Read Lampung Api ROMA 9 Bible Online

ROMA 9 - Lampung Api bible

ROMA 9

¹Api sai kucawako inji iado benor mani nyak kedauni Almasih. Nyak mak bebuhung. Hati nuraniku sai dibimbing ulih-Ni Ruh Allah, ngeyakinko nyak juga cawaku inji benor.

²Nyak sedih nihan rik hatiku menderita

³mani puari-puariku sai sebangsa jama nyak. Mani untuk tian, nyak tenggalan rila dikutuk ulih-Ni Allah rik diceraiko jak Almasih.

⁴ Tiando umat sai dipilih rik Allah ngejadiko tian anak-anak-Ni tenggalan, rik nyatako kuasa-Ni jama tian. Ia ngadako perjanjian jama tian rik ngeniko jama tian hukum agama. Allah ngeni pandai jama tian injuk repa tian harus beibadah rik tian radu nerima juga janji-janji-Ni.

⁵Tian iado keturunan jak nenek muyang ram. Almasih secara manusia asalni jak bangsa tian. Ia lebih langgar jak sunyinni. Terpujido Allah untuk selama-lamani! Amin.

⁶Nyak mak bemaksud ngucakko bahwa janji-Ni Allah radu mak belaku lagi; kidang lain hak sunyin ulun Israel iado umat sai dipilih ulih-Ni Allah.

⁷ Mak sunyinni keturunan Abraham iado anak-anak-Ni Allah. Mani Allah cawa jama Abraham, “Angkah keturunan Ishak gaoh sai haga disebut keturunanmu.”

⁸Udi retini bahwa keturunan Abraham sai jadi anak-anak-Ni Allah, angkah iado keturunanni sai laher mani janji-Ni Allah; rik lain sunyin keturunanni.

⁹ Mani janji-Ni Allah iado injuk berikut, “Pada waktu sai ditantuko, Nyak haga muloh, rik Sara haga ngedok sai anak bakas.”

¹⁰Rik inji juga: Ribka ngelaherko rua anak bakas jak sai bak, yakdo Ishak nenek muyang ram.

¹¹Semakkung kerua sanak seno laher, Allah radu nantuko pilihan-Ni untuk selanjutni. Pilihan-Ni Allah udi mak begantung jama api sai dapok dilakuko ulih jelma, kidang begantung jama panggilan-Ni Allah tenggalan. Mani pada waktu kerua anak bakas Ribka ano makkung dapok ngelakuko sai hal sai betik atau sai jahat,

¹² Allah radu ngucakko jama Ribka, “Sai tuha haga ngelayani sai ngura.”

¹³ Delom Alkitab tetulis bahwa Allah cawa injuk reji, “Yakub Kukasihi, kidang Esau Kunyuoh.”

¹⁴Api kesimpulan ram tano? Bahwa Allah udi mak adil kedo? Radu tantu Allah adil!

¹⁵ Mani Allah cawa jama Musa, “Nyak haga nunjukko rahmat jama jelma sai Nyak haga nunjukko rahmat, rik Nyak haga nunjukko rasa kesian jama jelma sai Nyak haga nunjukko rasa kesian.”

¹⁶Jadi, keputusan Allah udi mak begantung jama kerilaan manusia atau jama usaha manusia, melainko jama kebetikan hati-Ni Allah gaoh tehadap jelma sai dipilih-Ni udi.

¹⁷ Mani delom Alkitab tetulis, “Allah cawa jama raja Mesir, ‘Nyak ngejadiko niku raja untuk sai maksud inji gaoh, yakdo in jama niku, Nyak nunjukko kekuasaan-Ku rik nyani gelar-Ku temasyhur di seluruh dunia.’ ”

¹⁸Jadi, Allah ngedok rasa kesian jama sai jelma, kik Allah ngehagako injuk reno. Rik Allah nyani sai jelma jadi keras ulu, kik Allah ngehagako injuk reno juga.

¹⁹Nah, Puari haga cawa jama nyak, “Kik injuk reno mengapi Allah masih haga nyalahko manusia? Bukankah mak sai jelma pun dapok mencegah kehaga-Ni Allah?”

²⁰ Kidang, Puari! Puari angkah manusia gaoh. Rik Puari mak ngasi bani ngejawab jama Allah! Ngasi mak pot kumbang betanya jama jelma sai nyanini, “Mengapi niku nyani nyak injuk reji?”

²¹Bukankah jelma sai nyani pot kumbang udi berhak ngeguaiko tanoh litak udi sekehaga hatini? Jak segumpal tanoh litak, jelma udi berhak nyani rua macam pot kumbang: sai sai helau, rik sai barehni sai kurang helau.

²²Injuk reno jugado jama api sai disani Allah. Ia beniat ngelampiasko butong-Ni rik ngeliakko kekuasaan-Ni. Kidang Ia sabar tehadap tian sai harus dihukum mani nyani Ia butong.

²³Allah juga beniat untuk nunjukko jama ram kebahagiaan belimpah-limpah sai dicurahko-Ni jama ram sai dikasihani Ia. Ram radu disiapko-Ni untuk nerima kebahagiaan udi.

²⁴Ramdo sai radu diurau-Ni, lain angkah jak bangsa Yahudi, kidang juga jak bangsa-bangsa bareh.

²⁵ Mani delom buku Nabi Hosea, Allah cawa, “Jelma-jelma sai lain umat-Ku, haga Kusebut ‘umat-Ku’. Bangsa sai mak Kukasihi, haga Kusebut ‘Kekasih-Ku’.

²⁶ Rik di rang di dipa dicawako jama jelma, ‘Niku lain umat-Ku,’ di dudi jelma-jelma udi haga disebut anak-anak-Ni Allah sai hurik.”

²⁷ Nabi Yesaya cawa tegas mengenai bangsa Israel, “Temondo jumlah bangsa Israel selamon heni di laok, angkah cutik gaoh sai haga selamat;

²⁸mani Tuhan geluk ngejatuhko hukuman tehadap seisi dunia.”

²⁹ Yesaya cawa injuk reji juga, “Seandaini Allah Sai Mahakuasa mak ninggalko jama ram keturunan, pasti ram sunyin radu jadi injuk Sodom rik Gomora.”

³⁰Jadi, kesimpulanni iado inji: Bangsa-bangsa bareh sai lain Yahudi mak berusaha in hubungan tian jama Allah jadi betik luot. Kidang mani tian percaya, maka Allah nyani hubungan tian jama Ia jadi betik luot.

³¹Sebalikni, jelma-jelma Yahudi selalu berusaha mentaati hukum in hubungan tian jama Allah jadi betik luot. Kidang tian justru mak behasil.

³²Mengapi tian mak behasil? Mani tian ngelakuko ano mak liwat percaya jama Allah, melainko liwat usaha tian tenggalan. Maka tian tumbak tehantuk jama “Batu Sandungan”.

³³ Mengenai batu udi di delom Alkitab tetulis injuk reji, “Perhatikodo inji: Di Sion radu Kupikko sai batu sai haga ngakibatko ulun tehantuk; yakdo sai batu balak sai haga ngakibatko ulun tumbak. Kidang jelma sai percaya jama Ia mak haga kecewa.”