Read Lampung Api KISAH RASUL-RASUL 11 Bible Online

KISAH RASUL-RASUL 11 - Lampung Api bible

KISAH RASUL-RASUL 11

¹Rasul-rasul rik ulun-ulun sai percaya di seluruh Yudea ngedengi bahwa jelma-jelma sai mak beragama Yahudi pun radu nerima cawa Allah.

²Kak raduni waktu Petrus mik Yerusalem, jelma-jelma Yahudi sai radu percaya udi, ngereneh Petrus.

³Tian cawa, “Mengapi niku mik di lamban jelma-jelma sai makkung disunat? Niku malah mengan juga jejama jama tian!”

⁴Ulihni seno Petrus nerangko jama tian sunyinni sai radu tejadi, mulai jak mula-mula. Petrus cawa,

⁵“Nyak sedang bedua di kota Yope, raduni nyak ngeliak pengliakan. Nyak ngeliak wat sai hal sai injuk selembar kain sai berak diregahko jak langit, tegantung di keepak uncukni, raduni taru di kebelahku.

⁶Waktu nyak ngeperhatiko mik delom, nyak ngeliak binatang-binatang cukut epak, binatang-binatang liar, binatang-binatang sai melata, rik burung-burung liar.

⁷Raduni nyak ngedengi suatu suara cawa jama nyak, ‘Payu minjak, Petrus! Tikoldo ano rik kanik!’

⁸Kidang nyak ngejawab, ‘Mawat, Tuhan! Makkung pernah nyak nganik kanikan sai haram atau najis.’

⁹Kidang suara udi cawa luot jak langit, ‘Barang sai radu dinyatako halal ulih Allah dang di ucakko haram.’

¹⁰Nyak ngeliak hal seno sampai telu kali rik akherni sunyinni teiwak muloh mik surga.

¹¹Tepat pada waktu seno juga ketelu jelma jak Kaisarea, sai diutus jama nyak, sampai di lamban rangku minok.

¹²Raduni Ruh Allah ngayun nyak mik jama-jama tian jama mak ragu-ragu. Keenam jelma muari inji pun nutuk jama nyak mik Kaisarea, rik sekam sunyinni kuruk mik delom lambanni Kornelius.

¹³Radu jak seno Kornelius nyeritako jama sekam injuk repa ia ngeliak sai malaikat cecok di lambanni rik cawa, ‘Kayun jelma mik Yope ngurau sai jelma bakas sai gelarni Simon Petrus.

¹⁴Ia haga nyampaiko jama niku kabar sai haga nyelamatko niku rik keluargamu.’

¹⁵Rik waktu nyak mulai cawa injuk reno,” cawa Petrus nerusko ceritani, “Ruh Allah ratong mik atas tian, gegoh injuk sai tejadi jama ram tumbai mula-mulani.

¹⁶ Raduni nyak teingok, Tuhan pernah cawa, ‘Yohanes ngebaptis jama way, kidang keti haga dibaptis jama Ruh Allah.’

¹⁷Jadi jelas Allah ngeniko juga jama jelma-jelma sai mak beragama Yahudi ano, pengenian sai gegoh Ia keniko jama ram pada waktu ram percaya jama Tuhan Isa Almasih. Ulihni seno, dipa mungkin nyak ngelarang Allah!”

¹⁸Radu jak ngedengi seno, tian mak ngebantah lagi. Raduni tian memuji Allah. Tian cawa, “Kik injuk reno, jelma-jelma lain Yahudi pun dikeni kesempatan ulih Allah untuk betubat jak dusa-dusani rik ngehayati hurik sai sejati!”

¹⁹ Radu jak Stefanus dibunuh, jelma-jelma sai percaya jama Isa mulai dibedak-bedak, sehingga tian terpencar-pencar mik dipa-dipa. Wat sai tegar sampai mik Fenisia, rik wat muneh sai sampai di Siprus rik Antiokhia. Tian ngabarko kabar jak Allah angkah jama jelma-jelma Yahudi gaoh.

²⁰Kidang jak hantara jelma-jelma sai percaya udi, sai asalni jak Siprus rik Kirene, wat juga jelma-jelma sai mik di Antiokhia rik ngabarko Kabar Betik tentang Isa ano jama jelma-jelma sai mak beragama Yahudi juga.

²¹Kuasa Tuhan wat jama tian sehingga lamon jelma sai percaya rik nyerahko diri jama Tuhan.

²²Cerita-cerita tentang peristiwa-peristiwa inji sampai juga jama jemaah di Yerusalem. Maka tian ngutus Barnabas mik Antiokhia.

²³Rik waktu Barnabas sampai di dudi, rik ngeliak injuk repa Allah ngeberkati jelma-jelma udi, ia riang nihan. Raduni ia ngilu in tian temon-temon setia jama Tuhan jama sepenuh hati.

²⁴Barnabas inji jelma sai betik hati rik dikuasai Ruh Allah rik percaya nihan jama Tuhan sehingga lamon jelma nutuk Tuhan.

²⁵Kak raduni Barnabas mik Tarsus nyepok Saulus.

²⁶Radu jak betungga jama Saulus, ia ngusung Saulus mik Antiokhia rik setahun sakani tian bekumpul jama jemaah di disan sambil ngajar lamon jelma. Di Antiokhia udido jelma-jelma sai percaya jama Isa untuk mula-mula kali disebut jelma-jelma Kristen.

²⁷Waktu masa seno wat pira-pira nabi ratong jak Yerusalem mik Antiokhia.

²⁸ Di hantarani wat sai jelma gelarni Agabus. Ulih durongan Ruh Allah ia benubuat bahwa di seluruh dunia haga tejadi zaman kebetohan sai hibat. (Rik hal seno sangun tejadi juga waktu Kaisar Klaudius memerintah.)

²⁹Maka sunyinni jelma sai nutuk Isa udi sepakat untuk ngirim sumbangan jama puari-puari sai tinggal di Yudea; masing-masing ngirim nurut kemampuanni.

³⁰Persetujuan udi dilaksanako juga, raduni Barnabas rik Saulus diutus untuk ngantakko sumbangan ano jama jelma-jelma sai mimpin jemaah.