Read Lampung Api 1 KORINTUS 1 Bible Online

1 KORINTUS 1 - Lampung Api bible

1 KORINTUS 1

¹ Puari-puari jemaah-Ni Allah di Korintus! Puari radu diurau ulih-Ni Allah untuk jadi umat-Ni mani Puari kedau-Ni Isa Almasih, jejama sunyin jelma di dipa gaoh sai nyumbah Tuhan ram Isa Almasih, yakdo Tuhan tian rik Tuhan ram juga. Nyak, Paulus, rik puari ram Sostenes, ngeharap in Allah Bapa ram rik Tuhan Isa Almasih ngeni berkat rik sejahtera jama niku. Nyak nulis surat inji sebagai Rasul-Ni Isa Almasih, sai diangkat ulih-Ni Allah tenggalan rik atas kehaga-Ni juga.

⁴Nyak selalu beterima kasih jama Allah mengenai keti, mani keti radu nerima rahmat jak Allah liwat Isa Almasih.

⁵Mani keti radu jadi kedau-Ni Almasih, maka hurikmu mebatin delom sunyin hal. Pengetahuanmu tentang sunyin hal relam nihan, rik keti pandai ngajar pengetahuan udi.

⁶Udi nunjukko bahwa kabar tentang Almasih radu meresap nihan delom hatimu,

⁷sehingga keti mak kekurangan sai berkat pun, sementara keti nunggu Tuhan ram Isa Almasih ratong rik diliak ulih sunyin jelma.

⁸Almasih tenggalan haga ngejamin keti sampai akherni; in pada waktu Ia ratong luot, keti dihaluni tanpa cela.

⁹Allah dapok dipercaya sepenuhni. Iado Allah sai radu ngurau keti untuk jadi sai jama Anak-Ni, yakdo Isa Almasih, Tuhan ram.

¹⁰Puari-puari! Atas gelar-Ni Tuhan ram Isa Almasih, nyak ngilu in keti sunyin seia sekata; in dang wat perpecohan di hantara niku. Hagani keti besatu, sehati rik sepiker.

¹¹Mani, jelma-jelma jak keluarga Kloë ngelaporko jama nyak bahwa wat pertangkaran di hantaramu.

¹² Sai kumaksudko iado bahwa di hantara keti wat sai cawa, “Nyak nutuk Paulus,” wat juga sai cawa, “Nyak nutuk Apolos,” sai bareh cawa, “Nyak nutuk Petrus,” sedang sai lain lagi cawa, “Nyak nutuk Almasih.”

¹³Masakan Almasih tebagi-bagi! Paulus mak mati disalib untuk niku! Keti pun mak dibaptis untuk jadi jelma-jelma sai nutuk Paulus, kan?

¹⁴ Syukordo nyak mak ngebaptis sai jelma pun jak hantaramu, selain Krispus rik Gayus.

¹⁵Dang sampai sai jelma pun cawa bahwa nyak radu ngebaptis ia untuk jadi jelma sai nutuk nyak. (

¹⁶ Oh ya, Stefanas rik keluargani, sangun nyak ngebaptis tian. Kidang selain jak seno, seingokku, mak ngedok lagi ulun bareh sai kubaptis.)

¹⁷Almasih ngutus nyak lain hak untuk ngebaptis ulun, melainko untuk ngabarko Kabar Betik jak Allah; rik udi pun harus kulakuko tanpa memakai kepandaian cawa secara manusia, in kuasa jak kematian-Ni Almasih di salib mak jadi sia-sia.

¹⁸Mani bagi ulun-ulun sai nuju kebinasaan, kabar tentang kematian-Ni Almasih di salib merupako balak awak. Kidang, bagi ram sai diselamatko ulih-Ni Allah, kabar ano merupako carani Allah nunjukko kuasa-Ni.

¹⁹ Mani delom Alkitab, Allah cawa, “Kebijaksanaan jelma arif haga Kukacauko, rik pengertian jelma-jelma sekula haga Kulenyapko.”

²⁰ Nah, api gunani jelma-jelma arif udi? Api gunani tian sai sekula? Api gunani ahli-ahli piker dunia inji? Allah radu nunjukko bahwa kebijaksanaan dunia inji iado balak awak gaoh.

²¹Mani injuk repa pun pandaini manusia, ia mak dapok kenal jama Allah liwat kepandaianni tenggalan. Kidang justru mani Allah bijaksana, maka Ia bekenan nyelamatko jelma-jelma sai percaya jama Ia liwat kabar sai sekam wartako sai dianggap balak awak ulih dunia.

²²Ulun Yahudi nuntut keanehan sebagai bukti, rik ulun Yunani mementingko kebijaksanaan dunia inji.

²³Kidang ram inji angkah ngabarko Almasih sai mati disalib. Kabar udi menyinggung perasaan ulun Yahudi, rik dianggap balak awak ulih ulun-ulun lain Yahudi.

²⁴Kidang bagi jelma-jelma sai radu diurau ulih-Ni Allah — baik ulun Yahudi maupun ulun lain Yahudi — kabar ano merupako carani Allah nunjukko kuasa rik kebijaksanaan-Ni.

²⁵Mani sai keliakan bugu jama Allah, iado lebih bijaksana jak kebijaksanaan manusia; rik sai keliakan lemoh jama Allah, iado lebih kuat jak kekuatan manusia.

²⁶Puari-puari! Cuba ingok injuk repa keadaanmu waktu Allah ngurau keti. Angkah cutik gaoh jak hantaramu sai bijaksana, atau bekuasa, atau bekedudukan langgar nutuk pandanganni manusia.

²⁷Mani sangun Allah sengaja memilih sai dianggap bugu ulih dunia inji, in jelma-jelma pandai jadi meliom. Rik Allah memilih juga sai dianggap lemoh ulih dunia inji, in ulun-ulun sai gagah perkasa jadi meliom.

²⁸Allah memilih sai dianggap rendah, hina, rik malah sai dianggap mak bereti ulih dunia inji, in Allah ngehancorko sai dianggap penting ulih dunia.

²⁹Jama injuk reno mak sai jelma pun dapok mepungahko diri di hadap-Ni Allah.

³⁰Allah tenggalan sai nyani sehingga Puari besatu jama Isa Almasih. Liwat Almasih, ram dijadiko bijaksana. Rik liwat Ia juga Allah nyani ram luot mebetik jama diri-Ni, ngejadiko ram umat-Ni sai khusus, rik ngebebasko ram.

³¹ Jadi, injuk sai tetulis delom Alkitab, “Jelma sai ngerasa bangga, hagani ngerasa bangga atas api sai dilakuko Tuhan.”