Read Lampung Api ROMA 1 Bible Online

ROMA 1 - Lampung Api bible

ROMA 1

¹Puari-puari sunyinni di Roma sai dikasihi Allah rik sai radu diurau ulih-Ni Allah untuk jadi umat-Ni. Allah radu milih rik ngangkat nyak khusus untuk ngabarko Kabar Betik jak Allah.

²Kabar Betik udi radu dijanjiko ulih-Ni Allah jak zaman tumbai liwat nabi-nabi-Ni rik radu tetulis delom Alkitab.

³Kabar Betik udi mengenai Anak-Ni Allah, Tuhan ram Isa Almasih. Secara manusia, Ia keturunan Daud,

⁴kidang secara ilahi ternyata Ia Anak Allah. Ano tebukti jama kuasa sai luar biasa liwat kebangkitan-Ni jak kematian.

⁵Liwat Ia juga Allah ngeniko jama nyak karunia jadi rasul, in nyak — untuk ngehormati Almasih — ngebimbing ulun-ulun jak sunyin bangsa in percaya rik taat.

⁶Sai dimaksudko jama sunyin bangsa yakdo keti juga sai wat di Roma; keti pun radu diurau untuk jadi umat-Ni Isa Almasih.

⁷Udi sebabni nyak nulis jama niku. Semoga Allah Bapa neram rik Tuhan Isa Almasih ngeni berkat rik sejahtera jama niku.

⁸Mula-mula liwat Isa Almasih, nyak beterima kasih jama Allah mani Puari-puari sunyinni; mani seluruh dunia radu ngedengi bahwa keti percaya nihan jama Almasih.

⁹Nyak selalu ngingok keti kik nyak bedua. Allah saksini bahwa api sai kuucakko udi benor. Iado Allah sai kulayani sepenuh hati jama ngabarko Kabar Betik tentang Anak-Ni.

¹⁰Nyak ngilu nihan jama Allah, semoga Ia haga ngizinko nyak tano napol keti.

¹¹Mani nyak mirak nihan betungga jama keti in nyak dapok ngebagi jama niku karunia jak Ruh-Ni Allah untuk nguatko keti.

¹²Maksudku yakdo mani ram jama-jama radu percaya jama Isa Almasih, maka ram dapok saling menguatko.

¹³ Puari-puari! Nyak mirak in keti pandai bahwa radu lamon nihan nyak bemaksud nyilau niku kidang selalu wat gaoh halanganni. Nyak mirak in di hantaramu pun guaiku wat hasilni injuk guaiku sai radu behasil di hantara ulun-ulun sai lain Yahudi di rang-rang sai bareh.

¹⁴Mani nyak ngedok kewajiban tehadap sunyin bangsa: sai radu beradab rik sai biadab, sai besekula maupun sai makkung besekula.

¹⁵Renodo sebabni nyak mirak nihan ngabarko Kabar Betik ano jama keti sai tinggal di Roma juga.

¹⁶ Nyak percaya nihan jama Kabar Betik ano, mani kabar ano iado kekuatan-Ni Allah untuk nyelamatko sunyinni jelma sai percaya; mula-mula ulun Yahudi, rik bangsa bareh juga.

¹⁷ Mani Kabar Betik udi Allah nunjukko injuk repa carani hubungan manusia jama Allah jadi betik luot; carani yakdo jama percaya jama Allah, jak mula-mula sampai akher. Udi gegoh injuk sai tetulis delom Alkitab, “Ulun sai percaya jama Allah sehingga hubunganni jama Allah jadi betik luot, ulun udi haga hurik!”

¹⁸Jak surga Allah nunjukko butong-Ni tehadap sunyinni dusa rik kejahatan manusia, mani kejahatan ngehalangi manusia untuk kenal jama ajaran sai benor tentang Allah.

¹⁹Api sai dapok dikeni pandai manusia tentang Allah radu jelas di delom hati nurani manusia, mani Allah tenggalan radu nyatako ano jama manusia.

²⁰Radu jak Allah nyiptako dunia, sifat-sifat-Ni Allah sai mak keliakan, yakdo keadaan-Ni sebagai Allah rik kuasa-Ni sai abadi radu dapok dipahami ulih manusia liwat sunyin sai radu diciptako. Jadi manusia sama sekali mak ngedok alasan untuk ngebenorko diri.

²¹ Manusia kenal jama Allah, kidang manusia mak ngehormati Ia sebagai Allah rik mak juga beterima kasih jama Ia. Sebalikni manusia mikerko sai bareh-bareh; hati tian radu jadi kelam.

²²Tian ngerasa dirini bijaksana, padahal tian bugu.

²³ Lain Allah sai abadi sai tian sumbah, melainko patung-patung sai nyerupai makhluk sai dapok mati; yakdo manusia, burung, binatang sai cukut epak, rik binatang sai melata.

²⁴Ulihni seno Allah naganko tian dikuasai ulih mirakni hati tian untuk bebuat sai bejat, sehingga tian ngelakuko hal-hal sai kamak tehadap diri tenggalan.

²⁵Allah sai benor, tian ganti jama sai hal sai palsu. Lain Jelma Sai Nyipta melainko sai diciptako anodo justru sai disumbah rik dilayani ulih tian. Padahal sai nyiptako anodo sai seharusni dipuji selama-lamani! Amin.

²⁶Mani manusia bebuat sai injuk reno, maka Allah naganko tian nuruti nafsu tian sai hina. Bebai-bebai tian mak lagi tetarik jama bakas-bakas injuk sai biasani jama manusia, melainko tetarik jama peperda bebai.

²⁷Bakas pun injuk reno juga; tian mak lagi secara wajar mengadako hubungan jama bebai, melainko nafsu tehadap peperda bakas. Bakas ngelakuko perbuatan sai nyani liam tehadap peperda bakas, sehingga tian nerima balosan sai setimpal jama guai tian sai jahat udi.

²⁸Ulih sebabni manusia mak ngerasa perlu kenal jama Allah, maka Allah naganko pikeran tian jadi cadang, sehingga tian ngelakuko hal-hal sai tian mak ngasi lakuko.

²⁹Hati tian latap jama sunyin sai jahat, sai mak benor; latap jama keserakahan, kebusukan, rik perasaan sesera; latap jama kemirakan untuk ngebunuh, betinju, nipu rik ngedendam. Tian gering ngicikko ulun bareh,

³⁰gering ngeburak-burakko gelar ulun bareh; tian mepungah rik kurang ajar, sai nyuoh jama Allah rik gering bebuhung. Tian pandai nyepok cara-cara ampai untuk ngelakuko kejahatan. Tian ngelawan ulun tuha;

³¹tian mak haga ngerti ulun bareh; tian mak setia rik mak beperikemanusiaan.

³²Tian pandai, bahwa nurut hukum Allah, jelma sai ngelakuko sunyinni ano patut dihukum mati. Walaupun injuk reno tian ngelakuko juga hal-hal udi; rik malah nyetujui juga ulun bareh ngelakukoni.