Read Lampung Api KISAH RASUL-RASUL 10 Bible Online

KISAH RASUL-RASUL 10 - Lampung Api bible

KISAH RASUL-RASUL 10

¹Di Kaisarea wat jelma bakas gelarni Kornelius. Ia kapten “Pasukan Italia”.

²Ia jelma sai rabai jama Allah rik seluruh keluargani beibadah jama Allah. Ia lamon nulung jelma-jelma Yahudi sai mejerih, rik ia selalu bedua jama Allah.

³Suatu rani kira-kira pukul telu dibi ia ngeliak jelas nihan delom suatu pengliakan, sai malaikat Allah ratong rik ngurau ia, “Kornelius!”

⁴Kornelius ngeliak malaikat udi jama rabai raduni cawa, “Wat api Tuan?” Malaikat udi ngejawab, “Duamu rik kemurahan hatimu radu diterima ulih Allah rik Allah ingok jama niku.

⁵Tano kayundo ulun mik Yope ngurau Simon sai gelar lengkapni Simon Petrus.

⁶Ia sedang numpang di lamban sai jelma penyamak bawak gelarni Simon, sai tinggal di pingger pantai.”

⁷Radu jak malaikat sai cawa jama Kornelius udi mik, Kornelius ngurau rua jelma sai ngebantu lambanni rik sai jelma anggota tentera pengawalni sai saleh.

⁸Kornelius nyeritako jama tian api sai radu tejadi, raduni ngayun tian mik Yope.

⁹Jemoh ranini, sementara tian masih di delom lapahni rik hamper sampai di Yope, Petrus cakak mik atas lamban untuk bedua.

¹⁰Raduni ia mebetoh nihan rik mirak mengan. Sementara kanikan disediako, ia mansa suatu pengliakan.

¹¹Ia ngeliak langit tebukak rik sai hal injuk kain sai kejung diulurko mik bumi, tegantung di keepak uncukni.

¹²Di delomni wat sunyin macam binatang cukut epak, sunyin binatang sai ngejalar rik burung-burung liar.

¹³Raduni wat suara cawa jama ia, “Petrus, minjak! Tikoldo rik kanik!”

¹⁴Petrus ngejawab, “Mawat, Tuhan! Makkung pernah nyak nganik api-api sai haram rik najis.”

¹⁵Kidang suara udi cawa luot jama ia, “Api sai radu dinyatako halal ulih Allah, dangdo niku anggap udi haram.”

¹⁶Pengliakan udi berulang sampai telu kali, kak raduni kain udi teiwak mik surga.

¹⁷Petrus bingung mikerko api reti jak pengliakan udi. Sementara Petrus bepiker-piker, jelma-jelma sai dikayun ulih Kornelius ngehalu lamban Simon rik tian radu wat di hadap rangok.

¹⁸Raduni tian ngurau jelma rik betanya, “Api di dija wat kuari sai minok, sai gelarni Simon Petrus?”

¹⁹Sementara Petrus masih gaoh terus berusaha in pandai reti jak pengliakan udi, Ruh Allah cawa jama ia, “Hai Petrus, wat telu jelma sedang nyepok niku.

²⁰Payu geluk regah mik debah rik dang ragu-ragu nutuk tian, mani Nyakdo sai ngayun tian.”

²¹Maka Petrus regah mik debah rik cawa jama ulun-ulun udi, “Nyakdo sai puari-puari sepok. Puari-puari ratong untuk api?”

²²Tian ngejawab, “Kapten Kornelius ngayun sekam mik dija. Ia jelma sai betik rik rabai jama Allah, rik dihormati nihan ulih seluruh ulun Yahudi. Sai malaikat Allah ngayun ia ngilu Tuan ratong mik lambanni ulihni, sebagai jawaban atas duani, ia dikayun ngedengiko api sai haga Tuan cawako jama ia.”

²³Maka Petrus nyilako tian kuruk untuk minok di dudi. Jemohni Petrus minjak rik mik jama-jama tian. Pira-pira jelma percaya jak Yope pun nutuk muneh.

²⁴Serani radu jak seno tian sampai di Kaisarea. Di dudi tian radu ditunggu-tunggu ulih Kornelius rik puari-puarini rik kantik-kantik akrabni sai radu diundangni.

²⁵Waktu Petrus sampai, Kornelius mik nyambut ia rik sujud di hadapni.

²⁶Kidang Petrus nulung ia cecok, raduni cawa, “Minjakdo! Nyak tenggalan pun manusia juga.”

²⁷Sementara cawa jama Kornelius, Petrus kuruk mik delom lamban. Di dudi ia ngeliak lamon jelma radu ngumpul.

²⁸Raduni ia cawa jama tian, “Puari-puari tenggalan pandai bahwa ulun Yahudi dilarang ulih agamani untuk napol atau behubungan jama ulun-ulun jak bangsa bareh. Kidang Allah radu nunjukko jama nyak bahwa nyak mak ngasi nganggap sapa pun juga najis atau haram.

²⁹Udi sebabni waktu Tuan ngilu in nyak ratong, nyak mak bekeberatan ratong. Jadi tano nyak haga pandai ngapi Tuan kilu nyak ratong.”

³⁰Kornelius ngejawab, “Telu rani sai liwat, kekira waktu injuk inji, nyak sedang bedua di lamban pukul telu dibi. Tiba-tiba sai jelma bakas cecok di hadapku. Kawai jelma ano bekilauan.

³¹Ia cawa, ‘Kornelius! Allah radu nerima duamu rik ingok jama kemurahan hatimu.

³²Jadi kayundo jelma mik Yope ngurau ulun sai gelarni Simon Petrus. Ia lagi minok di lamban sai jelma penyamak bawak sai gelarni Simon; lamban udi di pingger laok.’

³³Udi sebabni nyak segera ngayun ulun mik ngurau Tuan. Rik Tuan temon betik hati untuk ratong mik dija. Tano sekam sunyinni bekumpul di dija di hadap Allah untuk ngedengiko seluruh sai Allah kayun Tuan cawako jama sekam.”

³⁴ Raduni Petrus cawa, “Tano nyak temon-temon sadar bahwa Allah memperlakuko sunyinni jelma gegoh.

³⁵Jelma sai rabai jama Allah rik bebuat sai benor, ulun udi diterima ulih Allah, mak peduli ia jak bangsa api.

³⁶Puari-puari radu pandai isi kabar sai Allah sampaiko jama bangsa Israel. Kabar udi yakdo mengenai Kabar Betik tentang damai liwat Isa Almasih, yakdo Tuhan sunyinni jelma.

³⁷Keti pandai api sai radu tejadi di seluruh Yudea, yakdo sai mulai jak Galilea radu jak baptisan sai dianjurko ulih Yohanes.

³⁸Keti pandai bahwa Allah radu milih Isa ulun Nazaret udi rik ngeniko jama Ia Ruh Allah rik kuasa. Keti pandai juga bahwa Isa udi mik dipa-dipa untuk ngelakuko sai betik; Ia ngunyaiko seluruh jelma sai dikuasai ulih iblis, mani Allah jejama jama Ia.

³⁹Sekam injido jelma-jelma sai radu ngeliak tenggalan sunyin hal sai Ia lakuko di negeri ulun Yahudi rik di Yerusalem. Walau injuk reno tian nyalibko rik ngebunuh Ia.

⁴⁰Kidang waktu rani sai ketelu Allah ngehurikko Ia luot jak kematian rik ngeliakko Ia jama manusia;

⁴¹mawat jama sunyinni manusia, melainko angkah jama sekam sai radu dipilih ulih Allah lebih mena untuk jadi saksi-saksi-Ni: Sekam mengan rik nginum jama Ia radu jak Ia hurik luot jak kematian.

⁴²Rik Ia ngayun sekam ngabarko Kabar Betik udi jama ulun-ulun rik ngeni kesaksian bahwa Iado sai diangkat ulih Allah jadi Hakim ulun-ulun sai masih hurik rik ulun-ulun sai radu mati.

⁴³Sunyinni nabi-nabi cawa tentang Ia. Tian cawa bahwa sunyinni jelma sai percaya jama Isa, haga diampuni dusani jama kekuasaan jak Isa.”

⁴⁴Sementara Petrus masih cawa, Ruh Allah regah rik nguasai seluruh jelma sai ngedengi kabar udi.

⁴⁵Jelma-jelma Yahudi sai percaya jama Isa rik nutuk Petrus jak Yope, sunyinni hiran ngeliak Allah ngeniko juga Ruh-Ni jama ulun-ulun bangsa bareh sai lain Yahudi.

⁴⁶Mani tian ngedengi ulun-ulun udi cawa delom seluruh bahasa rik memuji-muji keagungan Allah. Raduni Petrus cawa,

⁴⁷“Cuba liak, jelma-jelma inji radu mansa Ruh Allah injuk ram. Jadi dapok kedo ulun ngehalang-halang tian untuk dibaptis jama wai?”

⁴⁸Maka Petrus ngayun tian dibaptis atas gelar Isa Almasih. Radu jak seno tian ngilu in Petrus tinggal jama tian pira-pira rani sakani.