Read Lampung Api KISAH RASUL-RASUL 2 Bible Online

KISAH RASUL-RASUL 2 - Lampung Api bible

KISAH RASUL-RASUL 2

¹ Waktu radu sampai rani Pentakosta, sunyinni jelma percaya bekumpul di sai rang.

²Tiba-tiba kedengian bunyi jak langit injuk tiupan angin keras. Lamban di dipa jelma-jelma udi lagi mejong sunyinni latap jama bunyi ano.

³Raduni tian ngeliak ema-ema injuk nyala apui ngejalar mik dipa-dipa rik hinggap jama tian masing-masing.

⁴Tian sunyinni dikuasai ulih Ruh Allah, rik mulai cawa delom bemacam-macam bahasa bareh. Tian cawa nutuk api sai dikeniko ulih Ruh udi jama tian untuk dicawako.

⁵Pada waktu ano lamon jelma Yahudi, jak bebagai-bagai negeri di seluruh dunia, tinggal di Yerusalem. Tian ano jelma-jelma sai taat jama Allah.

⁶Waktu kedengian bunyi ano, lamon nihan ulun ratong bekerumun. Tian sunyinni tekanjat ngedengi ulun-ulun percaya udi cawa delom bahasa tian masing-masing.

⁷Jama hiran rik tepesona tian cawa, “Ulun-ulun sai cawa inji sunyinni jelma-jelma Galilea, kan?

⁸Injuk repa tejadini sehingga ram ngedengi tian cawa di delom bahasa negeri ram masing-masing?

⁹Ram jelma-jelma jak Partia, Media, Elam; jak Mesopotamia, Yudea rik Kapadokia; jak Pontus rik Asia,

¹⁰jak Frigia rik Pamfilia, jak Mesir rik daerah-daerah Libia redik Kirene; wat jak ram sai ratong jak Roma,

¹¹wat jelma-jelma Yahudi rik wat juga jelma-jelma bangsa bareh sai radu kuruk agama Yahudi; wat juga sai ratong jak Kreta rik Arab. Ram sunyinni ngedengi tian cawa delom bahasa ram masing-masing mengenai hal-hal sai ajaib sai dilakuko ulih Allah!”

¹²Jama rasa hiran rik tepesona tian sunyinni betanya peperda tian, “Api retini sinji?”

¹³Kidang wat juga ulun-ulun sai ngereneh. Tian cawa, “Ah, ulun-ulun udi angkah mabuk gaoh!”

¹⁴Raduni Petrus cecok jejama sebelas rasul sai bareh, rik cawa jama ulun lamon udi. Jama suara sai keras ia cawa, “Puari-puari, jelma Yahudi rik sunyinni sai tinggal di Yerusalem! Dengiko betik-betik, sebab hal inji perlu kujelasko jama niku.

¹⁵Jelma-jelma inji mawat mabuk, injuk sai keti sangko; mani tano ampai pukul siwa pagi.

¹⁶Kidang sinji radu dikeni pandai ulih Allah liwat Nabi Yoël:

¹⁷ Allah cawa, ‘Pada akher zaman Nyak haga nyurahko Ruh-Ku mik atas sunyinni jelma. Anak-anakmu sai bakas rik anak-anakmu sai bebai haga ngeni pandai jama niku hal-hal sai Kukeni pandai jama tian. Jelma-jelma ngura niku haga ngeliak hal-hal sai Kuliakko jama tian. Ulun-ulun tuha niku haga behanipi tentang hanipi sai Kukeniko jama tian.

¹⁸Untuk hamba-hamba-Ku pun — baik bakas ataupun bebai — haga Kucurahko Ruh-Ku waktu rani-rani udi. Tian haga ngeni pandai hal-hal sai Kukeni pandai jama tian.

¹⁹Nyak haga nyani keajaiban-keajaiban di atas udi di langit, rik hal-hal luar biasa di debah dija di bumi; haga wat rah rik apui, uap rik hasok.

²⁰Matarani haga jadi kelam, bulan jadi suluh injuk rah semakkung Rani Tuhan, rani sai balak rik mulia ano ratong.

²¹Pada waktu ano, ulun sai beseru jama Tuhan haga diselamatko.’

²²Puari-puari ulun-ulun Israel! Dengiko api sai kucawako inji: Isa ulun Nazaret udi radu dikeni tugas ulih Allah untuk keti. Udi nyata nihan di keajaiban-keajaiban rik hal-hal luar biasa sai Allah lakuko di tengah-tengah keti liwat Isa udi. Sunyinni ano keti tenggalan radu pandai.

²³ Sesuai rencana-Ni tenggalan, Allah mutusko untuk nyerahko Isa jama keti. Rik waktu Ia diserahko, keti ngebunuh Ia jama naganko ulun-ulun jahat nyalibko Ia.

²⁴ Kidang Allah ngehurikko Ia luot jak hantara ulun-ulun mati. Ia dibelot ulih kematian, kidang Allah ngelepasko-Ni, mani mak mungkin Ia dikuasai terus ulih kematian.

²⁵ Mengenai Isa inji Daud pernah cawa, ‘Nyak ngeliak Tuhan selalu di hadapku; Ia ngeredik nyak, in nyak mak diguncangko ulih api pun.

²⁶Udi sebabni hatiku riang nihan, bangukku ngucapko puji-pujian: rik badanku inji haga tenteram nunggu di delom kubor.

²⁷Mani Niku mak naganko jiwaku tinggal di delom dunia ulun mati. Niku mak naganko hamba-Mu sai setia ano hancor rik bela.

²⁸Niku radu nunjukko jama nyak renglaya sai nuju hurik sai sejati. Kerianganku meluap-luap mani Niku wat jejama nyak.’

²⁹Puari-puari, izinko nyak cawa terus terang tentang Daud, bapak leluhur ram udi. Ia radu mati rik radu dikuborko muneh; kuboranni masih wat di tengah-tengah ram sampai tano.

³⁰ Allah radu bejanji jama Daud, busumpah, bahwa salah sai jak keturunanni haga diangkat ulih Allah jadi raja. Mani Daud pandai jama janji ano rik mani ia nabi juga,

³¹ia pandai muneh api sai haga dilakuko ulih Allah. Jadi ia radu benubuat bahwa Raja Penyelamat sai dijanjiko ulih Allah, haga hurik luot jak kematian. Daud cawa, ‘Ia mak ditaganko tetinggal di delom dunia ulun-ulun mati; badan-Ni mak jadi hancor rik bela.’

³²Isa injido sai dihurikko luot jak kematian ulih Allah. Sekam sunyinni radu nyaksiko tenggalan hal seno.

³³Ia diangkat pada kedudukan sai langgar rik dikeni kekuasaan ulih Allah, raduni nerima Ruh Allah sai radu dijanjiko ulih Bapa. Rik sai keti tano inji dengi rik liak yakdo Ruh ano sai Ia curahko jama sekam.

³⁴ Daud tenggalan mak cakak mik surga, kidang Daud cawa, ‘Tuhan cawa jama Tuhanku:

³⁵Mejongdo di kebelah kanan-Ku, sampai Nyak nyani musuh-musuh-Mu takluk jama Niku!’

³⁶Reno sebabni sunyinni ulun Israel harus pandai temon-temon bahwa Isa sai keti salibko udi, Isa udido juga sai radu dijadiko ulih Allah jadi Tuhan rik Raja Penyelamat!”

³⁷Waktu ulun-ulun udi ngedengi hal ano, hati tian gelisah nihan. Raduni tian betanya jama Petrus rik rasul-rasul sai barehni, “Puari-puari, sekam harus bebuat api?”

³⁸Petrus ngejawab, “Betubatdo jak dusa-dusamu. Rik hagani keti masing-masing dibaptisko atas gelar Isa Almasih, in dusa-dusamu diampuni. Maka Puari-puari haga nerima hadiah Ruh Allah jak Allah.

³⁹Mani sai dijanjiko ulih Allah udi iado untuk niku rik keturunanmu rik untuk ulun-ulun sai wat di rang-rang sai jaoh — yakdo sunyinni jelma sai diurau ulih Allah Tuhan ram untuk ratong jama Ia.”

⁴⁰Injuk renodo Petrus ngejelasko jama tian. Rik jama lamon cawa sai bareh muneh ia nganjurko tian in tian ngelepasko diri jak bangsa sai jahat inji sai haga dihukum ulih Allah.

⁴¹Lamon ulun percaya api sai dicawako ulih Petrus, raduni tian dibaptis. Maka jumlah ulun percaya waktu rani seno betambah luot sampai telu ribu jelma.

⁴²Jama ketekunan tian belajar terus jak rasul-rasul rik selalu bekumpul jama-jama. Tian mengan jama-jama rik bedua jama-jama.

⁴³Lamon nihan keajaiban sai dilakuko ulih rasul-rasul udi sehingga sunyinni ulun kagum rik rabai.

⁴⁴ Jelma-jelma percaya udi sunyinni terus besatu rik api sai tian kedau, tian pakai jama-jama.

⁴⁵Tian ngejual barang-barang rik harta kedau tian, raduni ngebagi-bagiko duitni di hantara tian sunyinni nutuk kebutuhan masing-masing.

⁴⁶Unggal rani tian terus bekumpul di Lamban Ibadah; rik mengan jama-jama, jama riang rik rendah hati di lamban-lamban tian.

⁴⁷Tian terus muji-muji Allah rik disenangi ulih sunyinni jelma. Unggal rani jumlah tian terus betambah mani Tuhan ngeniko jama tian jelma-jelma sai sedang diselamatko.