Read Lampung Api KISAH RASUL-RASUL 23 Bible Online

KISAH RASUL-RASUL 23 - Lampung Api bible

KISAH RASUL-RASUL 23

¹Paulus nuntong anggota-anggota mahkamah udi raduni cawa, “Puari-puariku! Sampai rani inji nyak mak ngerasa besalah jama Allah di delom hati nuraniku mengenai hurikku.”

²Waktu Paulus cawa injuk reno, Imam Agung Ananias ngayun jelma sai cecok di kebelah Paulus nampar banguk Paulus.

³ Maka Paulus cawa jama imam agung udi, “Allah pasti nampar niku, jelma munafik sai icak-icak suci! Niku mejong di dudi ngehakimi nyak menurut hukum Musa, padahal niku tenggalan ngelanggar hukum ano jama ngayun ulun nampar nyak!”

⁴Jelma sai di kebelah Paulus cawa jama Paulus, “Niku ngehina imam agung Allah!”

⁵ Paulus ngejawab, “Oh, nyak mak pandai, Puari-puari bahwa ia imam agung. Sangun delom Alkitab wat tetulis, ‘Dang niku ngehina jelma sai mimpin bangsamu.’ ”

⁶ Paulus ngeliak bahwa sebagian jak anggota-anggota mahkamah udi terdiri jak ulun-ulun Saduki rik sebagian lagi terdiri jak ulun-ulun Farisi. Mani ulihni seno ia cawa jama mahkamah udi, “Puari-puari! Nyak jelma Farisi, keturunan Farisi. Nyak diadili di dija ulih sebab nyak percaya bahwa ulun-ulun mati haga hurik luot.”

⁷Waktu ia cawa injuk reno, ulun-ulun Farisi rik ulun-ulun Saduki udi mulai betangkar, sehingga sidang pecoh jadi rua golongan. (

⁸ Mani ulun-ulun Saduki bependapat bahwa ulun mati mak hurik lagi, bahwa malaikat mak ngedok, rik ruh-ruh juga mak ngedok; sedangko ulun Farisi percaya jama sunyinni ano.)

⁹Maka timbuldo keributan sai hibat. Pira-pira ulun Farisi sai jadi guru agama cecok rik nantang temon-temon. Tian cawa, “Menurut sekam jelma inji mak besalah cutik pun! Halokni sangun wat ruh atau malaikat sai cawa jama ia!”

¹⁰Pertangkaran udi jadi hibat nihan hingga komandan udi rabai kintu Paulus dikeruyok ulih tian. Jadi ia ngayun pasukanni mik ngakuk Paulus jak tengah-tengah jelma-jelma udi rik ngusung ia mik markas.

¹¹Bingi selanjutni Tuhan Isa cecok di kebelah Paulus rik cawa, “Kuatko hatimu! Niku radu ngeni kesaksianmu mengenai Nyak di Yerusalem. Niku kanah harus ngeni kesaksian udi di Roma juga.”

¹²Pagi-pagi jemoh ranini, jelma-jelma Yahudi mulai nyani komplotan. Tian besumpah mak haga mengan atau nginum kik tian makkung ngebunuh Paulus.

¹³Wat lebih jak epak puluh jelma sai nyani komplotan udi.

¹⁴Tian mik jama imam-imam kepala rik jelma-jelma sai mimpin Yahudi rik cawa, “Sekam radu besumpah jama-jama, mak haga mengan atau nginum api-api kik sekam makkung ngebunuh Paulus.

¹⁵Nah, tano Puari-puari jama anggota-anggota Mahkamah Agama hagani ngirim surat jama komandan pasukan Roma udi untuk ngilu ia ngusung Paulus muloh ngehadap keti, seolah-olah keti haga meriksa luot perkarani lebih teliti. Rik sekam siap untuk ngebunuh ia semakkung ia sampai di dija.”

¹⁶Kidang anak jak puari bebai Paulus ngedengi rencana komplotan udi. Maka ia mik markas rik ngeni pandai hal udi jama Paulus.

¹⁷Paulus ngurau sai perwira rik cawa jama ia, “Usungdo sanak ngura inji mik jama komandan; ia haga ngelaporko sai hal jama ia.”

¹⁸Perwira udi ngusung sanak ngura udi mik jama komandan rik cawa, “Paulus, tahanan udi, ngurau nyak rik ngilu nyak ngusung sanak ngura inji mik jama Bapak; ia haga ngelaporko sai hal.”

¹⁹Komandan udi nyating culuk sanak ngura udi, raduni ngusung ia menyendiri mik geler rik betanya, “Niku haga ngeni pandai api jama nyak?”

²⁰Sanak ngura udi ngejawab, “Ulun-ulun Yahudi radu sepakat untuk ngilu Tuan ngusung Paulus ngehadap Mahkamah Agama jemoh, seolah-olah tian haga meriksa lagi perkarani lebih teliti.

²¹Kidang dangdo Tuan tutuk kiluan tian udi, mani wat lebih epak puluh jelma sai sedang segok untuk ngehadang ia di renglaya. Tian sunyinni radu besumpah mak haga mengan rik nginum kik tian makkung ngebunuh Paulus. Tano pun tian radu siap; tinggal nunggu jawaban Tuan gaoh.”

²²Komandan udi cawa, “Dang keni pandai jama sapa pun bahwa niku radu ngelaporko inji jama nyak.” Raduni ia ngayun sanak ngura udi mulang.

²³Kak raduni komandan udi ngurau rua perwira, raduni ia cawa jama tian, “Siapko rua ratus prajurit jama-jama pitu puluh tentera bekuda rik rua ratus tentera makai tumbak untuk berangkat pukul siwa bingi inji juga mik Kaisarea.

²⁴Sediako juga kuda untuk Paulus rik usungdo ia selamat sampai jama Gubernur Feliks.”

²⁵Raduni komandan udi nulis surat sai bunyini injuk berikut,

²⁶“Sai Mulia Gubernur Feliks. Salam jak Klaudius Lisias!

²⁷Jelma inji radu ditangkok ulih ulun-ulun Yahudi rik hamper gaoh tian bunuh, kik nyak mak ratong jama pasukanku rik nyelamatko ia; mani nyak ngedengi bahwa ia warga negara Roma.

²⁸Mani nyak mirak pandai api sebenorni kesalahan sai tian tuduhko jama ia, maka nyak ngusungni jama Mahkamah Agama tian.

²⁹Ternyata ia mak ngelakuko sai pun sai patut dihukum jama hukuman mati atau di bui. Tuduhan tian jama ia angkah behubungan jama hukum-hukum agama tian tenggalan.

³⁰Radu nyak dikeni pandai bahwa wat rencana jahat jak ulun-ulun Yahudi tehadap ia. Jadi langsung nyak ngirim ia mik jama Tuan Gubernur. Rik nyak radu ngayun para penuduhni ngusung pengaduan tian tehadapni jama Tuan.”

³¹Maka anggota-anggota tentera udi ngejalanko tugas tian. Tian ngakuk Paulus raduni ngusung ia bingi seno sampai di Antipatris.

³²Jemohni naganko pasukan bekuda nerusko lapahni jama Paulus, rik tian tenggalan muloh mik markas.

³³Waktu pasukan bekuda udi sampai di Kaisarea, tian nyampaiko surat udi jama gubernur, raduni nyerahko Paulus jama ia.

³⁴Radu jak gubernur udi ngebaca surat udi, ia betanya jama Paulus jak ipa asalni. Waktu ia pandai bahwa Paulus asalni jak Kilikia,

³⁵ia cawa, “Payudo! Nyak haga meriksa perkaramu, kik ulun-ulun sai ngaduko niku radu sampai di dija.” Raduni ia merintahko in Paulus ditahan di delom istana Herodes.