Read Lampung Api ROMA 3 Bible Online

ROMA 3 - Lampung Api bible

ROMA 3

¹Kik injuk reno, api untungni jadi jelma Yahudi? Rik api faedahni nutuk atoran sunat?

²Tantu gaoh lamon faedahni! Mula-mula, mani untuk ulun Yahudido Allah mempercayako cawa-cawa-Ni Allah.

³Kidang injuk repa kik sebagian ulun Yahudi mak setia? Api mani seno Allah jadi mak setia.

⁴ Tantu mawat! Mani jelasdo Allah selalu benor, walaupun unggal jelma bebuhung. Delom Alkitab tetulis, “Hagani niku tebukti benor delom api sai niku ucakko, rik niku menang pada waktu niku dihakimi.”

⁵Kidang kik keadilan-Ni Allah jadi semakin nyata, ulihni mani ram bebuat sai mak benor, api sai haga ram ucakko? Bahwa Allah mak adil kik Ia ngehukum ram? (Sangun pertanyaan inji wajar secara manusia.)

⁶Sekali-kali mawat! Mani kik Allah mak adil, injuk repa Ia dapok ngehakimi dunia inji?

⁷Kidang kik ulihni perbuatan sai mak benor, api sai benor tentang Allah semakin menonjol sehingga Ia dipuji, mengapi ulun sai ngelakuko sai jahat udi masih disalahko sebagai ulun bedusa?

⁸Rik mengapi ram mak ngasi ngucakko, “Baikdo ram ngelakuko sai jahat in timbul kebetikan?” Sangun wat jelma-jelma sai ngehina nyak, ngucakko bahwa nyak radu cawa injuk reno. Ulun-ulun injuk reno ano sewajarni dihukum ulih-Ni Allah.

⁹Nah, api kedudukan ram sebagai ulun Yahudi lebih baik jak kedudukan bangsa bareh? Sekali-kali mawat! Radu nyak kemukako bahwa baik ulun Yahudi maupun ulun bareh, sunyinni bangsa radu dikuasai dusa.

¹⁰ Injuk sai tetulis di delom Alkitab, “Mak sai jelma pun sai benor,

¹¹mak sai jelma pun sai ngerti rik mak sai jelma pun sai nyumbah Allah.

¹²Sunyinni jelma radu ngejaohko diri jak Allah; sunyinni radu sesek. Mak sai jelma pun bebuat sai benor; sai jelma pun mawat!

¹³ Lungkung tian injuk kuboran sai kebukak. Tipu daya ngaler jak ema tian, rik beber tian nyemborko fitnah injuk bisa ulai.

¹⁴ Banguk tian latap jama kutuk rik kecaman.

¹⁵ Jimpang tian geluk kik haga nyiksa rik ngebunuh jelma.

¹⁶Kehancoran rik kesusahan ditabor tian di dipa-dipa.

¹⁷Tian buta tehadap jalan kesejahteraan,

¹⁸ rik mak ngehormati Allah.”

¹⁹Tano ram pandai bahwa sunyin sai tetulis delom hukum agama Yahudi, yakdo untuk jelma-jelma sai wat di debah pemerintahan hukum udi. Jama injuk reno mak sai jelma pun dapok ngeniko alasan api-api lagi rik seluruh dunia dapok dituntut ulih-Ni Allah.

²⁰ Mani mak sai jelma pun dimungkinko muloh mebetik jama Allah, ulihni jelma udi ngelakuko hal-hal sai wat delom hukum agama. Sebalikni hukum udi angkah nunjukko jama manusia bahwa manusia bedusa.

²¹Kidang tano Allah radu nunjukko jalan injuk repa manusia muloh mebetik jama Ia; rik carani udi mak ngedok hubunganni jama hukum agama Yahudi. Buku-bukuni Musa rik buku-buku nabi-nabi justru nyatako hal udi,

²² bahwa Allah memungkinko manusia muloh mebetik jama Ia, angkah kik manusia percaya jama Isa Almasih. Allah bebuat inji untuk sunyin jelma sai percaya jama Almasih; mani mak ngedok perbidaanni.

²³Sunyinni jelma radu bedusa rik jaoh jak Allah sai haga nyelamatko tian.

²⁴Angkah ulihni rahmat-Ni Allah gaoh sai dikeniko cuma-cuma; hubungan manusia jama Allah jadi betik luot; carani iado: manusia dibebasko ulih-Ni Isa Almasih.

²⁵Allah ngurbanko Isa Almasih in jama kematian-Ni ano manusia dinyatako bebas jak kesalahan kik tian percaya jama Ia. Allah bebuat injuk reno untuk nunjukko keadilan-Ni. Mani pada waktu sai tumbai Allah radu belaku sabar tehadap dusa-dusa manusia, sehingga Ia mak ngehukum tian.

²⁶Kidang tano Ia betindak tehadap dusa untuk ngebuktiko keadilan-Ni. Jama cara ano Ia nunjukko bahwa diri-Ni benor; rik unggal jelma sai percaya jama Isa, dinyatako-Ni sebagai ulun sai radu muloh mebetik luot jama Allah.

²⁷Ulihni seno mak ngedok lagi alasan bagi ram untuk ngerasa bangga. Mengapi injuk reno? Api ulihni ram ngelakuko sai tecantum delom hukum agama Yahudi? Lain. Kidang mani ram percaya.

²⁸Mani kesimpulanni injuk reji: Jelma dinyatako muloh mebetik luot jama Allah, lain ulihni ia ngelakuko api sai tecantum delom hukum agama Yahudi, melainko mani ia percaya jama Isa Almasih.

²⁹Atau Allah udi Allah ulun Yahudi gaoh? Bukankah Ia Allah bangsa bareh juga? Ya, sangun Ia Allah bangsa bareh juga!

³⁰ Mani Allah angkah sai. Iado sai memungkinko jelma-jelma Yahudi muloh mebetik luot jama Allah mani tian percaya. Rik Iado juga sai memungkinko jelma-jelma bangsa bareh muloh mebetik luot jama Allah; udi juga mani tian percaya.

³¹Api inji retini bahwa mani ram percaya jama Almasih, ram ngetokko hukum agama Yahudi? Sama sekali mawat! Malah justru jama kepercayaan ram ano, ram ngehargai hukum ano.