Read Lampung Api ROMA 12 Bible Online

ROMA 12 - Lampung Api bible

ROMA 12

¹Puari-puari! Allah betik nihan jama ram. Udi sebabni nyak ngilu nihan in keti mempersembahko dirimu sebagai suatu kurban hurik sai khusus untuk Allah rik sai nyenangko hati-Ni. Ibadahmu jama Allah seharusni injuk reno.

²Dang nutuk atoran-atoran dunia inji. Tagando Allah nyani pribadimu jadi ampai, in keti berubah. Jama injuk reno keti sanggup ngemandai kehaga-Ni Allah — yakdo api sai betik rik sai nyenangko hati-Ni rik sai sempurna.

³Allah radu ngeni anugerah jama nyak. Udi sebabni nyak ngeni petuah Puari-puari sunyinni: Dang ngerasa diri lebih langgar jak sai sebenorni. Hagani keti nilai keadaan dirimu jama rendah hati; masing-masing menilai dirini nutuk kemampuan sai dikeniko Allah jama ia mani ia percaya jama Isa.

⁴ Badan ram ngedok lamon anggota. Unggal anggota wat tugasni tenggalan-tenggalan.

⁵Injuk reno juga jama ram. Meskipun ram sunyinni lamon, kidang ram merupako sai badan mani besatu jama Almasih. Rik ram masing-masing behubungan sai jama sai lain sebagai anggota-anggota jak sai badan.

⁶ Ram masing-masing ngedok karunia-karunia pelayanan sai bebida. Karunia-karunia udi dikeniko ulih-Ni Allah jama ram nutuk rahmat-Ni. Ulihni seno ram harus makai karunia-karunia ano. Jelma sai ngedok karunia untuk ngabarko kabar jak Allah, harus ngabarko kabar jak Allah udi nutuk kemampuan sai wat jama ia.

⁷Jelma sai ngedok karunia untuk nulung ulun bareh, harus temon-temon nulung ulun bareh. Jelma sai ngedok karunia untuk ngajar, harus temon-temon ngajar.

⁸Jelma sai ngedok karunia untuk ngeni semangat jama ulun bareh, harus temon-temon ngeni semangat jama ulun bareh. Jelma sai ngedok karunia untuk ngeni jama ulun bareh api sai dimilikini, harus ngelakuko ano jama murah hati secara wajar. Jelma sai ngedok karunia untuk mimpin, harus temon-temon mimpin. Jelma sai ngedok karunia untuk nunjukko rasa kesian jama ulun bareh, harus ngelakuko jama senang hati.

⁹Kasihido jama ikhlas. Nyuohko sai jahat, rik catingdo jama api sai betik.

¹⁰Hagani Puari-puari saling mesra mengasihi peperda keti injuk ulun-ulun sai muari delom sai keluarga, rik hagani keti saling ngehena ngeni hormat.

¹¹Beguaido rajin. Dang malas. Beguaido untuk Tuhan jama semangat jak Ruh-Ni Allah.

¹²Hagani Puari beharap gembira jama Tuhan, sabardo di delom kesusahan, rik tekundo bedua.

¹³Tulungdo ngecukupi kebutuhan ulun-ulun Kristen bareh rik sambutdo Puari-puari seiman sai mak Puari kenal, jama senang hati di delom lambanmu.

¹⁴ Kiludo jama Allah in Ia ngeberkati ulun-ulun sai kejam tehadapmu. Ya, ngilu Allah ngeberkati tian, dang mengutuk.

¹⁵Nutukdo begembira jama ulun-ulun sai begembira, rik miwangdo jama tian sai miwang.

¹⁶ Hurikdo rukun peperda. Dang besikap tinggi hati, kidang sesuaiko dirimu jama ulun sai rendah kedudukanni. Dang nganggap diri lebih pandai jak sai sebenorni.

¹⁷Kik ulun ngelakuko sai jahat jama niku, dang ngebalosni jama kejahatan. Sanido api sai dianggap betik ulih sunyin jelma.

¹⁸Jak pihakmu, berusahado sedapok mungkin untuk hurik damai jama sunyinni jelma.

¹⁹ Puari-puariku! Dang sekali-kali ngebalos dendam, tagando Allah sai ngehukum. Mani di delom Alkitab tetulis, “Nyakdo sai ngebalos. Nyak sai haga ngehukumni, ani Tuhan.”

²⁰ Sebalikni, kik musuhmu mebetoh, kenido ia mengan; rik kik ia mahu, kenido ia nginum. Mani jama bebuat injuk reno, Puari haga nyani ia meliom.

²¹Dang naganko dirimu dikalahko ulih sai jahat, kidang hagani Puari ngalahko kejahatan jama kebetikan.