Read Lampung Api ROMA 2 Bible Online

ROMA 2 - Lampung Api bible

ROMA 2

¹ Ulihni seno, Puari-puari, sapa Puari sehingga Puari haga nyalahko ulun bareh? Puari mak ngedok api-api untuk ngebela diri! Mani kik Puari nyalahko ulun bareh, padahal Puari tenggalan ngelakuko perbuatan sai gegoh injuk tian, maka Puari ngejatuhko hukuman atas diri tenggalan juga.

²Ram pandai bahwa kik Allah ngejatuhko hukuman mik atas jelma-jelma sai ngelakuko perbuatan-perbuatan sai injuk udi, keputusan-Ni Allah udi benor.

³Kidang keti, Puari-puari, ngelakuko tenggalan juga hal-hal sai keti tuduhko jama ulun-ulun bareh! Rik keti piker keti dapok lepas jak hukuman-Ni Allah?

⁴Atau keti pandang enteng kemurahan-Ni Allah rik kelapangan hati rik kesabaran-Ni sai reno balak! Pasti keti pandai bahwa Allah nunjukko kebetikan hati-Ni mani Ia haga in keti betubat jak dusa-dusamu.

⁵Kidang keti keras ulu rik mak haga berubah. Ulihni seno keti tenggalando sai nyani hukumanmu jadi betambah biak waktu Rani Kiamat, kapan Allah nyatako butong-Ni rik ngejatuhko hukuman sai adil.

⁶ Mani Allah haga ngebalos unggal jelma setimpal jama perbuatanni.

⁷Allah ngeniko hurik sejati rik kekal jama tian sai tekun bebuat baik untuk ngedapokko sai mulia, sai tehormat, rik sai abadi.

⁸Kidang ulun-ulun sai mentingko diri tenggalan rik mak haga taat jama Allah, melainko nutuk sai jahat, ulun-ulun udi dibutong ulih-Ni Allah.

⁹Unggal jelma sai gering ulih ngelakuko sai jahat haga sengsara rik menderita; mula-mula ulun Yahudi, rik juga bangsa-bangsa bareh.

¹⁰Kidang sunyin jelma sai gering ngelakuko sai betik haga dikeni kemuliaan rik kehormatan rik kesejahteraan ulih-Ni Allah; mula-mula jama ulun Yahudi, reno muneh jama ulun-ulun bangsa bareh.

¹¹ Mani Allah memperlakuko sunyinni jelma gegoh.

¹²Jelma-jelma bangsa bareh bedusa tanpa pandai hukum agama Yahudi. Jadi tian dihukum di luah hukum udi. Kidang ulun-ulun Yahudi bedusa radu jak pandai hukum udi; ulihni seno tian haga dituntut juga bedasarko hukum udi.

¹³Mani jelma mebetik luot jama Allah, lain mani ulun udi radu pandai hukum agama Yahudi, melainko mani ia ngelakuko api sai tecantum delom hukum udi.

¹⁴Jelma-jelma bangsa bareh mak ngenal hukum agama Yahudi. Kidang kik tian atas kehaga tenggalan ngelakuko api sai diperintahko ulih hukum udi, hati tian tenggalando sai jadi hukum untuk tian, meskipun tian mak ngenal hukum agama Yahudi.

¹⁵Kelakuan tian nunjukko bahwa api sai diperintahko ulih hukum udi tetulis di hati tian. Hati nurani tian pun ngebuktiko hal ano, mani tian tenggalan wat waktuni disalahko rik wat waktuni dibenorko ulih pikeran tian.

¹⁶Injuk renodo sai haga tejadi kanah di rani sai radu ditantuko udi. Pada rani ano — nutuk Kabar Betik sai kukabarko — Allah liwat Isa Almasih, haga ngehakimi sunyin rahasia hati rik pikeran sunyin jelma.

¹⁷Kidang tano injuk repa jama Puari-puari tenggalan? Puari ngaku diri ulun Yahudi. Puari begantung jama hukum agama Yahudi rik Puari bangga atas hubungan Puari jama Allah.

¹⁸Puari mansa petunjuk-petunjuk jak hukum udi, sehingga Puari pandai kehaga-Ni Allah rik pandai nantuko dipa sai betik.

¹⁹Puari yakin bahwa Puari iado jelma sai mimpin jelma buta rik terang bagi tian sai wat di delom kekelaman;

²⁰Puari ngajar ulun-ulun sai berakhlak rendah, rik ngajar jelma-jelma sai bugu. Puari yakin bahwa di delom hukum agama Yahudi, Puari ngedok sunyin pengetahuan rik ajaran sai benor.

²¹Puari ngajar ulun bareh; nah, mengapi Puari mak ngajar diri tenggalan? Puari ngajar ulun in dang maling, padahal Puari tenggalan maling!

²²Puari ngajar ulun in dang bezinah, padahal Puari tenggalan bezinah! Puari nyuoh jama berhala, padahal Puari tenggalan ngakuk barang-barang jak lamban-lamban berhala.

²³Puari ngebangga-banggako bahwa Puari ngedok hukumni Musa, padahal Puari ngehina Allah jama mak nutuk hukum-Ni.

²⁴ Di delom Alkitab tetulis injuk reji, “Mani niku, ulun-ulun Yahudi, maka gelar-Ni Allah dicemarko di hantara bangsa-bangsa bareh.”

²⁵Kik Puari taat jama hukum agama Yahudi, maka sunat Puari wat gunani juga. Kidang kik Puari mak bisa mematuhi hal-hal sai diperintahko delom hukum udi, maka sunat Puari mak belaku sama sekali.

²⁶Kik sai jelma lain Yahudi sai mak disunat, nutuk hukum agama Yahudi, bukankah Allah nganggapni sebagai ulun sai radu disunat?

²⁷Rik jelma-jelma sai mak disunat ano haga nyalahko Puari jelma Yahudi, mani Puari ngedok hukum agama Yahudi rik Puari disunat, kidang Puari ngelanggar hukum udi. Tian mak disunat, kidang justru tiando sai mentaati hukum agama Yahudi.

²⁸Mani jelma Yahudi sai sejati lain hak jelma sai angkah gelarni gaoh jelma Yahudi; rik jelma sai temon-temon disunat lain hak jelma sai disunat secara laher gaoh.

²⁹ Sebalikni, sai jelma Yahudi sai sejati yakdo jelma sai hatini bejiwa Yahudi; rik sunat sai sejati yakdo sunat di hati sai diguaiko ulih Ruh-Ni Allah, lain sai dicatat di delom buku. Jelma injuk reno udi nerima pujian jak Allah, lain jak manusia.