ia sai ngutus Nyak wat jejama Nyak. Ia mak pernah naganko Nyak tenggalan, mani Nyak selalu ngelakuko api sai nyenangko hati-Ni.”

³⁰Seraduni Isa ngucakko sunyinni seno, lamon ulun percaya jama Ia.

³¹Kak raduni Isa cawa jama ulun-ulun Yahudi sai radu percaya jama Ia, “Kik keti hurik nutuk ajaran-Ku keti temon-temon jelma sai nutuk Nyak,

³²maka keti haga mengenal Allah sai benor, rik ulihni seno keti haga dibebasko.”

³³ “Sekam inji keturunan Abraham,” ani tian. “Makkung pernah sekam jadi hamba sapa pun! Api maksud-Mu jama cawa, ‘Keti haga dibebasko’?”

³⁴“Temon benor cawa-Ku inji,” ani Isa jama tian. “Jelma sai bebuat dusa, yakdo hamba dusa.

³⁵Rik sai hamba mak ngedok rang sai tetap di delom keluarga, sedang anak untuk selama-lamani ngedok rang delom keluarga.

³⁶Ulihni seno, kik Anak ngebebasko keti, keti temon-temon bebas.

³⁷Sangun Nyak pandai keti inji keturunan Abraham. Kidang keti haga ngebunuh Nyak, mani keti mak haga nerima pengajaran-Ku.

³⁸Api sai Kuliak jama Bapa-Ku, senodo sai Kucawako. Sedang keti ngelakuko api sai diajarko bapakmu jama niku.”

³⁹Tian ngejawab, “Bapak sekam yakdo Abraham.” “Sekirani keti temon-temon anak Abraham,” ani Isa, “pasti keti ngelakuko api sai dilakuko ulih Abraham.

⁴⁰Nyak nyampaiko jama niku kebenoran sai Kudengi jak Allah, kidang keti haga ngebunuh Nyak. Abraham mak bebuat injuk reno!

⁴¹Keti ngelakuko api sai dilakuko ulih bapakmu tenggalan.” Jawab tian, “Sekam lain hak anak-anak haram. Bapa sekam angkah sai, yakdo Allah tenggalan.”

⁴²Raduni Isa cawa jama tian, “Kik Allah udi Bapamu, keti haga ngasihi Nyak, mani Nyak ratong jak Allah. Nyak mak ratong jama kehaga tenggalan, kidang Iado sai ngutus Nyak.

⁴³Api sebabni keti mak ngerti api sai Kucawako? Mani keti mak tahan ngedengi ajaran-Ku.

⁴⁴Iblisdo bapakmu rik keti haga nuruti kemauan bapakmu. Jak permulaan iblis ano jelma sai ngebunuh. Ia mak pernah mihak sai benor, mani mak ngedok sai benor jama ia. Kik ia bebuhung, ano wajar, mani radu injuk reno sifatni. Ia pembuhung rik asal sunyinni kebuhungan.

⁴⁵Kidang Nyak ngucakko kebenoran, rik ulihni senodo keti mak percaya jama Nyak.

⁴⁶Sapa jak hantara keti dapok ngebuktiko bahwa wat dusa jama Nyak? Kik Nyak ngucakko kebenoran, mengapi keti mak percaya jama Nyak?

⁴⁷Jelma sai asalni jak Allah, ngedengi cawa Allah. Kidang keti lain jak Allah, ulihni seno keti mak haga ngedengi.”

⁴⁸Ulun-ulun Yahudi udi ngejawab Isa, “Kan temon cawa sekam bahwa Niku ulun Samaria sai kekurukan sitan?”

⁴⁹Isa ngejawab, “Nyak mak kekurukan sitan. Nyak ngehormati Bapa-Ku, kidang keti ngehina Nyak.

⁵⁰Nyak mak nyepok kehormatan untuk diri tenggalan. Wat sai ngusahako kehormatan untuk-Ku, rik Iado sai ngehakimi.

⁵¹Temon-temon cawa-Ku inji, jelma sai nurut cawa-Ku selama-lamani mak haga mati.”

⁵²Raduni ulun-ulun Yahudi udi cawa jama Isa, “Tano sekam pandai Niku inji temon-temon kekurukan sitan! Abraham tenggalan radu mati, reno muneh unyinni nabi. Kidang Niku cawa, ‘Jelma sai nurut cawa-Ku, selama-lamani mak haga mati.’

⁵³Kik Abraham tenggalan radu mati, rik nabi-nabi sunyinni juga radu mati, Niku inji sapa? Masa Niku lebih balak jak bapak sekam Abraham!”

⁵⁴Isa ngejawab, “Kik Nyak nyepok kehormatan untuk diri-Ku tenggalan, kehormatan udi mak ngedok retini. Sai ngehormati Nyak yakdo Bapa-Ku sai keti anggap Allah keti,

⁵⁵padahal keti mak kenal Ia. Kidang Nyak kenal jama Ia. Sekirani Nyak cawa bahwa Nyak mak kenal Ia, maka Nyak jelma pembuhung, gegoh injuk keti. Nyak kenal Ia, rik menaati cawa-Ni.

⁵⁶Bapakmu Abraham senang nihan bahwa ia haga ngeliak rani-Ku. Ia radu ngeliakni rik ia senang!”

⁵⁷Raduni ulun-ulun Yahudi cawa jama Isa, “Umor-Mu makkung wat lima puluh tahun, rik Niku radu ngeliak Abraham?”

⁵⁸Isa ngejawab, “Temon Nyak cawa jama niku: semakkung Abraham laher, Nyak radu wat.”

⁵⁹Raduni ulun-ulun Yahudi ano ngakuk batu untuk nayar Ia; kidang Isa segok, raduni mik ninggalko Lamban Ibadah.