Read Lampung Api 1 KORINTUS 12 Bible Online

1 KORINTUS 12 - Lampung Api bible

1 KORINTUS 12

¹Tano tentang karunia-karunia sai dikeniko Ruh-Ni Allah. Tentang ano, nyak haga Puari-puari pandai sai sebenorni.

²Ingokdo bahwa pada waktu keti makkung kenal jama Tuhan, keti tepengaruh untuk nutuk berhala sai bisu.

³Keti harus pandai bahwa jelma sai dipimpin Ruh-Ni Allah mak dapok cawa, “Tekutukdo Isa!” Reno muneh mak sai jelma pun dapok ngucakko, “Isado Tuhan!” kik ulun udi mak dipimpin Ruh-Ni Allah.

⁴ Wat bemacam-macam karunia jak Ruh-Ni Allah, kidang sunyinni dikeni ulih-Ni Ruh sai sai.

⁵Wat sunyin guai untuk ngelayani Tuhan, kidang Tuhan sai dilayani ano, Tuhan sai sai juga!

⁶Wat bemacam-macam cara ngeguaiko guaini Tuhan, kidang sai ngeniko kekuatan untuk ano jama unggal jelma iado Allah sai sai juga.

⁷Untuk kebetikan ram sunyin, Ruh-Ni Allah beguai jama unggal jelma secara tenggalan-tenggalan.

⁸Jama sai jelma, Ruh udi ngeniko kesanggupan untuk cawa bewibawa. Jama sai bareh Ruh sai gegoh ano ngeniko kesanggupan untuk ngejelasko tentang Allah.

⁹Ruh sai sai udi juga ngeniko jama sai jelma sai, kemampuan sai luar biasa untuk percaya jama Almasih; sedangko jama sai bareh Ruh udi ngeniko kuasa untuk ngunyaiko jelma.

¹⁰Jama sai jelma dikeniko kuasa untuk ngadako keanehan rik jama sai bareh dikeniko karunia untuk ngeni pandai rencana-rencana-Ni Allah. Jama sai bareh Ruh udi ngeni kesanggupan untuk ngebida-bidako dipa karunia sai jak Ruh-Ni Allah rik dipa sai bareh. Wat sai dikeniko kesanggupan untuk cawa jama bebagai bahasa sai aneh, rik wat muneh sai dikeniko kesanggupan untuk nerangko reti bahasa-bahasa ano.

¹¹Sunyinni ano diguaiko ulih Ruh sai sai udi juga; masing-masing jelma dikeni karunia sai tersendiri nutuk kehaga-Ni Ruh udi tenggalan.

¹² Almasih iado injuk badan manusia; badan ano sai, kidang terdiri jak lamon anggota. Sunyin anggota udi, walaupun lamon, merupako sai badan.

¹³Injuk reno juga ram sunyin, baik jelma Yahudi maupun jelma lain Yahudi, jelma-jelma sai ngebantu maupun jelma-jelma bebas; ram sunyin radu dibaptis ulih-Ni Ruh sai gegoh udi, in ram dijadiko sai di badan Almasih ano. Ram sunyinni juga ngalami Ruh sai sai ano sepenuhni.

¹⁴Mani badan udi tenggalan mak terdiri jak sai anggota gaoh kidang lamon anggotani.

¹⁵Kik cukut cawa, “Nyak lain culuk, ulihni seno nyak lain bagian jak badan,” ano mak bereti bahwa cukut udi lain bagian jak badan.

¹⁶Rik kik cuping cawa, “Mani nyak lain mata, maka nyak lain hak bagian jak badan,” ano juga mak bereti bahwa cuping ano lain hak bagian jak badan.

¹⁷Seandaini seluruh badan udi jadi mata gaoh, injuk repa badan ano dapok ngedengi? Atau kik seluruh badan ano jadi cuping gaoh, injuk repa badan ano nyium?

¹⁸Ram liak bahwa Allah sai ngepikko anggota-anggota ano pada badan. Masing-masing dipikko di rangni ulih Allah nutuk kehaga-Ni.

¹⁹Kik seluruh angkah sai anggota gaoh, sapa sai disebut badan?

²⁰Jadi sangun wat lamon anggota, kidang badan angkah sai.

²¹Ulihni seno, mata mak dapok cawa jama culuk, “Nyak mak memerluko niku!” atau ulu cawa jama cukut, “Nyak mak memerluko niku!”

²²Sebalikni anggota-anggota badan sai dianggap lemoh udi, ram perluko nihan;

²³rik anggota-anggota sai ram anggap mak sepira berega, justru yakdo anggota-anggota sai ram keniko lebih lamon penghargaan. Anggota-anggota badan sai mak keliakan helau, malah lebih ram perhatiko.

²⁴Anggota-anggota badan sai radu keliakan helau, mak memerluko perhatian ram. Allah radu nyusun badan ram injuk reno rupani in anggota-anggota sai kurang berega dikeniko lebih lamon penghargaan.

²⁵Jama injuk reno badan ano mak tebagi-bagi; masing-masing anggota memperhatiko peperda tian.

²⁶Kik sai anggota menderita, sunyin anggota barehni menderita juga; kik sai anggota dipuji, sunyin anggota barehni nutuk riang.

²⁷Puari sunyinni jama-jama badan Almasih rik keti masing-masing anggota jak badan udi.

²⁸ Injuk reno juga di delom jemaah, Allah radu nantuko rang untuk bebagai-bagai jelma: Mula-mula rasul-rasul; kerua, nabi-nabi, ketelu guru-guru, raduni tian sai ngadako keanehan-keanehan, radu jak seno tian sai dikeni karunia untuk ngunyaiko jelma, atau untuk nulung jelma bareh, atau untuk mimpin, ataupun untuk cawa jama lamon macam bahasa sai aneh.

²⁹Tian lain sunyinni rasul, atau nabi, ataupun guru. Mak sunyinni ngedok kuasa untuk ngadako keanehan,

³⁰atau untuk ngunyaiko jelma, atau untuk cawa jama lamon macam bahasa sai aneh, atau untuk menterjemahko bahasa-bahasa ano.

³¹Ulihni seno, hagani keti berusaha temon-temon untuk mansa karunia-karunia sai paling utama. Kidang berikut inji nyak nunjukko jama niku jalan sai paling betik.