Read Lampung Api KISAH RASUL-RASUL 20 Bible Online

KISAH RASUL-RASUL 20 - Lampung Api bible

KISAH RASUL-RASUL 20

¹Seraduni keadaan di Efesus tenang luot, Paulus ngumpulko jemaah rik ngeni durongan jama tian. Kak raduni ia ngucakko selamat tinggal raduni nerusko lapahni mik Makedonia.

²Ia napol daerah-daerah Makedonia rik ngeni lamon petuah jama ulun-ulun sai percaya jama Isa di dudi untuk ngeni durongan jama tian. Raduni ia mik di Yunani.

³Telu bulan sakani ia tinggal di disan. Raduni waktu ia sedang besiap-siap untuk belayar mik Siria, wat kabar bahwa jelma-jelma Yahudi sedang sepakat untuk ngebunuh ia. Ulihni seno ia mutusko untuk muloh ngeliu Makedonia.

⁴Sopater anak Pirus sai asalni jak Berea mik jejama ia; reno muneh Aristarkhus rik Sekundus ulun Tesalonika, rik Gayus ulun Derbe. Juga Timotius, Tikhikus rik Trofimus, jelma-jelma jak provinsi Asia.

⁵Tian ngehena sekam raduni nunggu sekam di Troas.

⁶Radu jak Perayaan Ruti Mak Beragi, sekam belayar ninggalko Filipi. Lima rani jak seno sekam bekumpul luot jama tian di Troas. Di dudi sekam tinggal seminggu.

⁷Bingi minggu sekam bekumpul untuk mengan jejama secara muwari. Paulus ngicik-ngicik jama ulun-ulun, mani jemohni ia beniat berangkat. Sampai tengah bingi Paulus ngicik terus.

⁸Delom kamar di tingkat atas, rang sekam bekumpul udi, wat lamon lampu.

⁹Sai sanak ngura gelarni Eutikhus mejong di sekapan. Mani Paulus mak taru-taru ngicik, sanak ngura udi tegedugok nihan sampai ia pedom di sekapan udi, raduni ia tumbak mik debah jak tingkat telu. Waktu tian ngiwakkoni, ia radu mati.

¹⁰Kidang Paulus regah mik debah, raduni ngerebahko badan di atas sanak ngura udi rik nekapni. Paulus cawa, “Dang khuater, ia masih hurik!”

¹¹Kak raduni Paulus cakak luot mik atas, raduni ngebagi-bagiko ruti rik nganik jama-jama. Radu saka ngicik jama ulun-ulun sampai pagi, Paulus berangkat.

¹²Jelma-jelma ngusung mulang sanak ngura ano hurik mik lambanni. Tian ngerasa senang rik tehibur nihan.

¹³Sekam mik kapal raduni belayar lebih mena mik Asos untuk nyunsung Paulus mik kapal di disan. Ia radu ngator injuk reno mani ia haga mik disan ngeliu renglaya darak.

¹⁴Radu jak betungga di Asos, Paulus geluk cakak mik kapal raduni sekam belayar mik Metilene.

¹⁵Jak udi sekam belayar muneh, rik jemohni sampai di rang sai behadapan jama Khios. Sawaini sekam sampai di Samos rik serani jak seno di Miletus.

¹⁶Paulus radu netapko untuk mak singgah di Efesus, in dang ngetokko waktu di daerah Asia. Sedapok mungkin ia mirak geluk-geluk sampai di Yerusalem di rani buka Pentakosta.

¹⁷Jak Miletus Paulus ngirim kabar mik Efesus untuk ngilu jelma-jelma sai mimpin jemaah di dudi ratong betungga jama ia.

¹⁸Waktu tian sampai, Paulus cawa jama tian, “Puari-puari pandai injuk repa nyak hurik selama inji di hantara keti radu jak rani mula-mula nyak sampai di Asia.

¹⁹Jama rendah hati rik jama lamon way mata, nyak beguai untuk Tuhan di tengah-tengah penderitaan sai kualami mani rencana jahat ulun-ulun Yahudi.

²⁰Puari pandai bahwa nyak mak segan-segan ngeni pandai jama keti api sai beguna bagimu. Nyak ngajar keti di pertemuan-pertemuan umum rik di lamban-lamban.

²¹Baik jama ulun-ulun Yahudi maupun jama ulun-ulun bangsa bareh nyak selalu ngeni peringatan in tian betubat jak dusa-dusa tian rik ratong jama Allah, rik percaya jama Tuhan Isa.

²²Tano untuk mentaati perintah Ruh Allah, nyak mik di Yerusalem. Rik nyak mak pandai api sai haga tejadi jama nyak di dudi.

²³Nyak angkah pandai bahwa di unggal-unggal kota, Ruh Allah radu tegas ngeni pandai jama nyak, bahwa nyak haga kuruk bui rik haga menderita.

²⁴ Kidang nyak mak peduli jama hurikku inji, asal nyak dapok ngeraduko tugas sai dipercayako Tuhan Isa jama nyak rik asal nyak setia sampai akher hurikku untuk ngabarko Kabar Betik udi tentang rahmat Allah.

²⁵Nyak radu napol Puari-puari sunyinni rik radu ngabarko juga tentang injuk repa Allah memerintah sebagai Raja. Tano nyak rasa mak haga betungga lagi jama Puari-puari.

²⁶Ulihni seno nyak tegas ngucakko jama niku pada rani inji bahwa kik wat di hantara keti sai binasa kanah, ano lain salahku.

²⁷Mak pernah nyak lijung jak tugasku untuk ngejelasko jama keti seluruh rencana Allah.

²⁸Hagani keti ngejaga diri rik jagado muneh sunyinni jemaah sai radu diserahko ulih Ruh Allah jama niku untuk dijaga; mani keti radu diangkat jadi pengawas jemaah udi. Hagani keti ngejaga jemaah Allah udi injuk gembala ngejaga biri-birini, mani Allah radu ngejadiko jemaah udi kedau-Ni tenggalan liwat kematian Anak-Ni tenggalan.

²⁹Radu jak nyak mik, pasti haga ratong serigala-serigala sai buas mik tengah-tengah keti. Rik jelma-jelma sai keti jaga udi haga jadi mangsa serigala-serigala udi.

³⁰Malah jak hantara Puari-puari tenggalan pun haga muncul jelma-jelma sai haga ngabarko kabar sai mak benor. Tian nyani injuk reno in jelma-jelma sai radu percaya jama Isa jadi sesek rik nutuk tian.

³¹Ulihni seno bejaga-jagado! Ingok bahwa telu tahun sakani jama lamon way mata, di rani rik di bingi nyak mak pernah taru ngajar unggal jelma jak keti.

³²Tano nyak nyerahko keti jama Allah in Ia sai memelihara keti rik in keti nyating kabar rahmat Allah. Allah ngedok kuasa untuk nguatko keti rik ngeniko jama niku berkat-berkat sai radu disediako-Ni untuk seluruh umat-Ni.

³³Makkung pernah nyak mirak duit atau kawai jak sai jelma pun.

³⁴Puari tenggalan pandai, bahwa jama tenagaku tenggalan nyak beguai untuk nyukupi kebutuhan nyak rik kantik-kantik nyak sai nutuk jama nyak.

³⁵Delom sunyin perkara nyak radu ngeni teladan jama niku bahwa jama kerja keras injuk inji ram harus nulung jelma-jelma sai mak kuat. Mani ram harus ingok api sai Tuhan Isa tenggalan radu ucakko, ‘Lebih bahagia ngeni jak nerima.’ ”

³⁶Radu Paulus selesai cawa, ia belutut jama tian sunyinni raduni bedua.

³⁷Tian sunyinni miwang sambil nekap Paulus rik ngucakko selamat jalan.

³⁸Tian sedih nihan, terutama mani Paulus cawa bahwa tian mak haga ngeliak ia lagi. Raduni tian ngantakko ia sampai mik kapal.