Read Lampung Api ROMA 10 Bible Online

ROMA 10 - Lampung Api bible

ROMA 10

¹Puari-puari! Nyak tiram nihan in bangsaku diselamatko. Rik nyak temon-temon bedua jama Allah untuk tian.

²Nyak bani ngucakko bahwa tian besemangat nihan ngabdi jama Allah. Kidang semangat tian ano mak bedasarko pengetahuan sai jak Allah.

³Tian mak pandai carani Allah nyani hubungan manusia jama Ia jadi betik luot. Rik mani tian haga nutuk cara tian tenggalan, maka tian mak tunduk jama cara sai ditunjuk Allah.

⁴Hukum agama radu dipenuhi ulih Almasih. Jadi unggal jelma sai percaya jama Almasih, hubunganni jama Allah jadi betik luot.

⁵ Musa nulis bahwa jelma sai muloh mebetik jama Allah bedasarko hukum agama, ulun udi haga hurik mani taat jama hukum agama udi.

⁶ Kidang tentang cara ulun muloh mebetik jama Allah bedasarko percaya jama Allah, Alkitab ngucakko injuk reji, “Dangdo niku cawa di delom hatimu, ‘Sapa sai haga cakak mik surga?’ (retini ngusung Almasih regah),

⁷atau, ‘Sapa sai haga regah mik dunia ulun mati?’ (retini ngiwakko Almasih cakak jak kematian).”

⁸Maksudni iado injuk reji, “Kabar jak Allah udi redik nihan jama niku; delom bangukmu rik delom hatimu.” Udido kabar sai sekam siarko; kabar bahwa jelma harus percaya.

⁹Mani kik Puari ngaku jama bangukmu bahwa “Isa ano Tuhan”, rik Puari percaya delom hatimu bahwa Allah radu ngehurikko Isa jak kematian, maka Puari haga selamat.

¹⁰Mani jama hatini jelma percaya, sehingga Allah nerima ia sebagai jelma sai muloh mebetik jama Allah. Rik jama bangukni jelma ngaku, sehingga ia diselamatko.

¹¹ Di delom Alkitab tetulis, “Ulun sai percaya mak haga dikecewako.”

¹²Udi belaku tehadap sunyin jelma, mani mak ngedok bidani hantara jelma Yahudi jama jelma-jelma bangsa bareh. Allah sai sai udi iado Tuhan untuk sunyin jelma. Ia ngeniko berkat sai belimpah-limpah jama sunyin jelma sai ngilu tulung jama Ia.

¹³ Delom Alkitab tetulis, “Sunyin jelma sai beseru jama Tuhan, haga selamat.”

¹⁴Kidang injuk repa jelma dapok beseru jama Tuhan kik tian makkung percaya? Rik injuk repa tian dapok percaya jama Tuhan kik tian makkung ngedengi tentang Ia? Rik injuk repa tian dapok ngedengi tentang Tuhan, kik mak ngedok sai ngabarko?

¹⁵ Rik injuk repa ulun dapok ngusung kabar udi kik tian mak diutus? Di delom Alkitab tetulis injuk reji, “Hara betikni ratongni jelma-jelma sai ngusung Kabar Betik jak Allah!”

¹⁶ Kidang mak sunyin jelma nerima Kabar Betik ano. Mani Yesaya cawa, “Tuhan, sapa sai percaya jama kabar sekam?”

¹⁷Udi sebabni jelma-jelma jadi percaya mani tian ngedengi kabar, rik kabar didengi mani wat jelma sai ngabarko tentang Almasih.

¹⁸ Kidang nyak betanya: Api sangun tian makkung ngedengi kabar udi? Pasti radu! Mani delom Alkitab tetulis injuk reji, “Suara tian radu bekumandang di seluruh dunia, cawa-cawa tian radu sampai ke uncuk bumi.”

¹⁹ Nyak betanya luot: Api bangsa Israel makkung pandai? Tagando pertanyaan ano mula-mula dijawab ulihni Musa. Musa cawa, “Injuk rejido cawa-Ni Allah, ‘Nyak haga nyani niku sesera tehadap suatu bangsa sai lain umat rik Nyak haga nyani niku butong tehadap suatu bangsa sai bugu.’ ”

²⁰ Yesaya lebih bani lagi. Ia cawa, “Injuk reji cawa-Ni Allah, ‘Jelma-jelma sai mak nyepok Nyak, radu nungga Nyak; rik Nyak ngeliakko diri-Ku jama tian sai mak nanyako tentang Nyak.’ ”

²¹ Kidang mengenai bangsa Israel Yesaya cawa, “Injuk reji cawa-Ni Allah, ‘Sepanjang rani Nyak ngulorko culuk-Ku jama suatu bangsa sai keras ulu rik mak taat.’ ”