Read Lampung Api ROMA 6 Bible Online

ROMA 6 - Lampung Api bible

ROMA 6

¹Kik injuk reno, api sai dapok ram ucakko? Haga kedo ram terus gaoh bebuat dusa in Allah semakin ngasihi ram?

²Tantu mawat! Dusa mak lagi bekuasa atas ram, jadi, dipa dapok ram terus-menerus hurik bebuat dusa?

³Pandai mak Puari-puari bahwa pada waktu ram dibaptis, ram dipersatuko jama Isa Almasih? Inji retini ram dipersatuko jama kematian-Ni.

⁴ Jama baptisan ano, ram dikubor jama Almasih rik nutuk mati jejama Ia, in injuk repa Almasih dihurikko jak kematian ulih kuasa Bapa sai mulia, injuk reno pun ram dapok ngejalani hurik sai ampai.

⁵Kik ram radu jadi sai jama Almasih mani ram nutuk mati jejama Ia, ram haga jadi sai jama Ia juga mani ram nutuk dihurikko luot injuk Ia.

⁶Ram pandai bahwa tabiat ram sai saka sebagai manusia radu dimatiko jejama jama Almasih di kayu salib in kuasa tabiat ram sai bedusa ano dihancorko; jama injuk reno ram mak lagi dikuasai ulih dusa.

⁷Mani kik sai jelma mati, jelma udi dibebasko jak kuasa dusa.

⁸Kik ram radu mati jejama Almasih, ram percaya bahwa ram pun haga hurik jejama jama Ia.

⁹Mani ram pandai bahwa Almasih radu dihurikko jak kematian rik Ia mak haga mati lagi; kematian radu mak lagi bekuasa atas diri-Ni.

¹⁰Kematian sai dialami Almasih iado kematian tehadap dusa. Udi tejadi sekali gaoh untuk selama-lamani. Rik hurik sai Ia jalani tano inji iado hurik untuk Allah.

¹¹Keti harus juga nganggap dirimu mati tehadap dusa, kidang hurik delom hubungan sai erat jama Allah liwat Isa Almasih.

¹²Dang lagi naganko dusa nguasai hurikmu sai fana in Puari dang nutuk kehagani sai jahat.

¹³Dangdo juga Puari nyerahko anggota badanmu jama kuasa dusa untuk digunako bagi maksud-maksud sai jahat. Kidang serahkodo dirimu jama Allah sebagai jelma sai radu dialihko jak kematian mik jama hurik. Serahkodo dirimu sunyinni jama Allah in dipakai untuk ngelakuko kehaga-Ni Allah.

¹⁴Dusa mak ngasi nguasai keti, mani keti mak lagi hurik di debah hukum agama Yahudi kidang di debah rahmat-Ni Allah.

¹⁵Tano, api kesimpulanni? Ngasi mak ram bedusa, mani ram mak lagi di debah kekuasaan hukum agama Yahudi, melainko di debah kekuasaan rahmat-Ni Allah? Sekali-kali mawat!

¹⁶Pandai mak keti bahwa kik keti nyerahko diri jama sai jelma untuk ngelakuko kehagani maka keti iado jelma sai ngebantu jelma sai keti taati ano — induh jelma sai ngebantu sai patuh dusa sai ngusung keti jama kematian, atau jelma sai ngebantu sai taat jama Allah, rik jama injuk reno betik luot jama Allah.

¹⁷Kidang syukor jama Allah! Mani tumbai keti jadi jelma sai bantu sai patuh tehadap dusa, kidang tano keti jama sepenuh hati mentaati pengajaran benor sai radu dikeniko jama niku.

¹⁸Keti radu dibebasko jak dusa, rik tano jadi jelma sai ngebantu sai patuh untuk kehaga-Ni Allah.

¹⁹Mani daya tangkapmu lemoh nihan, nyak makai cuntoh-cuntoh perumpamaan tentang jelma sai ngebantu in lebih mudah keti ngerti. Tumbai keti nyerahko dirimu sunyinni sebagai jelma sai ngebantu bagi hal-hal sai kamak rik sai jahat untuk maksud-maksud sai jahat. Injuk reno tano, hagani keti nyerahko diri seluruhni sebagai jelma sai ngebantu bagi kehaga-Ni Allah untuk maksud-maksud-Ni Allah sai khusus.

²⁰Waktu keti dikuasai ulih dusa, keti mak dikuasai ulih kehaga-Ni Allah.

²¹Waktu ano untung api kedo sai keti terima jak hal-hal sai tano inji keti meliom ngeguaikoni? Perbuatan-perbuatan udi angkah ngakibatko kematian!

²²Kidang tano keti radu dibebasko jak dusa, rik jadi jelma sai ngebantu sai taat Allah. Untungmu iado bahwa Puari hurik khusus untuk Allah rik hal udi ngehasilko hurik sejati rik kekal.

²³Mani kematian iado upah jak dusa; kidang hurik sejati rik kekal jejama Isa Almasih Tuhan ram yakdo pengenian sai dikeniko ulih-Ni Allah jama cuma-cuma.