Read Lampung Api ROMA 8 Bible Online

ROMA 8 - Lampung Api bible

ROMA 8

¹Tano mak ngedok lagi penghukuman tehadap tian sai hurik besatu jama Isa Almasih.

²Mani hukum Ruh-Ni Allah sai nyani ram hurik jadi sai jama Isa Almasih radu ngebebasko nyak jak hukum sai nyebabko dusa rik kematian.

³Api sai mak dapok dilakuko ulih hukum agama, mani ram manusia lemoh, udi radu dilakuko ulih-Ni Allah. Allah ngalahko kuasa dusa delom tabiat manusia jama ngirimko Anak-Ni tenggalan, sai ratong delom keadaan gegoh jama manusia sai bedusa, untuk ngehapusko dusa.

⁴Allah ngelakuko ano in kehaga-Ni sai dinyatako delom hukum agama Yahudi udi dapok dijalanko delom diri neram sai hurik nutuk Ruh-Ni Allah rik lain nutuk tabiat manusia.

⁵Jelma-jelma sai hurik nutuk tabiatni manusia, terus mikerko api sai dimirakko ulih tabiat manusia. Kidang jelma-jelma sai hurik nutuk Ruh-Ni Allah, terus mikerko api sai dimirakko ulih Ruh-Ni Allah.

⁶Kik pikeranmu dikuasai ulih tabiat manusia, maka akibatni kematian. Kidang kik pikeranmu dikuasai ulih Ruh-Ni Allah, maka akibatni yakdo hurik rik damai jama Allah.

⁷Jelma sai pikeranni dikuasai ulih tabiat manusia, jelma udi bemusuhan jama Allah; mani jelma udi mak patuh jama hukum-Ni Allah; rik sangun ia mak dapok patuh jama hukum-Ni Allah.

⁸Jelma-jelma sai hurik nutuk tabiat manusia, mak dapok nyenangko Allah.

⁹Kidang keti mak hurik nutuk tabiat manusia. Keti hurik nutuk Ruh Allah — kik, tantuni, Ruh-Ni Allah temon-temon nyating peranan di delom dirimu. Jelma sai mak ngedok Ruh-Ni Almasih, jelma udi lain hak kedauni Almasih.

¹⁰Kidang kik Almasih hurik di delom dirimu, maka walaupun badanmu haga mati ulihni dusa, kidang Ruh-Ni Allah ngeniko hurik jama niku, mani hubunganmu jama Allah radu betik.

¹¹ Kik Ruh-Ni Allah, sai ngehurikko Almasih jak kematian, hurik delom dirimu, maka Ia sai ngehurikko Almasih jak kematian ano, haga ngehurikko juga badanmu sai dapok mati udi. Ia ngelakuko ano jama Ruh-Ni sai hurik di delommu.

¹²Udido sebabni, Puari-puari, ram ngedok tanggung jawab; kidang lain tanggung jawab jama tabiat manusia; ram mak perlu hurik nutuk kemirakanni.

¹³Mani kik keti hurik nutuk tabiatni manusia, maka keti haga mati; kidang kik jama kuasa Ruh-Ni Allah, keti terus gaoh mematiko perbuatan-perbuatanmu sai bedusa, maka keti haga hurik.

¹⁴Jelma-jelma sai dibimbing Ruh-Ni Allah, iado anak-anak-Ni Allah.

¹⁵ Mani Ruh, sai dikeniko ulih-Ni Allah jama keti, mak nyani keti jadi jelma sai ngebantu sehingga keti hurik di delom kerabaian. Sebalikni Ruh-Ni Allah udi ngejadiko keti anak-anak-Ni Allah. Rik jama kuasa Ruh Allah udi ram ngurau Allah udi, “Bapa, ya Bapaku!”

¹⁶Ruh-Ni Allah jejama jama ruh neram nyatako bahwa ram iado anak-anak-Ni Allah.

¹⁷Nah, kik ram iado anak-anak-Ni, maka ram pun iado ahli waris-Ni sai haga nerima berkat-berkat sai disediako Allah untuk anak-anak-Ni. Ram haga nerima jejama jama Almasih api sai radu disediako Allah bagi Ia; mani kik ram menderita jama-jama Almasih, ram haga dimuliako juga jama-jama Ia.

¹⁸Sunyinni penderitaan sai ram alami tano, nutuk pendapatku, mak dapok dibandingko sama sekali jama kemuliaan sai haga dinyatako jama ram.

¹⁹Sunyin dunia tiram nihan nunggu waktuni Allah nyatako anak-anak-Ni.

²⁰ Mani alam radu ditaganko untuk jadi rapuh, lain ulihni kehaga tenggalan, kidang mani Allah naganko injuk reno. Walaupun injuk reno wat juga harapan inji:

²¹bahwa pada suatu waktu alam haga dibebasko jak kuasa sai ngehancorkoni rik haga nutuk dimerdekako rik diagungko jejama jama anak-anak-Ni Allah.

²²Ram pandai bahwa sampai saat inji sunyin alam mengeluh mani menderita injuk sai emak menderita waktu ngelaherko upi.

²³ Rik lain hak sunyin alam gaoh sai mengeluh; ram tenggalan pun mengeluh di delom hati ram. Ram radu nerima Ruh-Ni Allah sebagai pengenian-Ni Allah sai mula-mula, kidang ram masih juga nunggu Allah ngebebasko diri ram sunyinni rik ngejadiko ram anak-anak-Ni.

²⁴Mani jama ngeharap, maka ram diselamatko. Kidang kik api sai ram harapko ano radu ram liak, maka ano lain lagi harapan. Mani sapa sai masih ngeharapko sai hal sai radu diliakni?

²⁵Kidang kik ram ngeharapko sai hal sai makkung ram liak, maka ram nungguni jama sabar.

²⁶Injuk reno juga Ruh-Ni Allah ratong nulung ram kik ram lemoh. Mani ram mak pandai injuk repa seharusni ram bedua; Ruh udi tenggalan ngehadap Allah untuk ngilu bagi ram jama mirak rik tiram nihan sehingga mak dapok diucakko.

²⁷Maka Allah, sai pandai isi hati manusia, ngerti kehaga Ruh udi; mani Ruh udi ngilu jama Allah untuk umat-Ni Allah, rik nutuk kehaga-Ni Allah.

²⁸Ram pandai bahwa Allah ngator sunyin hal, sehingga ngehasilko sai betik untuk jelma-jelma sai mengasihi Ia rik sai diurau-Ni nutuk rencana-Ni.

²⁹Tian sai radu dipilih ulih-Ni Allah, radu juga ditantuko jak mula-mula untuk gegoh jama anak-Ni, yakdo Isa Almasih. Ulih injuk reno Sanak seno jadi sai mula-mula di hantara lamon puari-puari.

³⁰Injuk renodo Allah ngurau tian sai radu ditantuko-Ni lebih mena; rik tian sai diurau-Ni ano, dimungkinko-Ni muloh betik luot jama Ia. Rik tian sai dimungkinko-Ni betik luot jama Allah, ngakuk bagian delom hurik-Ni Allah tenggalan.

³¹Api sai dapok dicawako tano tentang sunyinni ano? Kik Allah memihak jama ram, sapado dapok ngelawan ram?

³²Anak-Ni tenggalan mak disayangko-Ni, melainko diserahko-Ni untuk kepentingan ram sunyinni; masa Ia mak haga ngeniko jama ram sunyin hal sai barehni?

³³Sapa sai dapok ngegugat ram umat sai dipilih ulih-Ni Allah, kik Allah tenggalan nyatako bahwa ram mak besalah?

³⁴Api wat sai haga nyalahko ram? Isa Almasih kanah sai ngebela ram! Iado sai radu mati, atau malah Iado sai radu dihurikko luot jak kematian rik wat jama Allah di rang sai bekuasa.

³⁵Api wat sai dapok ngelarang Almasih mengasihi ram? Dapok kedo kesusahan ngelarangni, atau kepayahan, atau penganiayaan, atau kebetohan, atau kejerihan, atau bahaya, ataupun kematian?

³⁶ Delom Alkitab tetulis injuk reji, “Sepanjang rani sekam hurik di delom bahaya maut mani Niku. Sekam diperlakuko injuk biri-biri sai haga ditikol.”

³⁷Mawat! Malah di delom sunyinni udi ram mansa kemenangan sai sempurna ulih-Ni Ia sai ngasihi ram!

³⁸Mani nyak percaya nihan bahwa di seluruh dunia, baik kematian maupun kehurikan, baik malaikat maupun jelma sai bekuasa, baik ancaman-ancaman tano inji maupun ancaman-ancaman di masa sai haga ratong atau kekuatan-kekuatan barehni;

³⁹baik hal-hal sai di langit, maupun hal-hal sai di delom bumi atau api gaoh sai bareh, sunyinni mak dapok nyegah Allah mengasihi ram, injuk sai radu ditunjukko-Ni liwat Isa Almasih, Tuhan ram.