Read Lampung Api KISAH RASUL-RASUL 3 Bible Online

KISAH RASUL-RASUL 3 - Lampung Api bible

KISAH RASUL-RASUL 3

¹Pada suatu rani Petrus rik Yohanes mik di Lamban Ibadah pukul telu dibi, yakdo pada waktu untuk bedua.

²Di dudi di rangok gerbang sai disebut “Rangok Helau”, wat sai jelma bakas sai lumpuh jak laher. Unggal rani jelma udi diusung mik disan untuk ngilu-ngilu jama jelma-jelma sai kuruk di Lamban Ibadah.

³Waktu ulun udi ngeliak Petrus rik Yohanes sedang kuruk mik Lamban Ibadah, ia ngilu tian ngeniko sai hal jama ia.

⁴Maka tian ngeliak ia, kak raduni Petrus cawa, “Liakdo sekam!”

⁵Raduni ulun udi merhatiko tian jama ngeharap haga mansa sai hal jak tian.

⁶Kidang Petrus cawa jama ia, “Nyak mak ngedok duit sama sekali. Kidang api sai wat jama nyak, udi haga kukeniko jama niku: Jama kuasa Isa Almasih jelma Nazaret udi, lapahdo!”

⁷Raduni Petrus nyating culuk kanan jelma lumpuh udi rik nulung ia minjak. Langsung cukut ulun udi rik mata cukutni jadi kuat.

⁸Raduni ia ngelumpat cecok, rik mulai lapah mik dija mik dudi. Kak raduni ia kuruk mik Lamban Ibadah jama-jama Petrus rik Yohanes, sambil lapah rik lumpat-lumpat rik memuji Allah.

⁹Sunyinni jelma ngeliak ia lapah rik memuji-muji Allah.

¹⁰Raduni tian sadar bahwa iado tukang ngilu-ngilu sai biasani mejong di “Rangok Helau” di Lamban Ibadah. Tian hiran nihan rik kagum ngeliak api sai tejadi jama ia.

¹¹Jelma udi terus gaoh nutuk Petrus rik Yohanes. Rik sewaktu tian telu sampai di serambi sai disebut “Serambi Salomo”, sunyinni ulun ratong bekerumun jama tian mani kagum.

¹²Waktu Petrus ngeliak ulun-ulun udi, ia cawa jama tian, “Hai ulun-ulun Israel, mengapi Puari-puari hiran jama hal sinji? Mengapi keti ngeliak terus jama sekam? Api keti kira jelma inji dapok lapah mani wat kuasa jama sekam atau mani sekam taat jama Allah?

¹³ Allah sai disumbah ulih Abraham, Ishak, Yakub, Allah nenek muyang ram, Allah udi radu ngemuliako Jelma Sai Ngebantu-Ni, yakdo Isa. Isa udido sai keti serahko jama pihak jelma sai bekuasa, rik keti lawan di hadap Pilatus, waktu Pilatus haga ngelepasko-Ni.

¹⁴ Ia suci rik mebetik, kidang keti nantang Ia rik ngedesak in Pilatus ngelepasko sai jelma sai ngebunuh untuk keti.

¹⁵Keti ngebunuh Ia, padahal justru Iado sumber hurik untuk sunyinni jelma. Rik Allah radu ngehurikko Ia luot jak kematian. Sekam radu nyaksiko tenggalan hal ano.

¹⁶Puari-puari radu ngeliak rik nyaksiko api sai tejadi jama jelma lumpuh sinji. Ia radu jadi kuat rik sihat muloh mani ia percaya jama Isa jama kuasa-Ni. Mani percaya jama Isa maka jelma sinji radu jadi sihat muloh di hadapan Puari-puari.

¹⁷Puari-puari! Tano nyak pandai bahwa api sai keti rik jelma-jelma sai mimpinmu lakuko tehadap Isa, ano keti lakuko mani keti mak pandai api sai sedang keti lakuko.

¹⁸Rik ulihni senodo tejadi muneh api sai radu dikeni pandai ulih Allah tumbai liwat seluruh nabi-nabi-Ni, bahwa Raja Penyelamat sai dijanjiko udi harus menderita.

¹⁹Ulih sebab ano Puari-puari, betubatdo jak dusa-dusamu rik mulohdo jama Allah, in Ia ngehapusko dusa-dusamu.

²⁰Tuhan haga ratong jama niku rik keti haga ngalami kesegaran rohani. Rik Tuhan haga ngayun Isa ratong jama niku, mani Ia radu ditantuko ulih Allah jadi Raja Penyelamat untuk niku.

²¹Ia musti tinggal di surga sampai Allah ngejadiko sunyinni ampai injuk sai dicawako ulih Allah liwat nabi-nabi-Ni pada zaman tumbai.

²² Musa pernah cawa, ‘Allah Tuhanmu haga ngutus jama niku sai nabi jak bangsamu tenggalan, injuk Ia ngutus nyak. Niku harus ngedengi sunyinni sai dicawako nabi udi jama niku.

²³ Jelma sai mak perhatiko api sai dicawako ulih nabi udi, ulun udi haga disingkerko jak umat Allah rik dibinasako.’

²⁴Nabi-nabi sai pernah nyampaiko kabar jak Allah, mulai jak Nabi Samuel rik nabi-nabi barehni sai ratong kak raduni, sunyinni ngabarko tentang zaman inji.

²⁵ Janji-janji jak Allah sai disampaiko ulih nabi-nabi yakdo untuk Puari-puari. Delom perjanjian sai Allah sani jama nenek muyangmu, Allah cawa jama Abraham injuk reji, ‘Jak keturunanmu Nyak haga ngeberkati sunyinni bangsa di bumi.’ Perjanjian ano yakdo untuk keti muneh.

²⁶Udi sebabni Allah milih Jelma Sai Ngebantu-Ni, raduni ngayun Ia ratong jama keti lebih mena, in Ia ngeberkati keti. Carani Ia ngeberkati yakdo nyani Puari-puari sunyinni betubat jak cara hurikmu sai jahat.”