Read Lampung Api 1 KORINTUS 11 Bible Online

1 KORINTUS 11 - Lampung Api bible

1 KORINTUS 11

¹ Tutukdo teladanku, injuk nyak pun nutuk teladan-Ni Almasih.

²Nyak muji keti mani keti selalu ingok nyak rik nutuk ajaran sai kukeniko jama niku.

³Kidang nyak mirak keti pandai sai hal lagi, yakdo bahwa sai jadi kepala atas unggal jelma bakas yakdo Almasih; sai jadi kepala atas inggom yakdo kajong, rik sai jadi kepala atas Almasih yakdo Allah.

⁴Kik sai bakas pada waktu bedua atau pada waktu nyampaiko kabar jak Allah di hadap lamon jelma, makai salok ulu, maka ulun udi ngehina Almasih.

⁵Rik kik sai bebai waktu bedua atau waktu nyampaiko kabar jak Allah di hadap lamon jelma, mak makai salok ulu, maka bebai udi ngehina kajongni sai jadi kepala atas dirini. Udi gegoh gaoh seolah-olah ulu bebai udi radu dicukor.

⁶Mani kik sai jelma bebai mak haga makai salok ulu lebih baik buokni digunting. Kidang kik sai jelma bebai dicukor uluni atau digunting buokni, maka udi suatu sai ngehina untuk ia. Ulihni seno lebih betik ia makai salok ulu.

⁷ Bakas mak perlu makai salok ulu, mani ia menggambarko pribadi rik keagungan-Ni Allah. Kidang bebai menggambarko keagungan bakas,

⁸ mani bakas mak dijadiko jak bebai, bebaido sai dijadiko jak bakas.

⁹Bakas mak muneh dijadiko untuk kepentingan bebai, melainko bebai dijadiko untuk kepentingan bakas.

¹⁰Ulihni seno, untuk nyenangko para malaikat, sai jelma bebai haga makai salok ulu sebagai tanda bahwa ia di debah kekuasaan kajongni.

¹¹Walaupun injuk reno delom kehurikan ram sebagai ulun Kristen, bebai mak berdiri tenggalan, lepas jak bakas, rik bakas pun mak berdiri tenggalan, lepas jak bebai.

¹²Mani walaupun bebai mula-mula dijadiko jak bakas, kidang radu jak seno bakas laher jak bebai; rik sunyin jelma asalni jak Allah.

¹³Cuba Puari-puari tenggalan nimbang hal inji: Api helau sai jelma bebai bedua jama Allah di hadap ulun lamon, tanpa makai salok ulu?

¹⁴Jak pengalaman umum, keti radu diajar bahwa kik bakas buok kejung, udi sai hal sai kurang patut.

¹⁵Kidang bagi bebai, buok dikeniko jama ia untuk nyalok uluni rik buok kejung yakdo kebanggaanni.

¹⁶Nah, kik wat sai haga betangkar tentang masalah inji, satu-satuni sai nyak dapok ucakko iado bahwa baik ram maupun jemaah-jemaah-Ni Allah barehni, pada umumni angkah ngedok sai kebiasaan ano delom jemaah; lain jak seno mak ngedok.

¹⁷Tentang sai berikut inji, nyak mak muji keti. Pertemuan ibadahmu lain hak ngehasilko sai betik, melainko sai mak betik.

¹⁸Mula-mula sai kudengi, bahwa di delom pertemuan-pertemuanmu wat kelompok-kelompok sai saling betentangan. Rik kukira semawat-mawatni kabar udi benor.

¹⁹Sangun radu sewajarni timbul perpecohan di hantaramu, in keliakan kanah sapa-sapa ulun Kristen sai sejati.

²⁰Kidang pada waktu keti bekumpul, sai keti sani ano lain Perjamuan Tuhan.

²¹Mani pada waktu mengan, keti masing-masing berebut ngakuk kanikan tenggalan, sampai wat sai mak mansa api-api, sedangko sai barehni jadi mabuk.

²²Mengapi injuk reno? Kan puari ngedok lamban? Puari dapok mengan rik nginum di dudi! Atau Puari haga ngehina jemaah Allah rik ngeliamko ulun-ulun mejerih? Api sai harus nyak cawako jama keti? Haga kedo nyak muji keti? Mak! Sekali-kali nyak mak haga muji keti.

²³Mani sai kuajarko jama niku, udi kuterima jak Tuhan tenggalan: bahwa bingi udi waktu Isa, Tuhan ram dikhianati, Ia ngakuk ruti,

²⁴rik radu jak Ia ngucapko terima kasih jama Allah atas ruti udi, Ia ngebelah-belah ruti udi jama culuk-Ni, raduni cawa, “Injido badan-Ku sai diserahko untuk keti. Lakukodo inji untuk ngingokko Nyak.”

²⁵ Reno muneh radu jak mengan, Ia ngakuk piala anggor raduni cawa, “Anggor inji iado perjanjian-Ni Allah sai ampai, disahko jama rah-Ku. Unggal keti nginum inji, lakukodo inji untuk ngingokko Nyak.”

²⁶Sangun unggal keti nganik ruti rik nginum anggor inji, keti ngabarko kematian-Ni Tuhan, sampai Ia ratong.

²⁷Ulihni seno, jelma sai nganik ruti-Ni Tuhan atau nginum anggor Tuhan secara sai mak patut, ulun udi bedusa tehadap Tuhan sai radu ngurbanko badan rik rah-Ni.

²⁸Jadi, unggal jelma harus meriksa dirini pai, ampai ia ngasi nganik ruti rik nginum anggor udi.

²⁹Mani kik jelma nganik ruti rik nginum anggor mak ngindahko bahwa perjamuan udi berkenaan jama badan Tuhan, jelma udi nganik rik nginum untuk nerima hukuman-Ni Allah atas dirini tenggalan.

³⁰Udi sebabni lamon jak hantara keti sai meruyuh rik lemoh, rik wat juga sai mati.

³¹Kidang kik ram meriksa diri ram pai, ram mak haga dihukum Allah.

³²Kidang kik ram dihukum Allah, Ia haga ngelecut ram, in ram dang kena penghukuman jejama dunia inji.

³³Ulihni seno, Puari-puariku, kik keti bekumpul untuk nganik di perjamuan Tuhan, keti harus saling nunggu.

³⁴Kik wat sai mebetoh, ia harus mengan pai di lamban. Kik keti nutuk hal sinji, pertemuan-pertemuan ibadahmu mak haga ngeratongko hukuman jak Allah atas dirimu tenggalan. Tentang masalah-masalah sai bareh, haga kuterangko jama niku, kik nyak ratong kanah.