Read Lampung Api KISAH RASUL-RASUL 1 Bible Online

KISAH RASUL-RASUL 1 - Lampung Api bible

KISAH RASUL-RASUL 1

¹ Bapak Teofilus sai budiman, Di delom bukuku sai mula-mula radu kuterangko sunyinni sai dilakuko rik diajarko ulih Isa jak Ia mulai guai-Ni,

²sampai waktu rani Ia diiwakko mik surga. Semakkung Ia cakak mik surga, jama kuasa Ruh Allah Ia ngeni petunjuk jama rasul-rasul-Ni sai tepilih.

³Radu jak Ia mati, epak puluh rani sakani Ia risok nunjukko jama cara sai nyata nihan jama rasul-rasul udi bahwa Ia temon-temon hurik. Tian ngeliak Ia, Ia cawa jama tian mengenai injuk repa Allah memerintah sebagai Raja.

⁴ Rik pada waktu Ia bekumpul jama tian, Ia ngeni perintah inji jama tian, “Dang mik jak Yerusalem. Tunggu di dudi sampai Bapa ngeniko api sai radu dijanjiko-Ni, yakdo sai radu Kukeni pandai jama niku tumbai.

⁵ Mani Yohanes ngebaptis jama way, kidang pira-pira rani lagi keti haga dibaptis jama Ruh Allah.”

⁶Waktu rasul-rasul udi bekumpul jejama jama Isa, tian betanya jama Ia, “Tuhan, api kedo tano Tuhan haga ngediriko luot pemerintahan bangsa Israel?”

⁷Isa ngejawab, “Bapa-Ku tenggalan sai nantuko rani rik waktuni. Ano mak perlu keti pandai, mani ano hak Bapa.

⁸ Kidang keti haga mansa kuasa, kik Ruh Allah radu ratong jama niku. Rik keti haga jadi saksi-saksi untuk-Ku di Yerusalem, di seluruh Yudea, di Samaria, rik sampai mik uncuk bumi.”

⁹ Radu jak Isa cawa injuk reno, Ia diiwakko mik surga di hadap mata tian, rik awan nyalok Ia jak pandangan tian.

¹⁰Sementara tian masih ngeliak langit, sewaktu Isa teiwak, tiba-tiba rua jelma bekawai handak cecok di kebelah tian.

¹¹“Hai, jelma-jelma Galilea,” ani kerua jelma udi, “mengapi keti cecok gaoh di dudi ngeliak langit? Isa, sai keti liak teiwak mik surga udi di hadap keti, haga muloh luot jama cara udi juga, injuk sai jeno keti liak.”

¹²Kak raduni rasul-rasul udi muloh mik Yerusalem jak Bukit Zaitun. Bukit udi tepik kekira sai kilometer jaohni jak Yerusalem.

¹³ Di Yerusalem tian mik lamban rang tian numpang, raduni cakak mik kamar sai di atas. Rasul-rasul udi, yakdo Petrus rik Yohanes, Yakobus rik Andreas, Filipus rik Tomas, Bartolomeus rik Matius, Yakobus anak Alfeus, Simon Patriot rik Yudas anak Yakobus;

¹⁴tian sunyinni selalu sehati ngumpul untuk bedua. Tian bedua jama-jama bebai-bebai termasuk Maria emakni Isa, rik jama-jama puari-puari Isa.

¹⁵Suatu rani, waktu tian lagi bekumpul — wat kekira seratus rua puluh jelma sai ratong — Petrus cecok untuk cawa. Ia cawa,

¹⁶“Puari-puari! Api sai tetulis di delom Alkitab, ano harus tejadi. Tumbai liwat Daud, Ruh Allah radu benubuat tentang Yudas, jelma sai mimpin jelma-jelma sai nangkok Isa ano.

¹⁷Yudas yakdo salah sai jak ram, rik ia radu dipilih juga untuk beguai jejama jama ram.” (

¹⁸ Yudas inji radu mansa tanoh kuboranni jak upah pengkhianatanni sai jahat. Ia tumbak rik mati jama tenaini tebelah sampai isi tenaini luah sunyinni.

¹⁹Sunyinni jelma sai tinggal di Yerusalem pandai tentang hal seno. Udi sebabni delom bahasa tian, tian ngegelarkoni tanoh udi Akeldama, sai retini ‘Tanoh Rah’.)

²⁰ “Mani di delom buku Mazmur wat tetulis injuk reji, ‘Tagando rang tinggalni jadi mangi; dang sai jelma pun tinggal di delomni.’ Wat tetulis injuk reji muneh, ‘Tagando kedudukanni diakuk ulun bareh.’

²¹ Ulihni seno, harus wat sai jelma sai nutuk jama ram jadi saksi bahwa Tuhan Isa radu hurik luot jak kematian. Ulun udi harus salah sai jak hantara jelma-jelma sai risok jejama jama ram waktu ram nutuk Tuhan Isa mik dipa-dipa, radu jak Yohanes mulai ngebaptis sampai pada waktu Isa diiwak mik surga jak tengah-tengah ram.”

²³Maka jelma-jelma sai hadir di dudi nyaranko rua jelma, yakdo Yusuf sai disebut juga Barsabas (ia disebut Yustus juga), rik Matias.

²⁴Raduni tian bedua. Tian cawa, “Tuhan, Niku pandai hati sunyinni jelma. Yudas radu jatuh jak jabatanni sebagai rasul rik radu mati. Jadi tunjukko jama sekam, sapa jak kerua jelma inji sai Tuhan pilih untuk dikeni tugas ano ngegantiko Yudas.”

²⁶Radu jak seno kerua gelar ano diundi, raduni lotre jatuh jama Matias. Jadi ia diangkat jadi rasul untuk jejama jama kesebelas Rasul sai barehni.