Read Lampung Api KISAH RASUL-RASUL 24 Bible Online

KISAH RASUL-RASUL 24 - Lampung Api bible

KISAH RASUL-RASUL 24

¹Lima rani jak seno, Imam Agung Ananias rik jelma-jelma sai mimpin Yahudi mik di Kaisarea jama-jama sai pengacara sai gelarni Tertulus. Tian ngehadap Gubernur Feliks rik ngemukako pengaduan tian tehadap Paulus.

²Waktu Tertulus diurau mik hadap, ia nuduh Paulus injuk reji, “Tuan Gubernur Sai Mulia! Di debah pimpinan Tuan negeri sekam tenteram. Rik atas kebijaksanaan Tuan pun radu lamon perbaikan sai dilaksanako untuk bangsa sekam.

³Sunyinni udi sekam sambut selalu jama beterima kasih rik penghargaan sai selanggar-langgarni di dipa pun juga.

⁴Kidang in dang ngetokko lamon waktu Tuan, nyak ngilu hagani Tuan ngedengiko pengaduan sekam sai ringkas inji.

⁵Sekam ngehalu jelma inji pengacau sai bebahaya. Di dipa-dipa ia nimbulko keributan di hantara ulun-ulun Yahudi rik ia jadi jelma sai mimpin gerakan ulun-ulun Nazaret.

⁶Ia malah radu nyuba nyani najis di Lamban Ibadah, kidang sekam nangkok ia. [Sekam bemaksud ngadili menurut hukum agama sekam tenggalan.

⁷Kidang komandan Lisias ngerebut ia jak sekam,

⁸rik memerintahko in para pengaduni ngehadap Tuan.] Kik Tuan memeriksa jelma inji, Tuan tenggalan haga ngedengi jak ia kebenoran jak sunyinni sai sekam aduko inji tehadap ia.”

⁹Jelma-jelma Yahudi sai di dudi juga nutuk nuduh Paulus rik ngebenorko sunyinni sai diucakko ulih Tertulus.

¹⁰Raduni gubernur udi ngeni isyarat jama Paulus bahwa ia ngasi cawa. Maka Paulus cawa, “Nyak pandai Tuan radu jadi hakim negeri inji betahun-tahun sakani. Udi sebabni nyak ngerasa senang ngajuko pembelaanku inji di hadapan Tuan.

¹¹Tuan dapok nyelidiki tenggalan bahwa mak lebih jak rua belas rani sai radu nyak mik di Yerusalem untuk sembahyang.

¹²Rik mak pernah ulun-ulun Yahudi udi ngehalu nyak betangkar jama sai jelma pun atau ngumpulko jelma untuk nyani keributan baik di Lamban Ibadah ataupun lamban-lamban ibadah atau di dipa gaoh di delom kota.

¹³Tian pun mak dapok ngebuktiko tuduhan-tuduhan sai tian ajuko jama Tuan tehadap nyak.

¹⁴Sangun nyak harus ngakui jama Tuan bahwa nyak nyumbah Allah nenek muyang sekam menurut ajaran Isa sai tian anggap salah. Kidang nyak masih percaya, sunyinni sai tetulis di delom Buku Musa rik Buku Nabi-nabi.

¹⁵Gegoh injuk tian, nyak juga ngedok harapan jama Allah bahwa seluruh jelma haga hurik luot radu jak mati — jelma-jelma betik, maupun jelma-jelma jahat!

¹⁶Udi sebabni nyak selalu berusaha sebetik-betikni, in hati nuraniku mekecah tehadap Allah rik mekecah tehadap manusia.

¹⁷ Radu jak pira-pira tahun mak ngedok di Yerusalem, nyak muloh mik disan untuk ngusung bantuan duit untuk bangsaku rik untuk mempersembahko kurban jama Allah.

¹⁸Waktu nyak sedang ngelakuko ano, tian ngehalu nyak di Lamban Ibadah, radu jak nyak selesai upacara penyucian diri. Mak ngedok jelma lamon jejama nyak, rik mak ngedok juga keributan di dudi pada waktu seno.

¹⁹Angkah wat pira jelma Yahudi di dudi jak provinsi Asia. Tiando sai seharusni wat di dija untuk ngajuko pengaduan tian jama Tuan, kik tian wat sai hal pengaduan tehadap nyak.

²⁰Atau tagando ulun-ulun inji tenggalan ngemukako kejahatan api sai tian dapok jama nyak waktu nyak dihadapko jama Mahkamah Agama.

²¹ Tian ngehalu angkah kalimat sai sai inji gaoh sai kuucakko di hadapan tian, yakdo kalimat: Nyak diadili rani inji ulihni nyak percaya bahwa ulun-ulun mati haga dihurikko luot.”

²²Raduni Feliks sai radu pandai lamon tentang ajaran Isa, mengakheri sidang perkara udi. “Nyak haga memutusko perkara inji,” cawani, “kik komandan Lisias radu ratong.”

²³Raduni ia merintahko perwira sai betanggung jawab atas Paulus ano in tetap nahan Paulus, kidang jama ngeni cutik kebebasan jama ia rik ngirimko kantik-kantikni ngeniko jama ia api sai diperlukoni.

²⁴Pira-pira rani jak seno Feliks ratong, jama-jama inggomni gelarni Drusila; ia jelma Yahudi. Raduni Feliks ngayun ulun ngakuk Paulus, kak raduni ngedengiko Paulus cawa tentang percaya jama Isa Almasih.

²⁵Kidang waktu Paulus nerusko cawani tentang kejujuran rik nahan nafsu rik tentang hukuman waktu Rani Kiamat, Feliks jadi rabai raduni cawa, “Niku ngasi mik tano. Nyak haga ngurau niku lagi kik wat kesempatan.”

²⁶Sementara ano Feliks beharap in dapok duit jak Paulus. Ano sebabni ia risok ngayun ulun ngakuk Paulus untuk cawa jama ia.

²⁷Radu jak rua tahun, Perkius Festus ngegantiko Feliks sebagai gubernur. Rik mani Feliks haga ngakuk hati ulun-ulun Yahudi, ia naganko Paulus di delom bui.