Read Lampung Api ROMA 14 Bible Online

ROMA 14 - Lampung Api bible

ROMA 14

¹ Jelma sai mak yakin jama api sai dipercayaini harus diterima jama betik di hantara Puari-puari. Dang betangkar jama ia mengenai pendirian-pendirianni.

²Wat jelma sai bependirian bahwa ia ngasi nganik api gaoh. Kidang wat jelma bareh sai lemoh keyakinanni; ia ngerasa bahwa ia angkah ngasi nganik sayur-sayuran gaoh.

³Jelma sai nganik api gaoh dangdo nganggap rendah ulun sai nganik angkah kanikan sai tantu gaoh; rik jelma sai nganik angkah kanikan sai tantu gaoh, dang muneh nyalahko ulun sai nganik sunyinni, mani Allah radu nerima ia.

⁴Sapa Puari sehingga Puari haga ngadili jelma sai ngebantu ulun bareh? Induh jelma sai ngebantu udi tumbak atau minjak, udi iado urusan tuanni. Rik sangun jelma sai ngebantu udi haga berdiri tegak, mani Tuhan sanggup nyanini berdiri tegak.

⁵Wat jelma sai ngerasa suatu rani sai tantu lebih penting jak rani-rani sai bareh, sedangko ulun bareh muneh nganggap bahwa rani-rani udi gegoh gaoh. Tagando masing-masing jelma nantuko pendirianni tenggalan.

⁶Jelma sai mementingko rani-rani sai tantu, jelma udi bebuat injuk reno untuk ngehormati Tuhan. Jelma sai nganik sunyinni, bebuat injuk reno untuk ngehormati Tuhan, mani ia besyukor jama Allah atas kanikan udi. Injuk reno juga jama jelma sai nganik angkah kanikan sai tantu gaoh; ulun udi juga ngehormati Tuhan rik besyukor jama Allah.

⁷Mak sai jelma pun jak ram sai hurik untuk diri tenggalan; rik mak sai jelma pun jak ram sai mati untuk dirini tenggalan.

⁸Kik ram hurik, ram hurik untuk Tuhan. Rik kik ram mati, ram pun mati untuk Tuhan. Jadi hurik atau mati, ram iado kedau-Ni Tuhan.

⁹Almasih radu mati rik hurik luot. Udi sebabni Ia jadi Tuhan untuk jelma-jelma sai hurik rik juga untuk jelma-jelma sai radu mati.

¹⁰ Jadi Puari-puari! Untuk api nyalahko puarimu sai seiman? Rik untuk api Puari nganggap ia rendah? Ram sunyinni haga ngehadap Allah untuk diadili.

¹¹ Di delom Alkitab tetulis, “Setemonni,” ani Tuhan, “unggal jelma haga nyumbah sujud di hadap-Ku; rik unggal jelma haga ngaku bahwa Nyakdo Allah.”

¹²Jadi ram masing-masing harus mempertanggungjawabko sunyin perbuatan ram jama Allah.

¹³Ulihni seno dangdo ram saling menyalahko. Sebalikni berusahado in keti mak bebuat sai pun sai nyebabko sai puari seiman teguda rik bedusa.

¹⁴Mani nyak besatu jama Tuhan Isa, maka nyak percaya nihan bahwa mawat sai pun sai pada dasarni najis; kidang hal udi najis bagi sai jelma, kik ulun udi nganggapni najis.

¹⁵Kidang kik jama api sai Puari kanik, sai puari seiman disakikko hatini, maka Puari mak lagi betindak bedasarko kasih. Kik Almasih radu mati untuk sai jelma, dangdo naganko ulun udi dicadangko ulih api sai Puari kanik.

¹⁶Udi sebabni dang naganko api sai betik bagi keti, dianggap mak betik bagi ulun bareh.

¹⁷Mani kik Allah memerintah hurik sai jelma, api sai ia ngasi nganik atau nginum, mak lagi penting. Sai penting iado bahwa jelma udi nutuk kehaga-Ni Allah, mengalami ketenangan hati rik nerima sukacita sai dikeniko ulih Ruh-Ni Allah.

¹⁸Jelma sai ngelayani Almasih secara injuk reno, jelma udi nyenangko hati-Ni Allah, rik dihargai ulih ulun-ulun bareh.

¹⁹Ulihni seno tujuan ram harus selalu untuk hal-hal sai nyiptako kerukunan rik saling ngebangun.

²⁰Dangdo mani soal kanikan, Puari nyadangko api sai radu diguaiko ulih-Ni Allah. Sunyin kanikan sangun halal untuk dikanik; kidang kik api sai Puari kanik nyebabko ulun bareh bedusa, maka Puari besalah.

²¹Lebih betik mak ikin nganik daging atau nginum anggor atau ngelakuko api gaoh kik hal udi nyebabko sai jelma puari seiman jadi dusa.

²²Tagando api sai Puari percaya udi, Puari lakuko di hadap-Ni Allah gaoh untuk Puari tenggalan. Jelma sai mak ngedok alasan untuk ngerasa besalah atas api sai dianggap benor, ulun udi bahagia.

²³Kidang ulun sai ngerasa ragu-ragu untuk nganik sai hal, kak raduni dikanikni juga kanikan udi, jelma udi disalahko ulih-Ni Allah; mani ulun udi mak betindak nutuk keyakinanni tentang api sai benor rik api sai salah. Rik api gaoh sai dilakuko tanpa keyakinan iado dusa.