Read Lampung Api KISAH RASUL-RASUL 12 Bible Online

KISAH RASUL-RASUL 12 - Lampung Api bible

KISAH RASUL-RASUL 12

¹Sekitar zaman seno juga Raja Herodes mulai nindas anggota-anggota jemaah.

²Atas perintahni, Yakobus, puari Yohanes dibunuh jama pedang.

³Waktu Herodes ngeliak bahwa perbuatanni udi nyenangko hati ulun-ulun Yahudi, ia bebuat lagi sai injuk reno; ia ngayun jelma nangkok Petrus muneh. Hal seno tejadi pada waktu Rani Buka Ruti Mak Beragi.

⁴ Radu jak ditangkok, Petrus dikurukko delom bui. Epak regu tentera ditugasko untuk ngejaga Petrus di dudi — masing-masing regu terdiri jak epak jelma anggota tentera. Radu jak perayaan Paskah selesai, ampai Herodes haga ngadili Petrus di hadapan umum.

⁵Jadi Petrus ditahan di bui; kidang anggota-anggota jemaah terus gaoh bedua temon-temon jama Tuhan untuk Petrus.

⁶Waktu di bingi semakkung Herodes haga ngehadapko Petrus jama rakyat, Petrus pedom di hantara rua prajurit culukni diikok jama rua rantai. Di rangok bui, pengawal-pengawal lain juga sedang ngejaga bui.

⁷Tiba-tiba malaikat Tuhan cecok di dudi rik suatu cahaya besinar di delom kamar bui ano. Malaikat udi ngeguyang-guyang Petrus sampai ia minjak. Raduni malaikat udi cawa, “Hai, geluk minjak!” Waktu seno juga gugordo rantai besi jak culuk Petrus.

⁸Radu jak seno malaikat ano cawa, “Pakaido kawaimu rik ikokko tali sepatumu.” Maka Petrus pun memakai kawaini rik ngikok tali sepatuni. Kak raduni malaikat udi cawa luot, “Pakaido jubahmu rik tutuk nyak.”

⁹Maka Petrus nutuk malaikat ano luah jak bui. Kidang Petrus mak sadar bahwa api sai sedang dilakuko ulih malaikat udi sai hal sai temon-temon tejadi. Petrus nyangko udi angkah suatu pengliakan.

¹⁰Pada waktu tian radu ngeliwati rang penjagaan mula-mula rik kerua, tian sampai di rangok besi, sai nuju mik kota. Rangok udi tebukak tenggalan, raduni tian luah rik lapah ngeliu suatu lorong. Tiba-tiba malaikat udi ninggalko Petrus.

¹¹Radu jak seno ampai Petrus sadar jama api sai radu tejadi jama ia, raduni ia cawa, “Tano nyak pandai bahwa Tuhan temon-temon radu ngirim malaikat-Ni untuk ngelepasko nyak jak kuasa Herodes rik jak sunyin hal sai haga dilakuko ulih bangsa Yahudi jama nyak.”

¹²Radu jak menyadari keadaan ano, Petrus mik lamban Maria, emak Yohanes sai disebut juga Markus. Di dudi lamon jelma bekumpul rik sedang bedua.

¹³Petrus netuk rangok luah, raduni sai jelma sai ngebantu bebai gelarni Rode, ratong untuk ngebukak rangok.

¹⁴Langsung ia kenal suara Petrus. Ulihni riangni, ia geluk-geluk kuruk luot tanpa ngebukak rangok, raduni ngeni pandai jama jelma-jelma di dudi bahwa Petrus wat di luah.

¹⁵“Niku luangan!” ani tian. Kidang Rode yakin bahwa udi temon-temon Petrus. Maka tian cawa, “Udi malaikatni!”

¹⁶Sementara ano Petrus terus gaoh netuk rangok. Maka waktu tian ngebukak rangok, rik ngeliak Petrus, tian hiran nihan.

¹⁷Petrus ngeni isyarat jama culukni in tian tenang, kak raduni ia nyeritako injuk repa Tuhan radu ngusung ia luah jak bui. Raduni ia cawa, “Keni pandai inji jama Yakobus rik puari-puari bareh juga.” Radu jak seno Petrus ninggalko rang udi rik mik di rang sai bareh.

¹⁸Jemoh ranini tejadido keributan di hantara tentera pengawal. Tian bingung nihan mengenai api sai radu tejadi jama Petrus.

¹⁹Raduni Herodes ngayun ulun nyepok Petrus, kidang tian mak dapok ngehalu ia. Jadi Herodes merintahko in pengawal-pengawal udi ditanya pai raduni dibunuh. Radu jak seno Herodes mik jak Yudea rik tinggal pira-pira saka di Kaisarea.

²⁰Herodes butong nihan jama jelma-jelma Tirus rik Sidon. Ulihni seno tian jama-jama ratong ngehadap ia. Mula-mula tian ngebujuk Blastus, sai jadi kepala istana Herodes, hingga ia memihak tian. Kak raduni tian mik ngehadap Herodes, raduni ngilu bedamai, mani negeri tian begantung jama kanikan jak negeri Herodes.

²¹Suatu rani sai radu ditantuko, Herodes makai kawai kebesaranni raduni mejong di kursi kerajaan rik mulai bepidato di hadap rakyat.

²²Rakyat sai sedang ngedengiko ano beseru-seru, “Inji suara diwa, lain suara manusia!”

²³Pada waktu seno juga malaikat Tuhan nampar Herodes, mani ia mak ngehormati Allah. Herodes raduni mati dikanik gelong.

²⁴Maka cawa Allah semakin tesebar luas rik semakin kuat.

²⁵Radu jak Barnabas rik Saulus nyelesaiko tugas, tian muloh jak Yerusalem ngusung Yohanes Markus jama-jama tian.